ທ່ານ ມອນໄຊ ລາວມົວຊົ່ງ ຮອງປະທານ ສູນກາງແນວລາວສ້າງຊາດ (ສນຊ) ໄດ້ຕາງໜ້າ ສນຊ ຂຶ້ນປະກອບຄໍາເຫັນ ຕໍ່ບົດລາຍງານຂອງສະພາແຫ່ງຊາດ ວ່າ: ສນຊ ເຫັນດີເປັນເອກະພາບ ແລະ ສະໜັບສະໜູນ ຕໍ່ເນື້ອໃນບົດລາຍງານ ຊຶ່ງສະແດງໃຫ້ເຫັນເຖິງຄວາມພະຍາຍາມໃນການຈັດຕັ້ງປະຕິບັດພາລະບົດບາດ, ສິິດ, ໜ້າທີ່ ຂອງຕົນເອງຢ່າງຫ້າວຫັນ ຈຶ່ງສາມາດຍາດແຍ່ງໄດ້ຜົນສໍາເລັດຫຼາຍດ້ານ ດັ່ງທີີ່ໄດ້ຍົກຂຶ້ນໃນບົດລາຍງານ. ພ້ອມດຽວກັນນີ້, ກໍໄດ້ ສນຊ ຍັງໄດ້ສະເໜີ ຕໍ່ສະພາແຫ່ງຊາດ ກໍຄືບັນດາທ່ານ ສສຊ ໃນຫຼາຍດ້ານທີ່ຕ້ອງໄດ້ເອົາໃຈໃສ່ ເປັນຕົ້ນໃນດ້ານການຮັບຮອງນິຕິກໍາ ກໍໄດ້ຂໍໃຫ້ເພີ່ມທະວີໃນການຄົ້ນຄວ້າໃຫ້ລະອຽດ, ເລິກເຊິ່ງ ແລະ ຊັດເຈນຕື່ມກ່ອນທີ່ຈະຮັບຮອງ; ໃນດ້ານການຕິດຕາມ-ກວດກາ, ຊຸກຍູ້ການຈັດຕັ້ງປະຕິບັດກົດໝາຍ ກໍຄື ນິຕິກໍາລຸ່ມກົດໝາຍບາງຈຸດຍັງບໍ່ທັນແຂງແຮງເປັນຕົ້ນ: ບັນຫາບໍ່ແຮ່, ບັນຫາພື້ນຖານໂຄງລ່າງ, ບັນຫາຢາເສບຕິດ, ການຂາດແຄນແຮງງານ, ການຕົວະຍົວະລອກຫຼວງຜ່ານສື່ອອນໄລແລະອື່ນໆຊຶ່ງໄດ້ຂໍໃຫ້ຕິດຕາມກວດກາແລະຊຸກຍູ້ພາກສ່ວນກ່ຽວຂ້ອງເຂັ້ມງວດທາງດ້ານການບັງຄັບໃຊ້ແລະປະຕິບັດກົດໝາຍ.
ຕໍ່ກັບສະມາຊິກສະພາໃນການເຮັດບົດບາດໃນຖານະເປັນຕົວແທນ ຂອງປະຊາຊົນ ບາງທ່ານ ເຫັນວ່າ: ຍັງເຮັດບໍ່ທັນໄດ້ດີເທົ່າທີ່ຄວນ.
ພ້ອມນີ້, ສນຊ ຍັງໄດ້ມີຄໍາເຫັນຕໍ່ກັບແຜນການ 5 ປີ (2026-2030) ແລະ ແຜນປະຈໍາປີ 2026 ຂອງສະພາແຫ່ງຊາດ ຊຸດທີ X ວ່າ:ດ້ານພື້ນຖານ ແມ່ນເຫັນດີ ຕາມບົດລາຍງານ ແຕ່ສະເໜີໃຫ້ເອົາໃຈໃສ່ບາງຈຸດ ເປັນຕົ້ນກ່ຽວກັບທິດທາງລວມ ແມ່ນຂໍໃຫ້ເພີ່ມທະວີວຽກງານລົງຮາກຖານ ໂດຍສະເພາະແມ່ນສະມາຊິກສະພາປະຊາຊົນແຂວງ ປະຈໍາເມືອງ; ຕິດຕາມ-ກວດກາ, ຊຸກຍູ້, ການແກ້ໄຂຄໍາຮ້ອງ, ຄໍາສະເໜີ ຂອງປະຊາຊົນ, ພ້ອມທັງລາຍງານຜົນການແກ້ໄຂ. ດ້ານນິຕິບັນຍັດໃຫ້ຕິດຕາມ-ກວດກາ, ຊຸກຍູ້ ການສ້າງ ແລະ ການປັບປຸງກົດໝາຍ ໃຫ້ຖືກຕ້ອງ ຕາມບາດກ້າວ, ຂັ້ນຕອນ ທີ່ໄດ້ກໍານົດ ໃນກົດໝາຍວ່າດ້ວຍ ການສ້າງນິຕິກໍາ ແລະ ສອດຄ່ອງກັບສະພາບຕົວຈິງ.ການຕົກລົງບັນຫາສໍາຄັນຂອງຊາດໃຫ້ຕິດຕາມ-ກວດກາ, ຊຸກຍູ້ ໂຄງການລະດັບຊາດເຊັ່ນ: ໂຄງການທາງດ່ວນວັງວຽງ-ບໍ່ເຕັ່ນ, ໂຄງການທາງດ່ວນວຽງຈັນ-ຮ່າໂນຍ, ໂຄງການກໍ່ສ້າງທາງລົດໄຟວຽງຈັນ-ຄໍາມ່ວນ-ທ່າເຮືອບຸ່ງອ່າງ ສສ ຫວຽດນາມ ແລະ ອື່ນໆ; ພ້ອມດຽວກັນ, ກໍຊຸກຍູ້ການຜະລິດກະສິກໍາ ຕາມແລວທາງລົດໄຟ, ແລວທາງດ່ວນ ເພື່ອຜະລິດສິນຄ້າສົ່ງອອກ,ໂຄງການສ້ອມແປງເສັ້ນທາງຫຼວງແຫ່ງຊາດ ເລກທີ 13. ດ້ານການສ້າງຄວາມເຂັ້ມແຂງ ໃຫ້ແກ່ສະພາແຫ່ງຊາດ, ກໍຂໍໃຫ້ເອົາໃຈໃສ່ ດ້ານຄຸນນະພາບຂອງບຸກຄະລາກອນ ທີ່ຈະລົງສະມັກເລືອກຕັ້ງສະມາຊິກສະພາ ຈະແມ່ນສະພາແຫ່ງຊາດ ຫຼື ສະພາປະຊາຊົນແຂວງ.ສຳລັບ, ການເຄື່ອນໄຫວຕ່າງປະເທດກໍຄວນກໍານົດ ໃຫ້ແຈ້ງຕື່ມ ການຮ່ວມມືກັບ ລັດຖະສະພາ ຂອງບັນດາປະເທດເພື່ອນມິດຍຸດທະສາດ, ບັນດາປະເທດໃນພາກພື້ນ ແລະ ໃນໂລກ ເພື່ອໃຫ້ສອດຄ່ອງກັບນະໂຍບາຍ ເຊື່ອມໂຍງ, ເຊື່ອມຈອດ ທີ່ພັກໄດ້ກໍານົດ.
ການສ່ອງແສງສຽງສະທ້ອນຈາກສັງຄົມ, ສນຊ ກໍໄດ້ມີຄໍາເຫັນວ່າ: ໄລຍະ 5 ປີຜ່ານມາ, ແມ່ນໄດ້ຮັບຄໍາຮ້ອງ, ຄໍາສະເໜີສ່ອງແສງ ຈາກສັງຄົມຫຼາຍຮ້ອຍສະບັບ, ແຕ່ສັງລວມເນື້ອໃນໄດ້ດັ່ງນີ້:ຂົງເຂດ ປກຊ-ປກສເປັນຕົ້ນການບັງຄັບໃຊ້ກົດໝາຍ ແລະ ການຈັດຕັ້ງປະຕິບັດກົດໝາຍ ຍັງບໍ່ທັນເຂັ້ມງວດເທົ່າທີ່ຄວນ,ຍັງມີການລະເມີດກົດໝາຍ ຂອງຜູ້ປະກອບການ;ຂົງເຂດເສດຖະກິດມີບັນຫາຄວາມຫຍຸ້ງຍາກທາງດ້ານເສດຖະກິດ ແລະ ຊີວິດການເປັນຢູ່ຂອງປະຊາຊົນ, ພະນັກງານ, ທະຫານຕໍາຫຼວດ, ພະນັກງານ-ລັດຖະກອນ,ບັນຫາທີ່ດິນ,ບັນຫາຜົນກະທົບຈາກການຂຸດຄົ້ນບໍ່ແຮ່ ເປັນຕົ້ນແມ່ນສານຜິດຕົກຄ້າງ,ບັນຫາພື້ນຖານໂຄງລ່າງ ເປັນຕົ້ນເສັ້ນທາງຄົມມະນາຄົມ;ດ້ານວັດທະນະທໍາ-ສັງຄົມກ່ຽວກັບຈັນຍາບັນ, ຈັນຍາທໍາ ຂອງແພດໝໍ ແລະ ຄູ-ອາຈານ,ການປະລະການຮຽນ, ການລັ່ງໄຫຼໄປອອກແຮງງານ ຢູ່ຕ່າງປະເທດ,ບັນຫາຢາເສບຕິດ, ຄ່ານິຍົມທີ່ບໍ່ຖືກຕ້ອງ,ການຂາດແຄນແຮງງານ ແລະ ອື່ນໆ; ບັນຫາການຄຸ້ມຄອງຄົນຕ່າງປະເທດ ທີ່ມາເຄື່ອນໄຫວດຳເນີນທຸລະກິດ ຢູ່ ສ ປປ ລາວ ໃຫ້ຖຶກຕ້ອງ ແລະ ເຂັ້ມງວດຕາມກົດໝາຍ ຕົວຢ່າງ: ຍັງມີກຸ່ມຄົນຈຳນວນໜຶ່ງລະເມີດກົດໝາຍ (ກຸ່ມແກ້ງສະແກຼມເມີ, ການຄ້າມະນຸດ ແລະ ແຕ່ງງານຜິດກົດໝາຍ), ບັນຫາການຄຸ້ມຄອງ, ການກວດກາ ການບໍລິການພາຍໃນໃຫ້ເຂັ້ມງວດ ແລະ ເຂົ້າສູ່ລະບຽບກົດໝາຍ ເປັນຕົ້ນ: ທຸລະກິດບັນເທິງ, ສະຖານທີ່ແຫຼ່ງທ່ອງ ແລະ ການບໍລິການການທ່ອງທ່ຽວແລະ ອື່ນໆ.
(ຂ່າວ:ບຸນຕອມ, ພາບ:ຂັນໄຊ)
ຄໍາເຫັນ