ສ້າງຄວາມເຂັ້ມແຂງໃຫ້ບຸກຄະລາກອນເພດຍິງ ດ້ານໂພຊະນາການໃນ ສປປ ລາວ

ທີ່ສູນອົບຮົມແມ່ຍິງລາວ ນະຄອນຫຼວງວຽງຈັນ ໂດຍການເປັນປະທານຮ່ວມຂອງ ທ່ານ ນາງ ຜາສຸກ ວົງວິຈິດ ຮອງປະທານຄະນະບໍລິຫານງານສູນກາງ ສສຍລ, ທ່ານ ນາງ ຄຣອງຂະນິດ ຮັກຈະເລີນ ເອກອັກຄະຣາຊະທູດຜູ້ມີອຳນາດເຕັມ ແຫ່ງຣາຊະອານາຈັກໄທ ປະຈຳ ສປປ ລາວ, ມີທ່ານ ບິລາລ ໂອແຮັງເຊັບ ດູຮານີ ຜູ້ຕາງໜ້າອົງການສະຫະປະຊາຊາດສຳລັບເດັກ ປະຈຳ ສປປ ລາວ, ມີທີ່ປຶກສາສະຖາບັນໂພຊະນາການມະຫາວິທະຍາໄລມະຫິດົນ, ບັນດາທີມງານຄະນະວິທະຍາກອນ-ອາຈານ ຈາກສະຖາບັນໂພຊະນາການ, ມະຫາວິທະຍາໄລມະຫິດົນປະເທດໄທ, ບັນດາຄະນະກົມ, ຄະນະສູນ, ສຳມະນາກອນຈາກແຂວງໄຊຍະບູລີ, ຈຳປາສັກ, ສາລະວັນ, ຄໍາມ່ວນ ແລະ ແຂວງບໍລິຄໍາໄຊ ເຂົ້າຮ່ວມ.

ທ່ານ ນາງ ຜາສຸກ ວົງວິຈິດ ກ່າວວ່າ: ສປປ ລາວ ຍັງປະເຊີນໜ້າກັບສິ່ງທ້າທາຍທາງດ້ານໂພຊະນາການເຊັ່ນ: 1) ການຂາດສານອາຫານຊຳເຮື້ອ ເຮັດໃຫ້ເດັກນ້ອຍເຕ້ຍໃນທົ່ວປະເທດ 33%; 2) ການຂາດອາຫານກະທັນຫັນ ເຮັດໃຫ້ເດັກນ້ອຍຈ່ອຍຜອມ 10.7%; 3) ແຕ່ໃນຕົວເມືອງພັດມີບັນຫາເດັກນ້ຳໜັກເກີນ (ເດັກຕຸ້ຍໂພດ) ຊຶ່ງທັງໝົດເຫຼົ່ານີ້ລ້ວນແຕ່ສົ່ງຜົນກະທົບຕໍ່ການຈະເລີນເຕີບໂຕ ແລະ ຕໍ່ສຸຂະພາບຂອງເດັກໃນການພັດທະນາທາງດ້ານຮ່າງກາຍ ແລະ ສະໜອງ. ສສຍລ ເພື່ອປະຕິບັດພາລະບົດບາດສິດ-ໜ້າທີ່ ຄວາມຮັບຜິດຊອບຂອງຕົນ ໃນການສົ່ງເສີມຄວາມກ້າວໜ້າໃຫ້ແມ່ຍິງ ແລະ ເດັກນ້ອຍ ແລະ ປະຕິບັດວາລະແຫ່ງຊາດໃນການຫຼຸດພົ້ນອອກຈາກຄວາມທຸກຍາກໃນປີ 2030 ເຫັນໄດ້ຄວາມສຳຄັນດັ່ງກ່າວ ແລະ ເພື່ອເປັນການປະກອບສ່ວນໃນການສົ່ງເສີມສຸຂະພາບແມ່ຍິງ ແລະ ເດັກນ້ອຍໃຫ້ດີຂຶ້ນ, ສາມາດບັນລຸຕົວຊີ້ວັດຄາດໝາຍທີ່ວາງໄວ້ ຈຶ່ງມີແຜນສ້າງຄວາມເຂັ້ມແຂງດ້ານໂພຊະນາການ ດ້ວຍການໃຫ້ຄວາມຮູ້ເອື້ອຍນ້ອງແມ່ຍິງໃນຂັ້ນແຂວງ-ເມືອງ ຈົນຮອດຊຸມຊົນ ເພື່ອນຳໄປເຜີຍແຜ່ໃຫ້ຂໍ້ມູນຂ່າວສານອັນຖືກຕ້ອງຊ່ວຍເຫຼືອແມ່ຍິງ ໃນເຂດຕົນຮັບຜິດຊອບໃຫ້ເຂົ້າເຖິງການບໍລິການທາງດ້ານສາທາລະນະສຸກ, ການໃຫ້ຂໍ້ມູນຂ່າວສານແນະນຳຊັກຊວນໃຫ້ແມ່ຍິງໄປຮັບການບໍລິການຢູ່ສຸກສາລາ, ໂຮງໝໍ ຫຼື ສະຖານບໍລິການສາທາລະນະສຸກ; ຖືພາຕາມໄວອັນຄວນແຕ່ງງານເມື່ອຮອດອາຍຸ (ຫຼັງ 18 ປີ) ຖືພາແລ້ວຕ້ອງໄປກວດທ້ອງຕິດຕາມ ຈົນເຖິງເວລາເກີດມີແພດຊ່ວຍ ລູກເກີດມາແລ້ວໄດ້ດື່ມນ້ຳນົມເຫຼືອງ, ໄດ້ຮັບການສັກຢາກັນພະຍາດ ແລະ ລ້ຽງລູກດ້ວຍນ້ຳນົມແມ່ພຽງຢ່າງດຽວຈົນເດັກຮອດອາຍຸ 6 ເດືອນ, ຮູ້ໃຫ້ອາຫານເສີມຫຼັງ 6 ເດືອນ. ຂະບວນການທີ່ເວົ້າມານີ້ ແມ່ຍິງມີບົດບາດສຳຄັນໃນການລ້ຽງດູສົ່ງເສີມສຸຂະພາບແມ່ ແລະ ເດັກໃຫ້ມີສຸຂະພາບແຂງແຮງ. 

ການຈັດຊຸດຝຶກອົບຮົມຄູຝຶກໃນຄັ້ງນີ້, ຍັງເປັນການສະເຫຼີມສະຫຼອງວັນໂພຊະນາການແຫ່ງຊາດ ແລະ ອາທິດສາກົນ ສົ່ງເສີມການລ້ຽງລູກດ້ວຍນໍ້ານົມແມ່. ສະນັ້ນ, ຮຽກຮ້ອງໃຫ້ສຳມະນາກອນທຸກຄົນ ຈົ່ງເອົາໃຈໃສ່ຕັ້ງໃຈສຶກສາຮ່ຳຮຽນຮັບເອົາຄວາມຮູ້, ເພື່ອນຳໄປຜັນຂະຫຍາຍ, ຈັດຕັ້ງປະຕິບັດໃນເຂດແຂວງ, ເມືອງຂອງຕົນ ຮ່ວມກັບຄະນະກຳມະການດ້ານໂພຊະນາການຂັ້ນແຂວງ, ພະຍາຍາມສ້າງເປັນແຜນການ ໂຄງການ, ກິດຈະກຳເພື່ອປັບປຸງເຮັດໃຫ້ສະພາບໂພຊະນາການໃນຊຸມຊົນຂອງຕົນດີຂຶ້ນ. 

(ຂ່າວ-ພາບ: ວັນເພັງ)