ສານປະຊາຊົນສູງສຸດ ຈັດພິທີປະກາດການຈັດຕັ້ງ

ທ່ານ ຂຸນສຸວັນ ສຸທຳມະວົງ ຄະນະປະຈຳພັກ ຫົວໜ້າກົມຈັດຕັ້ງ-ພະນັກງານ ໄດ້ຂຶ້ນຜ່ານມະຕິຂອງຄະນະປະຈຳສະພາແຫ່ງຊາດ ວ່າດ້ວຍການແຕ່ງຕັ້ງ ທ່ານ ກົມສະຫວາດ ກົມໄຊຊະນະ ຜູ້ພິພາກສາຊັ້ນສາມສານປະຊາຊົນນະຄອນຫຼວງວຽງຈັນ ເປັນຮອງປະທານສານປະຊາຊົນນະຄອນຫຼວງວຽງຈັນແລະ ແຕ່ງຕັ້ງທ່ານ ໄລລາທອງ ຂັນຕິຍະລາດ ຜູ້ພິພາກສາຊັ້ນສາມ ສານປະຊາຊົນພາກກາງ ເປັນຮອງປະທານສານປະຊາຊົນພາກກາງ.ແລະ ຜ່ານຂໍ້ຕົກລົງ ປະທານສານປະຊາຊົນສູງສຸດ ວ່າດ້ວຍການເລື່ອນຊັ້ນ ຜູ້ພິພາກສາ ຊັ້ນໜຶ່ງ ຂຶ້ນເປັນຜູ້ພິພາກສາຊັ້ນສອງ ສານປະຊາຊົນສູງສຸດ ຂໍ້ຕົກລົງວ່າດ້ວຍການແຕ່ງຕັ້ງພະນັກງານໃຫ້ດຳລົງຕຳແໜ່ງບໍລິຫານ ແລະ ສັບປ່ຽນບ່ອນປະຈຳການຂອງພະນັກງານສານປະຊາຊົນສູງສຸດ.

ໃນໂກາດດັ່ງກ່າວ, ທ່ານ ນາງ ວຽງທອງ ສີພັນດອນ ໄດ້ມີບາງຄຳເຫັນໂອ້ລົມຕໍ່ພິທີວ່າ:ເພື່ອສືບຕໍ່ພາລະກິດປົກປັກຮັກສາແລະ ພັດທະນາປະເທດຊາດແລະພັດທະນາລະບົບສານປະຊາຊົນໃຫ້ໜັກແໜ້ນເຂັ້ມແຂງ. ສະນັ້ນ, ຜູ້ທີ່ໄດ້ຮັບການແຕ່ງຕັ້ງໃໝ່ຈົ່ງພ້ອມກັນເອົາໃຈໃສ່ຕື່ມບາງດ້ານດັ່ງນີ້:ໃຫ້ສືບຕໍ່ເອົາໃຈໃສ່ສຶກສາຄົ້ນຄວ້າຮ່ຳຮຽນແນວທາງນະໂຍບາຍຂອງພັກ, ກົດໝາຍຂອງລັດ, ມະຕິຄຳສັ່ງຂອງຂັ້ນເທິງໃຫ້ເລິກເຊິ່ງ, ເພື່ອຈະຈັດຕັ້ງປະຕິບັດໜ້າທີ່ໃນການປົກປ້ອງກົດໝາຍ, ສຶກສາອົບຮົມກົດໝາຍ ແລະ ຕັດສິນຄະດີໃຫ້ຄ່ອງແຄ້ວ, ຖືກຕ້ອງ, ເປັນທໍາ ເພື່ອນໍາເອົາຄວາມຍຸຕິທຳມາໃຫ້ສັງຄົມ; ຄະນະໜ່ວຍພັກ,ຄະນະກົມ, ຄະນະປະທານສານປະຊາຊົນພາກກາງ,ສານປະຊາຊົນນະຄອນຫຼວງວຽງຈັນຕ້ອງໄດ້ເອົາໃຈໃສ່ຊຸກຍູ້,ຕິດຕາມກວດກາການເຄື່ອນໄຫວປະຕິບັດໜ້າທີ່ວຽກງານຂອງຜູ້ພິພາກສາພະນັກງານຂອງສານປະຊາຊົນ ໃນຄວາມຮັບຜິດຊອບຂອງຕົນຢ່າງມີປະສິດ ທິພາບ, ພົບເຫັນຂໍ້ບົກຜ່ອງການດໍາເນີນຄະດີ, ການຕັດສິນຄະດີ ຕ້ອງລົງສົມທົບປຶກສາຫາລືນໍາຜູ້ຄົ້ນຄວ້າ, ຕັດສິນຄະດີດັ່ງກ່າວໃຫ້ຮູ້ເຖິງສາເຫດຂໍ້ບົກຜ່ອງ; ຖ້າຂໍ້ບົກຜ່ອງເກີດຈາກເຈດຕະນາ ຫຼື ອັດຕະວິໄສ ຂອງຜູ້ພິພາກສາ, ພະນັກງານຂອງສານ ຕ້ອງມີມາດຕະການທາງວິໄນຕາມແຕ່ລະກໍລະນີ ເພື່ອເຮັດໃຫ້ແຕ່ລະບັນຫາໄດ້ຮັບການແກ້ໂດຍໄວ, ຖືກຕ້ອງ, ຊັດເຈນ ແລະ ໂລ່ງລ່ຽນ; ເອົາໃຈໃສ່ປະຕິບັດໜ້າທີ່ ວິຊາສະເພາະ, ວິຊາການຮ່ວມກັບໝູ່ຄະນະໃຫ້ໄດ້ດີ, ຜູ້ພິພາກສາທີ່ເລື່ອນຊັ້ນໃໝ່ ກໍຕ້ອງຍົກສູງການດຳເນີນຄະດີຂອງຕົນຮັບຜິດຊອບໃຫ້ຖືກຕ້ອງທັນເວລາໂດຍສຸມໃສ່ແກ້ໄຂຄະດີໃຫ້ບັນລຸຕາມຕົວຊີ້ວັດທີ່ສະພາແຫ່ງຊາດໄດ້ຮັບຮອງຄະດີອາຍາ ໃຫ້ໄດ້ 90% ຂຶ້ນໄປ; ຄະດີແພ່ງ, ການຄ້າ 75%; ຄະດີຄອບຄົວ, ແຮງງານ, ເດັກ ແລະ ປົກຄອງ ໃຫ້ບັນລຸ 85% ຂຶ້ນໄປ; ດ້ວຍຄວາມວ່ອງໄວ ແລະ ມີຄຸນນະນະພາບສູງ(ສາມາດຈັດຕັ້ງປະຕິບັດໄດ້, ຄູ່ຄວາມຍອມຮັບ); ເພີ່ມທະວີຍົກສູງຄວາມຮັບຜິດຊອບການເມືອງ, ຍົກສູງສະຕິລະວັງຕົວຕໍ່ກົນອຸບາຍ, ອຳນາດເສດຖະກິດແຊກຄຸມ, ເພື່ອຊັກຈູງສະມາຊິກພັກ, ຜູ້ພິພາກສາ ພະນັກງານຂອງສານ ໄປກະທຳຜິດເພື່ອໃຫ້ເບິ່ງບັນຫາບໍ່ຈະແຈ້ງ, ພິກປີ້ນຄວາມຈິງ ແລະ ອື່ນໆ. ໃນການຕັດສິນ, ພິພາກສາຄະດີ ພັກ, ລັດ ແລະ ປະຊາຊົນ ໄດ້ມອບໜ້າທີ່ອັນມີກຽດສູງສົ່ງນີ້ໃຫ້ພວກສະຫາຍ ທີ່ໄດ້ຮັບການແຕ່ງຕັ້ງໃນມື້ນີ້ ລ້ວນແຕ່ເປັນເຈົ້າໜ້າທີ່ປົກປ້ອງກົດໝາຍ, ກົດໝາຍຈະມີຄວາມສັກສິດຫຼາຍ ຫຼື ໜ້ອຍ, ການພິພາກສາຄະດີຖືກຕ້ອງເປັນທຳ ຫຼື ບໍ່ ແມ່ນຂຶ້ນກັບຈັນຍາບັນ, ຈັນຍາທໍາ ແລະ ຄວາມສາມາດຄົ້ນຄວ້າຂໍ້ມູນຫຼັກຖານ ແລະ ອິີງຕາມກົດໝາຍຂອງພວກສະຫາຍ ຊຶ່ງມັນກະທົບໂດຍກົງຕໍ່ຄວາມເຂັ້ມແຂງຂອງອຳນາດລັດ, ຄວາມເຂັ້ມແຂງຂອງສານປະຊາຊົນພວກເຮົາ. ຂໍຮຽກຮ້ອງມາຍັງພວກສະຫາຍ ຈົ່ງສຸມສະຕິປັນຍາ, ເອົາໃຈໃສ່ຢ່າງເອົາຈິງເອົາຈັງ ໃນການຕອບຕ້ານທຸກກົນອຸບາຍມ້າງເພທຳລາຍ ຂອງພວກສັດຕູ ແລະ ກຸ່ມຄົນບໍ່ດີ ຢ່າງຂາດຕົວ ແລະ ຍູ້ແຮງການຈັດຕັ້ງປະຕິບັດ 2 ວາລະແຫ່ງຊາດ ຄື: ການແກ້ໄຂບັນຫາຢາເສບຕິດ ແລະ ບັນຫາວິກິດການດ້ານເສດຖະກິດການເງິນ ແລະ ມະຕິເລກທີ 04/ກມສພ ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງ ໃນໄລຍະໃໝ່(ສອຈ) ໃນຂົງເຂດສານພວກເຮົາຢ່າງແຂງແຮງ ເປັນປັດໄຈຊຸກຍູ້ການພັດທະນາປະເທດ ໃຫ້ມີຄວາມສີວິໄລໃນອະນາຄົດ.