 |
ສະຫາຍ ກັ້ງ ເຕັມສົມບັດ ຫົວໜ້າສະຖາບັນຄົ້ນຄວ້າ ແລະ ຝຶກອົບຮົມ ສານປະຊາຊົນສູງສຸດ ໄດ້ຜ່ານແຜນການເປີດຊຸດຮຽນທິດສະດີການເມືອງ-ການປົກຄອງ ຂັ້ນຕົ້ນ ຊຸດທີ I ວ່າ: ເພື່ອສ້າງໃຫ້ສະມະຊິກພັກ - ພະນັກງານ ຮຸ່ນສືບທອດປ່ຽນແທນ ຂອງສານປະຊົນໃນຂອບເຂດທົ່ວປະເທດໄດ້ຮຽນຮູ້ຢ່າງເລິກເຊິ່ງ ແລະ ເຂົ້າໃຈແຈ້ງ ກ່ຽວກັບທິດສະດີການເມືອງ, ພື້ນຖານທິດສະດີມາກເລນິນ, ແນວຄິດ ໄກສອນ ພົມວິຫານ, ແນວທາງນະໂຍບາຍຂອງພັກ, ການຄຸ້ມຄອງລັດ, ມີຄວາມເຊື່ອໝັ້ນຕໍ່ການນໍາພາຂອງພັກ, ມີຄຸນທາດການເມືອງ, ມີຄຸນສົມບັດສິນທໍາປະຕິວັດ, ມີຄວາມຈົງຮັກພັກດີຕໍ່ຊາດ-ຕໍ່ປະຊາຊົນ, ມີຄວາມຮູ້ທາງດ້ານທິດສະດີ ແລະ ພຶດຕິກຳໄປພ້ອມກັນ, ມີຄວາມຫ້າວຫັນເປັນແບບຢ່າງຮອບດ້ານ, ສາມາດປະຕິບັດວຽກງານທີ່ການຈັດຕັ້ງມອບໝາຍໃຫ້ຢ່າງມີປະສິດຕິພາບ ແລະ ປະສິດຕິຜົນ, ໂດຍສະເພາະຜູ້ທີ່ເປັນລັດຖະກອນຕຸລາການ ຕ້ອງມີຄວາມສາມາດໝູນໃຊ້ ທິດສະດີ ກັບກົດໝາຍໃຫ້ສອດຄ່ອງ ກັບການບໍລິຫານສານ, ບໍລິຫານຄະດີ ເພື່ອເຮັດໃຫ້ການແກ້ໄຂຄະດີຂອງສານປະຊາຊົນມີຄວາມວ່ອງໄວ ຖືກຕ້ອງຕາມລະບຽບຂັ້ນຕອນ ຂອງກົດໝາຍທີ່ກຳນົດໄວ້.
ວັນເວລາ ຈັດຕັ້ງການຮຽນ-ການສອນ ແມ່ນ ລະຫວ່າງວັນທີ 16 ມິຖຸນາ - 29ກັນຍາ 2025 ໃນວັນລັດຖະການ (90 ວັນ) ຄື: ໄລຍະຮຽນຕົວຈິງ 70 ວັນເທົ່າກັບ 420 ຊົວໂມງ (ຂຶ້ນຫ້ອງສອນຄົ້ນຄວ້າສໍາມະນາ, ສໍາມະນາລວມຫ້ອງແກ້ຂໍ້ຂອງໃຈ, ສອບເສັງ ແລະ ຂຽນບົດຈົບຊັ້ນ), ເຄື່ອນໄຫວກິດຈະກໍາ ແລະ ທັດສະນະສຶກສາ 6 ວັນ, ອາທິດໜຶ່ງຮຽນ 5 ວັນ ແລະ ສະຖານທີ່ຝຶກອົບຮົມ ສະຖາບັນຄົ້ນຄວ້າ ແລະ ຝຶກອົບຮົມ ສານປະຊາຊົນສູງສຸດ (ບ້ານເມືອງນ້ອຍ ເມືອງໄຊເສດຖາ) ມີຜູ້ເຂົ້າຮ່ວມທັງໜົດຈໍານວນ 40 ສະຫາຍ ຍິງ 19 ສະຫາຍ.
ໃນໂອກາດດັ່ງກ່າວ, ສະຫາຍ ນາງ ວຽງທອງ ສີພັນດອນ ໄດ້ມີຄຳເຫັນບາງຕອນວ່າ: ສູນກາງພັກໄດ້ໃຫ້ຄວາມສໍາຄັນຕໍ່ກັບການຈັດຕັ້ງປະຕິບັດມະຕິ ກໍຄືແນວທາງນະໂຍບາຍຮອບດ້ານຂອງທຸກຂົງເຂດວຽກງານ ເວົ້າສະເພາະໃນລະບົບສານປະຊາຊົນ ທີ່ພວມສະຫຼຸບການຈັດຕັ້ງປະຕິບັດແຜນພັດທະນາລະບົບສານປະຊາຊົນ 5 ປີ 2021-2025 ແລະ ທິດທາງແຜນການ 2026-2030, ພວກເຮົາຕີລາຄາໄດ້ວ່າ ມີບາງນິຕິກໍາ ກໍຍັງບໍ່ທັນເປັນລະບົບຄົບຊຸດ, ບໍ່ທັນລະອຽດ, ການຈັດຕັ້ງເຜີຍແຜ່ເຊື່ອມຊຶມຍັງຊັກຊ້າ, ບໍ່ທັນເລິກເຊິ່ງເຖິງຖອງ ແລະ ບໍ່ຕໍ່ເນື່ອງ, ຍັງບໍ່ທັນທົ່ວເຖິງ ຊຶ່ງສາເຫດທີ່ພາໃຫ້ເກີດສະພາບຄືດັ່ງກ່າວ ແມ່ນມີຫຼາຍປັດໄຈ, ແຕ່ໃນນັ້ນການສຶກສາອົບຮົມການເມືອງ-ແນວຄິດ ໃຫ້ພະນັກງານຫຼັກແຫຼ່ງ ແລະ ຜູ້ເຮັດວຽກງານຕົວຈິງຍັງຈໍາກັດ, ບໍ່ທັນຕອບສະໜອງໄດ້ຕາມຄວາມຕ້ອງການ, ຖັນແຖວພະນັກງານທີ່ເຮັດວຽກການເມືອງ-ແນວຄິດ ຍັງຂາດທັງປະລິມານ ແລະ ຄຸນນະພາບ ເຮັດໃຫ້ການເຄື່ອນໄຫວວິຊາສະເພາະດ້ານວຽກງານແນວຄິດຫຼາຍບ່ອນຍັງບໍ່ແຂງແຮງ, ອັນນັ້ນ ແມ່ນເກີດຈາກຄວາມຮັບຮູ້, ເຂົ້າໃຈ, ເຊື່ອມຊຶມ ຕໍ່ຫຼັກມູນທິດສະດີການເມືອງ, ແນວທາງນະໂຍບາຍບໍ່ທັນໜັກແໜ້ນເປັນຕົ້ນແມ່ນ ປັດຊະຍາມາກ-ເລນິນ, ການກໍ່ສ້າງພັກ, ລັດທິສັງຄົມນິຍົມວິທະຍາສາດ ແລະ ເສດຖະເສດການເມືອງ-ການຄຸ້ມຄອງ ແລະ ອື່ນໆ. ສະນັ້ນ, ການຈັດຊຸດຝຶກອົບຮົມ ທິດສະດີການເມືອງ-ການປົກຄອງຂັ້ນຕົ້ນໃນຄັ້ງນີ້ ຈະເປັນການຍົກລະດັບຄວາມຮັບຮູ້ ແລະ ເຂົ້າໃຈຕໍ່ຫຼັກການ, ທິດສະດີ, ບັນດາກົດເກນພື້ນຖານ ແລະ ຄວາມຮູ້ກ່ຽວກັບເສັ້ນທາງກ້າວຂຶ້ນສັງຄົມນິຍົມ ແລະ ບົດຮຽນການປົກຄອງ ຊຶ່ງມີຄວາມສໍາຄັນຕໍ່ການປະຕິບັດໜ້າທີ່ຂອງພະນັກງານສານປະຊາຊົນ ໂດຍສະເພາະແມ່ນລັດຖະກອນຕຸລາການ, ແມ່ນມີຄວາມຈໍາເປັນຢ່າງພາວະວິໄສ, ເພື່ອສ້າງໃຫ້ມີຄວາມເອກະພາບທາງດ້ານທິດສະດີ, ພຶດຕິກໍາ, ການດໍາເນີນຄະດີ ແລະ ພິພາກສາຄະດີ ບົນພື້ນຖານຄວາມຖືກຕ້ອງຕາມກົດໝາຍ, ຮັບປະກັນຄວາມໂປ່ງໃສ, ມີຄວາມເປັນທໍາ, ນໍາເອົາຄວາມຍຸຕິທໍາມາໃຫ້ປະຊາຊົນ ແລະ ສັງຄົມ ເພາະສິ່ງສໍາຄັນກວ່າໝູ່ແມ່ນຕ້ອງໄດ້ຄໍານຶງເຖິງສິດ ແລະ ຜົນປະໂຫຍດ ອັນຊອບທໍາຂອງພົນລະເມືອງ ເປັນກົກ. ດັ່ງນັ້ນ, ການຝຶກອົບຮົມໃນຄັ້ງນີ້ ບໍ່ສະເພາະແຕ່ເປັນການຝຶກຝົນຫຼໍ່ຫອມທາງດ້ານຄຸນທາດການເມືອງ, ຄຸນສົມບັດ ສິນທໍາປະຕິວັດ, ຈັນຍາບັນ-ຈັນຍາທໍາ ແລະ ຍັງເປັນບັ້ນຝຶກອົບຮົມໜຶ່ງທີ່ທົດສອບຄວາມຮັບຮູ້ ແລະ ເຂົ້າໃຈ ຂອງຜູ້ເຂົ້າຮ່ວມຝຶກອົບຮົມ ອີກດ້ວຍ.
ພ້ອມນັ້ນ, ໄດ້ເນັ້ນໃຫ້ບັນດາສະຫາຍ ຈົ່ງພ້ອມກັນເອົາໃຈໃສ່ປະຕິບັດລະບຽບຂອງການຝຶກອົບຮົມຢ່າງເຂັ້ມງວດທີ່ສຸດ, ເອົາໃຈໃສ່ຕິດຕາມຄໍາອະທິບາຍຂອງຄູ-ອາຈານ, ບັນທຶກ, ຈົດກ່າຍ, ຕັ້ງຄໍາຖາມ ແລະ ຍົກບັນຫາມາສົນທະນາແລກປ່ຽນ ເພື່ອສ້າງຄວາມຮັບຮູ້ໃນລວງເລິກ ແລະ ລວງກວ້າງໄປພ້ອມໆກັນ.
(ຂໍ້ມູນ: ສປສສ - ຂ່າວ: ຕຸໄລເພັດ)
ຄໍາເຫັນ