ໃນວາລະກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 21 ພະຈິກນີ້ ພາຍໃຕ້ການເປັນປະທານຂອງ ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ,ທ່ານ ຄໍາຈັນ ໂສຕາປະເສີດ ປະທານກໍາມາທິການບັນດາຊົນເຜົ່າ ໄດ້ຕາງໜ້າຄະນະປະຈໍາສະພາແຫ່ງຊາດ ປະກອບຄໍາເຫັນຕໍ່ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດວຽກງານສາມສ້າງ ຕາມມະຕິສະພາແຫ່ງຊາດ ສະບັບເລກທີ 02/ສພຊ, ລົງວັນທີ 28 ມັງກອນ 2016.
ທ່ານ ຄໍາຈັນ ໂສຕາປະເສີດ ໄດ້ກ່າວວ່າ: ເຫັນດີເປັນເອກະພາບ ຕໍ່ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດວຽກງານ 3 ສ້າງ ໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ແຕ່ເພື່ອຮັບປະກັນການຈັດຕັ້ງປະຕິບັດວຽກງານດັ່ງກ່າວໃນຕໍ່ໜ້າ ໃຫ້ມີປະສິດທິພາບ ແລະ ປະສິດທິຜົນສູງກວ່າເກົ່າຄະນະປະຈຳສະພາແຫ່ງຊາດຈຶ່ງສະເໜີໃຫ້ລັດຖະບານ ພິຈາລະນາ ແລະ ປັບປຸງແກ້ໄຂ ຫຼາຍບັນຫາດັ່ງນີ້:
ຕັ້ງໜ້າຈັດຕັ້ງຜັນຂະຫຍາຍມະຕິ ສະບັບເລກທີ 05/ຄບສພ ວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່, ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານໃນການນໍາພາຂອງພັກ (ຊຶ່ງຈະໄດ້ກຳນົດຕາແສງເປັນອົງການປົກຄອງທ້ອງຖິ່ນຂັ້ນຕໍ່າສຸດ ແລະ ບ້ານເປັນຫົວໜ່ວຍຊຸມຊົນ);ປັບປຸງບາງມາດຕາຂອງກົດໝາຍທີ່ກ່ຽວຂ້ອງ ຂອງຂະແໜງການກ່ຽວກັບວຽກງານ 3 ສ້າງ ໃຫ້ລະອຽດ, ຮັດກຸມ ໂດຍສະເພາະການກຳນົດໜ້າທີ່ ແລະ ສິດ ຂອງອົງການຄຸ້ມຄອງມະຫາພາກ;ສ້າງເພີ່ມ ຫຼື ປັບປຸງນິຕິກໍາໃຕ້ກົດໝາຍກ່ຽວກັບການແບ່ງຂັ້ນຄຸ້ມຄອງ, ໜ້າທີ່ ແລະ ສິດ ລະອຽດ, ຮັດກຸມ ລະຫວ່າງຂະແໜງການຂັ້ນສູນກາງກັບທ້ອງຖິ່ນ;ສ້າງຕັ້ງຄະນະຮັບຜິດຊອບວຽກງານ 3 ສ້າງ ໂດຍມີທ່ານຮອງນາຍົກລັດຖະມົນຕີເປັນຜູ້ນໍາພາ-ຊີ້ນໍາ ແລະ ກະຊວງພາຍໃນ ເປັນເສນາທິການປະຈຳການ; ຈັດຕັ້ງການປະເມີນຜົນ ແລະ ຕີລາຄາຢ່າງພາວະວິໄສເປັນລະບົບຄົບຊຸດຄືນໃໝ່ ກ່ຽວກັບວຽກງານ 3 ສ້າງ ໂດຍອີງໃສ່ຄາດໝາຍຂອງແຕ່ລະດ້ານ ແລະ ຕົວຊີ້ບອກ ຕາມຄໍາສັ່ງຂອງນາຍົກລັດຖະມົນຕີ ເລກທີ 34/ນຍ, ລົງວັນທີ 23 ສິງຫາ 2016;ປັບປຸງວິທີການ ແລະ ກົນໄກ ໃນການຈັດຕັ້ງປະຕິບັດ, ການແບ່ງຂັ້ນຄຸ້ມຄອງວຽກງານໂຄງການ, ການຄຸ້ມຄອງລາຍຮັບ-ລາຍຈ່າຍ, ວຽກພະນັກງານຕາມສາຍຕັ້ງ-ສາຍຂວາງ ລະຫວ່າງສູນກາງ ກັບແຂວງ, ແຂວງກັບເມືອງ, ເມືອງກັບບ້ານ ໃຫ້ລະອຽດຈະແຈ້ງຂາດຕົວ ແລະ ສາມາດຈັດຕັ້ງປະຕິບັດໄດ້;ຫັນພະນັກງານລົງຊ່ວຍທ້ອງຖິ່ນ ເພື່ອຍົກສູງຄວາມເປັນເຈົ້າການ ແລະ ສາມາດຮອງຮັບວຽກງານຕ່າງໆ ທີ່ສູນກາງມອບໝາຍໃຫ້ແຂວງ, ແຂວງມອບໃຫ້ເມືອງ, ເມືອງມອບໃຫ້ບ້ານ;ສູນກາງເພີ່ມທະວີ ການປະຕິບັດບົດບາດການຄຸ້ມຄອງມະຫາພາກ, ຕິດຕາມກວດກາ ແລະ ຊຸກຍູ້ ທ້ອງຖິ່ນຮາກຖານ ຕາມຂະແໜງການສາຍຕັ້ງຂອງຕົນ, ກຳນົດໜ້າວຽກ ແລະ ກົນໄກການຈັດຕັ້ງປະຕິບັດໃຫ້ລະອຽດ ເພື່ອໃຫ້ທ້ອງຖິ່ນ ມີຄວາມເປັນເອກະພາບໃນຂອບເຂດທົ່ວປະເທດ;ອົງການກວດກາແຫ່ງລັດຂັ້ນສູນກາງ ແລະ ທ້ອງຖິ່ນ, ສະພາແຫ່ງຊາດ, ສະພາປະຊາຊົນຂັ້ນແຂວງຍົກສູງການປະຕິບັດພາລະບົດບາດ, ສິດ, ໜ້າທີ່ ໃນການຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດວຽກງານ 3 ສ້າງ ໃຫ້ມີປະສິດທິພາບ, ປະສິດທິຜົນສູງຂຶ້ນກວ່າເກົ່າ;ສະເໜີນໍາເອົາຜົນການຈັດຕັ້ງປະຕິບັດວຽກງານ 3 ສ້າງ ເຂົ້າໃນບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນແຕ່ລະໄລຍະ.
(ຂ່າວ: ວັນເພັງ, ພາບ: ສຸກສະຫວັນ )
ຄໍາເຫັນ