ສະຫາຍ ຄໍາພັນ ເຜີຍຍະວົງ ກ່າວວ່າ: ນັບແຕ່ສະພາທິດສະດີສູນກາງພັກ ໄດ້ດໍາເນີນກອງປະຊຸມສະຫຼຸບປະຈຳປີ 2023ຜ່ານມາ ເຫັນໄດ້ວ່າມີຜົນງານໃນຫຼາຍດ້ານ ແລະເປັນການປະກອບສ່ວນເຂົ້າໃນການປະຕິບັດພາລະບົດບາດ ຂອງສະພາທິດສະດີສູນກາງພັກ ໂດຍສະເພາະການເປັນເສນາທິການໃຫ້ແກ່ສູນກາງພັກໃນວຽກງານທິດສະດີ ແລະພຶດຕິກຳ.ພາຍຫຼັງກອງປະຊຸມດັ່ງກ່າວ, ເພື່ອເຮັດໃຫ້ສະພາທິດສະດີສູນກາງພັກຂອງພວກເຮົາໄດ້ສືບຕໍ່ດໍາເນີນພາລະບົດບາດ ໂດຍສະເພາະການປັບປຸງດ້ານບຸກຄະລາກອນ, ການແຕ່ງຕັ້ງຮອງປະທານສະພາທິດສະດີສູນກາງພັກ ເພື່ອໃຫ້ຄົບອົງປະກອບ.
ກອງປະຊຸມໃນມື້ນີ້, ມີຄວາມໝາຍສໍາຄັນ ເພື່ອພ້ອມກັນມີຄໍາເຫັນຕໍ່ຮ່າງບົດສະຫຼຸບຕີລາຄາວຽກງານປະຈຳ 6 ເດືອນຕົ້ນປີ 2024 ແລະວາງທິດທາງ, ໜ້າທີ່ວຽກງານ 6 ເດືອນທ້າຍປີຂອງສະພາທິດສະດີສູນກາງພັກ ແນໃສ່ເຮັດໃຫ້ການປະຕິບັດໜ້າທີ່ການເມືອງ ແລະຄວາມຮັບຜິດຊອບ ຂອງສະພາທິດສະດີສູນກາງພັກໄດ້ບັນລຸຜົນສໍາເລັດຕາມລະດັບຄາດໝາຍທີ່ສູນກາງພັກ ໄດ້ມອບໝາຍໃຫ້.
ກອງປະຊຸມ ນອກຈາກຮັບຟັງ ການສະຫຼຸບລາຍງານວຽກງານ ປະຈຳ 6ເດືອນຕົ້ນປີແລ້ວ,ຍັງຈະໄດ້ຜ່ານບົດລາຍງານການກວດແກ້ເນື້ອໃນໂຄງການການເມືອງ ຂອງພັກ ສະບັບປັບປຸງ ຄັ້ງທີ6 ເພື່ອໃຫ້ບັນດາທ່ານທີ່ເຂົ້າຮ່ວມປະກອບຄໍາເຫັນ ແລະຄະນະຮັບຜິດຊອບຈະໄດ້ນໍາໄປປັບປຸງ ເພື່ອລາຍງານໃຫ້ຂັ້ນເທິງຮັບຊາບ. ໃນໂອກາດດັ່ງກ່າວ ທ່ານ ຄໍາພັນ ເຜີຍຍະວົງ ໄດ້ຮຽກຮ້ອງມາຍັງບັນດາທ່ານຮອງປະທານ, ບັນດາສະຫາຍຄະນະປະຈໍາ ແລະ ສະມາຊິກສະພາທິດສະດີສູນກາງພັກ ຈົ່ງໄດ້ສຸມສະຕິປັນຍາໃນການປະກອບຄໍາຄິດຄໍາເຫັນຢ່າງກົງໄປກົງມາ ແລະມີເນື້ອໃນວິທະຍາສາດ ເພື່ອໃຫ້ຄະນະຮັບຜິດຊອບນໍາໄປປັບປຸງໃຫ້ສົມບູນ.
ໃນວາລະປະຊຸມ, ສະຫາຍຄໍາມອນ ຈັນທະຈິດ ຮອງຫົວໜ້າຄະນະໂຄສະນາອົບຮົມສູນກາງພັກຮອງປະທານຜູ້ປະຈຳການສະພາທິດສະດີສູນກາງພັກ ຂຶ້ນລາຍງານສະຫຼຸບ 6ເດືອນຕົ້ນປີ 2024 ແລະແຜນການໃນຕໍ່ໜ້າ ຊຶ່ງໄດ້ຍົກໃຫ້ເຫັນຜົນງານດ້ານດີ, ດ້ານອ່ອນ, ບົດຮຽນທີ່ຖອນຖອນໄດ້ ເປັນຕົ້ນແມ່ນວຽກງານທີ່ພົ້ນເດັ່ນຂອງສະພາທິດສະດີສູນກາງພັກ ຄື:ໃນ 6ເດືອນຜ່ານມາໄດ້ອອກຂໍ້ຕົກລົງ ວ່າດ້ວຍການຄຸ້ມຄອງ ນໍາໃຊ້ງົບປະມານໂຄງການຄົ້ນຄວ້າວິທະຍາສາດລະດັບຊາດ ຂອງສະພາທິດສະດີສູນກາງພັກ; ໄດ້ສ້າງຮ່າງແບບຟອມຕ່າງໆໃນການດໍາເນີນໂຄງການຄົ້ນຄວ້າລະດັບຊາດ ເປັນຕົ້ນຮ່າງບົດວິພາກ ໂຄງການລະດັບຊາດ, ຮ່າງແບບຟອມການຂຽນບົດສະຫຼຸບໂຄງການ ແລະອື່ນໆ, ວຽກງານຮັບຮອງຫົວຂໍ້ຄົ້ນຄວ້າ ແລະຜົນການຄົ້ນຄວ້າ ທິດສະດີ-ພຶດຕິກຳ, ໄດ້ອອກຂໍ້ຕົກລົງ ວ່າດ້ວຍການຮັບຮອງເອົາ 4ຫົວຂໍ້ຄົ້ນຄວ້າລະດັບຊາດທາງດ້ານທິດສະດີ-ພຶດຕິກຳ ຄື: ໜຶ່ງ,ຫົວຂໍ້ ຍຸດທະສາດການພັດທະນາເສດຖະກິດແບບຍືນຍົງເປັນມິດກັບສິ່ງແວດລ້ອມຢ່າງຍາວນານ ແນໃສ່ນໍາພາປະເທດບໍ່ຕົກເຂົ້າໃນແຮ່ວ ຂອງປະເທດລາຍຮັບປານກາງ ໂດຍມອບໃຫ້ຄະນະກຳມະການດ້ານເສດຖະກິດ-ການເງິນ ເປັນຜູ້ຮັບຜິດຊອບ.ສອງ, ຫົວຂໍ້: ດໍາເນີນນະໂຍບາຍການຕ່າງປະເທດແຫ່ງສັນຕິພາບ ແລະການຮ່ວມມື ເພື່ອການພັດທະນາໃນໂລກຫຼາຍຂົ້ວ ໂດຍມອບໃຫ້ຄະນະກຳມະການດ້ານການ ເມືອງ-ຄວາມໝັ້ນຄົງ ເປັນຜູ້ຮັບຜິດຊອບ.ສາມ, ຫົວຂໍ້: ສືບຕໍ່ປົກປັກຮັກສາ ແລະເສີມຂະຫຍາຍວັດທະນະທໍາແຫ່ງຊາດ ສົມທົບກັບ ການຮັບເອົາຄວາມກ້າວໜ້າຈາກວັດທະນະທໍາ ຂອງໂລກ ໂດຍມອບໃຫ້ຄະນະກຳມະການດ້ານວັດທະນະທໍາ-ສັງຄົມ ເປັນຜູ້ຮັບຜິດຊອບ.ສີ່, ຫົວຂໍ້: ພັກນໍາພາໂດຍກົງ, ເດັດຂາດ ແລະຮອບດ້ານ ໂດຍມອບໃຫ້ຄະນະເລຂາທິການວິທະຍາສາດ ເປັນຜູ້ຮັບຜິດຊອບ.
ນອກຈາກນັ້ນ, ກໍໄດ້ຮັບຮອງເອົາຫົວຂໍ້ຄົ້ນຄວ້າໃຫຍ່, ຫົວຂໍ້ຍ່ອຍ ຂອງກອງປະຊຸມສໍາມະນາທິດສະດີ ສອງພັກ ລາວ-ຫວຽດນາມທີ່ ສປປ ລາວ ຈະເປັນເຈົ້າພາບ ພາຍໃຕ້ຫົວຂໍ້ “ການພັດທະນາເສດຖະກິດເອກະລາດ, ເປັນເຈົ້າຕົນເອງ ບົດຮຽນລາວ-ຫວຽດນາມ” ແລະກຳນົດ 4 ຫົວຂໍ້ຍ່ອຍ ຄື: ໜຶ່ງ, ປ່ຽນແປງໃໝ່ຈິນຕະນາການໃນ ການສ້າງພື້ນຖານເສດຖະກິດເອກະລາດ, ເປັນເຈົ້າຕົນຢູ່ ສປປ ລາວ.ສອງ, ເພີ່ມທະວີຄວາມເປັນເຈົ້າການໃນການເຊື່ອມໂຍງເຂົ້າກັບເສດຖະກິດສາກົນ.ສາມ, ຍົກສູງກາລັງຄວາມສາມາດພາຍໃນ ເພື່ອພັດທະນາເສດຖະກິດເອກະລາດ, ເປັນເຈົ້າຕົນເອງ.ສີ່, ປັບປຸງສະພາບ ແວດລ້ອມດໍາເນີນທຸລະກິດ ສ້າງຄວາມໄວ້ເນື້ອເຊື່ອໃນແກ່ນັກລົງທຶນພາຍໃນ ແລະຕ່າງປະເທດ. ປັດຈຸບັນໄດ້ສໍາເລັດການປັບປຸງຮ່າງໂຄງສ້າງ ແລະໄດ້ອອກບົດແນະນໍາກ່ຽວກັບການຂຽນເນື້ອໃນສະຫຼຸບ 40ປີ ແຫ່ງການປ່ຽນແປງໃໝ່ ແລະ ວຽກງານອື່ນໆ.
ໃນຕອນທ້າຍກອງປະຊຸມ ຍັງໄດ້ຮັບຟັງການໂອ້ລົມ ຈາກສະຫາຍ ຄໍາພັນ ເຜີຍຍະວົງ ຊຶ່ງໄດ້ໃຫ້ທິດຊີ້ນໍາໃນການຈັດຕັ້ງເຄື່ອນໄຫວວຽກງານຕ່າງໆ ຊຶ່ງມີເນື້ອໃນສໍາຄັນເປັນພື້ນຖານໃຫ້ແກ່ການຂັບເຄື່ອນຂອງສະພາທິດສະດີສູນກາງພັກ ກໍຄືການເສີມຂະຫຍາຍພາລະບົດບາດ, ໜ້າທີ່ການເມືອງ, ຄວາມຮັບຜິດຊອບຂອງສະພາທິດສະດີສູນກາງພັກ. ສະນັ້ນ, ເພື່ອເຮັດໃຫ້ການປະຕິບັດໜ້າທີ່ວຽກງານຕ່າງໆແຕ່ນີ້ຫາທ້າຍປີ ຊຶ່ງຈະຕ້ອງໄດ້ສຸມໃສ່ ຄື:ຈົ່ງເຊີດຊູສະຕິເປັນເຈົ້າການ ແລະຄວາມຮັບຜິດຊອບ ຂອງຕົນໃນການປະຕິບັດໜ້າທີ່ທີ່ໄດ້ຮັບການມອບໝາຍ ເພື່ອປະກອບສ່ວນເຮັດໃຫ້ສະພາທິດສະດີສູນກາງພັກໄດ້ມີຜົນງານໃໝ່, ມີຜົນສໍາເລັດໃໝ່ຕາມຄາດໝາຍວາງໄວ້, ຄະນະຮັບຜິດຊອບ, ກອງເລຂາ ຈົ່ງໄດ້ນໍາເອົາເນື້ອໃນຈິດໃຈ ຂອງກອງປະຊຸມໃນມື້ນີ້ໄປປັບປຸງບັນດາເອກະສານທີ່ໄດ້ນໍາສະເໜີໃນກອງປະຊຸມ ເພື່ອໃຫ້ມີເນື້ອໃນທີ່ອຸດົມສົມບູນ ພ້ອມກັນນັ້ນກໍກະກຽມເປັນບົດລາຍງານ ເພື່ອລາຍງານໃຫ້ຄະນະເລຂາທິການສູນກາງພັກໄດ້ຮັບຊາບ.
ໃນໂອກາດດັ່ງກ່າວທີ່ປະຊຸມກໍໄດ້ສະເໜີໃຫ້ບັນດາທ່ານສະມາຊິກສະພາທິດສະດີສູນກາງພັກໄດ້ຮັບຊາບວ່າ: ທ່ານກອງແກ້ວ ໄຊສົງຄາມ ກຳມະການສູນກາງພັກປະທານສະຖາບັນວິທະຍາສາດເສດຖະກິດ ແລະສັງຄົມແຫ່ງຊາດ ໄດ້ຮັບການແຕ່ງຕັ້ງໃຫ້ເປັນຮອງປະທານສະພາທິດສະດີສູນກາງພັກຄົນໃໝ່.
ຂ່າວ: ແສງຈັນ
ຄໍາເຫັນ