 |
ທ່ານ ຄໍາຮຸ່ງ ຈັນທະວົງ ກ່າວວ່າ: ນັກສຶກສາຄູພາສາຈີນຈົບຮຸ່ນທໍາອິດ ທັງໝົດ 74 ຄົນ ຍິງ 42. ບັນດານັກສຶກສາທີ່ໄດ້ຮຽນຈົບຫຼັກສູດຄູພາສາຈີນໄປແລ້ວ ໃນອະນາຄົດ ຈົ່ງສືບຕໍ່ຍົກລະດັບຕົນເອງໃຫ້ສູງຂຶ້ນ, ໃນເມື່ອໄດ້ຮຽນຄູພາສາຈີນແລ້ວ ມີບາງຄົນກໍອາດຈະບໍ່ໄດ້ເປັນຄູສອນ ແຕ່ຖ້າຫາກວ່າມີເວລາ ກໍຊ່ວຍສິດສອນນ້ອງ, ຫຼານ ກໍຄື ຜູ້ຄົນອ້ອມຂ້າງໄດ້ຮຽນນໍາ, ສືບຕໍ່ເປັນຄົນດີຂອງຄອບຄົວ, ສັງຄົມ ແລະ ຕັ້ງໜ້າປະກອບສ່ວນໃຫ້ແກ່ສັງຄົມ, ປັດຈຸບັນການຮ່ວມມື ລາວ-ຈີນ ມີຫຼາຍຂະແໜງການ ແລະ ມີຄວາມຕ້ອງການບຸກຄະລາກອນທີ່ມີສີມື. ສະນັ້ນເຖິງແມ່ນວ່າ ຈະຈົບໄປແລ້ວ ປະກອບວຽກງານຢູ່ອົງກອນ, ສະຖາບັນໃດກໍຂໍໃຫ້ເປັນຄົນດີ-ມີຄ່າ, ສະຖາບັນຂົງຈື ຍາມໃດກໍຍັງເປັນເຮືອນຫຼັງທີ 2 ຂອງນັກສຶກສາ ສະຖາບັນຍິນດີຕ້ອນຮັບນັກສຶກສາທຸກໆຄົນ ແລະ ຂໍໃຫ້ສືບຕໍ່ແບ່ງປັນປະສົບການຕໍ່ ໃຫ້ພວກຮຸ່ນນ້ອງນັກສຶກສາຂົງຈືດ້ວຍກັນ.
 |
ທ່ານ ເຟີງກວາງຫົວ ກ່າວວ່າ: ດີໃຈຫຼາຍທີ່ນັກສຶກສາ 2+2 ປະສົບຜົນສໍາເລັດ, ການສ້າງຫຼັກສູດຂອງພວກເຮົາ 2 ປີຮຽນຢູ່ລາວ ແລະ ອີກ 2 ປີ ຮຽນຢູ່ຈີນ ເປົ້າໝາຍ ເພື່ອໃຫ້ເຂົ້າໃຈສະພາບການສຶກສາຂອງມະຫາວິທະຍາໄລຢູ່ຈີນ, ການມີຄວາມເປັນສາກົນ ແລະ ສາມາດເຂົ້າໃຈສະພາບສາກົນໄດ້ຢ່າງຮອບດ້ານ, ຈົບຈາກຂົງຈື 10 ປີ, 20 ປີ ກໍຍັງເປັນສິດຂອງຂົງຈືຄືເກົ່າ ແລະ ຂໍໃຫ້ນັກສຶກສາກໍາໄດ້ 4 ຈຸດ ຄື: 1. ຮູ້ບຸນຄຸນຄູ-ອາຈານ, ໂຮງຮຽນ, ພໍ່, ແມ່ທີ່ໄດ້ຊ່ວຍເຫຼືອເຮົາມາ, 2. ຮູ້ຈັກເປັນສາກົນຕ້ອງປັບຕົວໃຫ້ໄດ້ ເຖິງແມ່ນວ່າ ວັດທະນະທໍາຈະມີຄວາມແຕກຕ່າງກັນ ກໍສາມາດປັບຕົວໃຫ້ໄດ້ ຕ້ອງຮ່ວມມືກັນຢ່າງລົງຕົວ, 3. ຕ້ອງມີນໍ້າໃຈເສຍສະຫຼະ ບາງຄັ້ງກໍຕ້ອງຍອມເສຍປຽບໜ້ອຍໜຶ່ງ ອາດຈະເຮັດໃຫ້ຊີວິດ ຂອງຕົນເດີນທາງໄປໄກ ມີອະນາຄົດທີ່ສົດໃສ ແລະ 4. ໃຫ້ນັກສຶກສາທຸກໆຄົນ ທີ່ສໍາເລັດການສຶກສາໄປແລ້ວ ຕ້ອງຮູ້ຈັກວາງແຜນການສຶກສາເປັນແຕ່ລະໄລຍະ ໂດຍສະເພາະ ແມ່ນວາງແຜນຊີວິດການເປັນຢູ່ແຕ່ລະໄລຍະໃຫ້ດີ ລວມໄປເຖິງ ການແລກປ່ຽນບົດຮຽນອື່ນໆ. ໂອກາດດັ່ງກ່າວ ທ້າວ ແກ້ວມະນີ ມະນີໄຊ ຕາງໜ້ານັກສຶກສາ ກໍໄດ້ຂຶ້ນກ່າວສະແດງຄວາມຮູ້ສຶກ ແລະ ຂອບໃຈ ຮູ້ບຸນຄຸນ ຕໍ່ສະຖາບັນຂົງຈື ມະຫາວິທະຍາໄລແຫ່ງຊາດ ທີ່ຍາມໃດກໍໃຫ້ການຊ່ວຍເຫຼືອ, ສະໜັບສະໜູນ ແລະ ອໍານວຍຄວາມສະດວກ ມາໂດຍຕະຫຼອດ.
 |
ໃນໂອກາດນີ້, ທ່ານ ໂມຢີງທ່າວ (MOYINGTAO) ປະທານບໍລິສັດ ບີວາຍດີ BYD ຍັງໄດ້ມອບເງິນສະໜັບສະໜູນພິທີຊົມເຊີຍດັ່ງກ່າວ ຈໍານວນ 65,000,000 ກີບ ແລະ ໃນຕອນທ້າຍໄດ້ມີພິທີມອບໃບຍ້ອງຍໍ ແລະ ໃບຊົມເຊີຍໃຫ້ແກ່ນັກສຶກສາທີ່ເສັງຈົບ ແລະ ຜູ້ປົກຄອງຂອງນັກສຶກສາທີ່ໄດ້ສະໜັບສະໜູນໃຫ້ລູກມາຮຽນທີ່ສະຖາບັນຂົງຈື ຊຶ່ງຜູ້ປົກນັກສຶກສາກໍກ່າວສະແດງຄວາມຂອບໃຈ ແລະ ຮູ້ບຸນຄຸນຕໍ່ສະຖາບັນຂົງຈື ທີ່ໄດ້ຝຶກຝົນ ສິດສອນໃຫ້ລູກຫຼານກາຍເປັນຄົນຮູ້ຜູ້ເກັ່ງ ນັກສຶກສາຈໍານວນ 74 ຄົນ, ແມ່ນໄດ້ຮັບໃບກຽດຕິຄຸນ, ສ່ວນຜູ້ປົກຄອງ ແມ່ນໄດ້ຮັບໃບຍ້ອງຍໍ.
(ຂ່າວ: ຍຸພິນທອງ))
ຄໍາເຫັນ