 |
ທ່ານ ຄໍາໄພ ສິມມາວັດ ກ່າວວ່າ: ການຈັດພິທີສະເຫຼີມສະຫຼອງວັນຄູແຫ່ງຊາດໃນມື້ນີ້, ກໍເພື່ອລະນຶກເຖິງຄຸນງາມຄວາມດີຂອງຄູ ຜູ້ທີ່ເສຍສະຫຼະ ແລະ ປະຕິບັດໜ້າທີ່ອັນມີກຽດໃຫ້ຄວາມຮູ້ ແລະ ໃຫ້ແສງສະຫວ່າງແກ່ລູກຫຼານຂອງປະຊາຊົນລາວບັນດາເຜົ່າຕະຫຼອດໄລຍະຜ່ານມາ. ພ້ອມນີ້, ຍັງເປັນການລະນຶກເຖິງຄຸນງາມຄວາມດີຂອງຜູ້ບໍລິຫານການສຶກສາ ແລະຄູສອນຂອງແຂວງເຊກອງ ແຕ່ອາດີດຈົນມາຮອດປັດຈຸບັນ ທີ່ໄດ້ເອົາໃຈໃສ່ປະຕິບັດໜ້າທີ່ຂອງຕົນຢ່າງຕັ້ງໜ້າ, ສຸມສະຕິປັນຍາ-ເຫື່ອແຮງ ເຂົ້າໃນການສິດສອນສົ່ງຄວາມຮູ້ໃຫ້ນັກຮຽນ ແລະ ປະກອບສ່ວນພັດທະນາວຽກງານການສຶກສາ ແລະ ກິລາພາຍໃນແຂວງ ໃຫ້ຂະຫຍາຍຕົວຢ່າງກວ້າງຂວາງ ແລະ ມີປະສິດທິພາບ-ປະສິດທິຜົນສູງຂຶ້ນ. ໃນສົກຮຽນ 2024-2025 ທົ່ວແຂວງມີໂຮງຮຽນລ້ຽງເດັກ ອະນຸບານ ແລະ ສາມັນສຶກສາທັງໝົດ 303 ແຫ່ງ ທຽບໃສ່ສົກຮຽນ 2023 - 2024 (ເພີ່ມຂຶ້ນ 2 ແຫ່ງ). ໃນນັ້ນ, ໂຮງຮຽນລ້ຽງເດັກ - ອະນຸບານເພີ່ມຈາກ 34 ແຫ່ງ ມາເປັນ 35 ແຫ່ງ (ເອກະຊົນ 5 ແຫ່ງ); ໂຮງຮຽນປະຖົມ 219 ແຫ່ງ (ເອກະຊົນ 3 ແຫ່ງ), ໂຮງຮຽນມັດທະຍົມຕອນຕົ້ນ 30 ແຫ່ງ ແລະ ໂຮງຮຽນມັດທະຍົມສົມບູນ 19 ແຫ່ງ. ມີນັກຮຽນລ້ຽງເດັກ, ອະນຸບານ, ກຽມປະຖົມ, ກຸ່ມຮຽນຜ່ານການຫຼິ້ນ ແລະ ສາມັນສຶກສາ ທັງໝົດ 33,602 ຄົນຍິງ 16,690 ຄົນ. ໃນນັ້ນ, ເດັກກ່ອນໄວຮຽນ 5,248 ຄົນຍິງ 2,694; ນັກຮຽນປະຖົມ 18,212 ຄົນຍິງ 8,882 ຄົນ; ນັກຮຽນມັດທະຍົມຕອນຕົ້ນ 10,1 42 ຄົນຍິງ 5,114 ຄົນ. ມີຄູສອນປະຈໍາໃນແຕ່ລະຊັ້ນຮຽນລວມທັງໝົດ 1,742 ຄົນຍິງ 915 ຄົນ. ໃນນັ້ນ, ຄູສອນໃນຊັ້ນລ້ຽງເດັກ - ອະນຸບານ 149 ຄົນຍິງ 149 ຄົນ; ຄູສອນໃນຊັ້ນປະຖົມ 990 ຄົນຍິງ 452 ຄົນ; ຄູສອນໃນຊັ້ນມັດທະຍົມ 603 ຄົນຍິງ 314 ຄົນ.
 |
ວຽກງານການສຶກສາ ແລະ ກິລາທີ່ພົ້ນເດັ່ນ ໃນສົກຮຽນຜ່ານມາມີຄື: ຄູສອນ ໄດ້ປະຕິບັດໜ້າທີ່ຂອງຕົນເປັນຢ່າງດີ ແລະມີຜົນສໍາເລັດຫຼາຍດ້ານ, ອັດຕາເຂົ້າຮຽນໃໝ່ສຸດທິ ປ1 ເພີ່ມຂຶ້ນຈາກ 97.5% ມາເປັນ 99.4%; ອັດຕາປະລະຂອງນັກຮຽນ ປ1 ຫຼຸດລົງຈາກ 5.8% ມາເປັນ 4.7%, ອັດຕາຄ້າງຫ້ອງຊັ້ນປະຖົມ ຫຼຸດລົງຈາກ 8.1% ມາເປັນ 6.8%; ອັດຕາເຂົ້າຮຽນຂອງເດັກກຸ່ມອາຍຸ 0-2 ປີ ເພີ່ມຂຶ້ນຈາກ 4.5% ມາເປັນ 4.59%; ອັດຕາລອດເຫຼືອຊັ້ນມັດທະຍົມຕອນຕົ້ນເພີ່ມຂຶ້ນຈາກ 46.7% ມາເປັນ 51.8%; ອັດຕາເລື່ອນຂັ້ນ - ຈົບຊັ້ນມັດທະຍົມຕອນຕົ້ນ ເພີ່ມຂຶ້ນຈາກ 80% ມາເປັນ 83.8%; ນັກຮຽນ ມ4 ແລະ ມ7 ທົ່ວແຂວງ ສາມາດສອບເສັງຈົບຊັ້ນ ໄດ້ 100%; ອັດຕາເຂົ້າຮຽນສຸດທິຊັ້ນມັດທະຍົມຕອນປາຍ ເພີ່ມຂຶ້ນຈາກ 22.7% ມາເປັນ 24.1%; ໄດ້ຝຶກອົບຮົມວິຊາຊີບຂັ້ນພື້ນຖານ ປະຕິບັດໄດ້ 1,190 ຄົນ ທຽບໃສ່ຄາດໝາຍທີ່ສະພາຮັບຮອງ ໄດ້ 90% (ຄາດໝາຍ 1,315 ຄົນ); ໄດ້ຈັດຕັ້ງການຮຽນ-ການສອນລົບລ້າງຄວາມບໍ່ຮູ້ໜັງສືລະດັບ I, II, III ປະຕິບັດໄດ້ 100%; ໄດ້ບຳລຸງຊັ້ນມັດທະຍົມຕອນປາຍ ໃຫ້ປະຊາກອນອາຍຸ 15-30 ປີ ທີ່ປະລະການຮຽນບໍ່ຈົບມັດທະຍົມຕອນປາຍສາຍສາມັນ (ມ.5 - ມ.7) ໄດ້ 289 ຄົນຍິງ 92 ຄົນ ເທົ່າກັບ 57.05% (ແຜນ 510 ຄົນ); ໂຮງຮຽນເຕັກນິກວິຊາຊີບແບບປະສົມແຂວງ ໄດ້ປັບປຸງຄຸນນະພາບດີຂຶ້ນເທື່ອລະກ້າວ ເພື່ອຈະກ້າວເປັນວິທະຍາໄລໃນອະນາຄົດ. ປັດຈຸບັນ ໄດ້ເປີດຮຽນ 9 ສາຂາ, ມີນັກຮຽນເຂົ້າຮຽນທັງໝົດ 319 ຄົນຍິງ 131 ຄົນ. ຈົບສາມັນວິຊາຊີບ ພັກສິ້ນປີຮຽນ ໃນສາຂາປູກຝັງ ແລະ ລ້ຽງສັດຈໍານວນ 50 ຄົນຍິງ 28 ຄົນ; ໄດ້ສົ່ງເສີມມວນຊົນທຸກເພດ-ທຸກໄວເຂົ້າຮ່ວມຫັດກາຍຍະບໍລິຫານ, ອອກກໍາລັງກາຍ, ຫຼິ້ນກິລາປະຕິບັດໄດ້ 50,24%; ຈັດຕັ້ງການຮຽນການສອນສຶກສາວິຊາພື້ນຖານປ້ອງກັນຕົວ ໃນຊັ້ນມັດທະຍົມສຶກສາຕອນປາຍ ໄດ້ 16 ແຫ່ງ ເທົ່າ 84,21%; ຮ່ວມງານມະຫາກຳກິລານັກຮຽນມັດທະຍົມທົ່ວປະເທດ ມີຜູ້ເຂົ້າຮ່ວມ 141 ທ່ານ, ສາມາດຍາດໄດ້ຫຼຽນທັງໝົດ 8 ຫຼຽນຄື: 1 ຫຼຽນຄໍາ, 6 ຫຼຽນເງິນ, 1 ຫຼຽນທອງ ຈັດຢູ່ໃນອັນດັບທີ 16 ຂອງຕາຕະລາງຫຼຽນ; ໄດ້ປະຕິບັດຍ້ອງຍໍນັກຮຽນເສັງຈົບຊັ້ນ ມ7 ໄດ້ຄະແນນ 7 ຂຶ້ນໄປ ມີທັງໝົດ: 462 ຄົນຍິງ 267 ຄົນ; ຄູສອນ ໄດ້ຮັບການຝຶກອົບຮົມຄວາມເຂັ້ມດ້ານທັກສະຕ່າງໆ ທັງພາຍໃນ ແລະ ຕ່າງປະເທດ ມີທັງໝົດ: 1,227 ທ່ານຍິງ 476 ທ່ານ ກວມເອົາ 66.54% ຂອງຄູສອນທົ່ວແຂວງ; ໄດ້ເລື່ອນຊັ້ນເລື່ອນຂັ້ນໃຫ້ລັດຖະກອນທັງໝົດ 1,619 ຄົນຍິງ 784 ຄົນ; ຄູສອນໄດ້ຮັບຕໍາແໜ່ງຄູ ທັງໝົດ 7 ທ່ານ ຍິງ 6 ທ່ານ, ກໍາລັງສະເໜີໃໝ່ ຂໍຕໍາແໜ່ງວິຊາການ ຈໍານວນ 7 ທ່ານ; ມີຄູດີເດັ່ນລະດັບຊາດໄດ້ຮັບລາງວັນຈາກເຈົ້າຟ້າມະຫາຈັກກຣີ ປະເທດໄທ ຄົນທີ 5 ໃນລະດັບອາຊຽນ ມີ 1 ທ່ານ; ຄູສອນດີເດັ່ນປະເພດ 1 ຈໍານວນ 465 ທ່ານ, ຮັບໃບຍ້ອງຍໍຈາກທ່ານ ເຈົ້າແຂວງມີ 690 ທ່ານ; ຮັບຮອງໂຮງຮຽນຕົວແບບຮອບດ້ານ ປະເພດ 1 ມີ 14 ແຫ່ງ; ປະກາດພະແນກສຶກສາທິການ ແລະ ກິລາ, ສູນ ແລະ ໂຮງຮຽນປອດຢາເສບຕິດ ໃນທົ່ວແຂວງ ໄດ້ທັງໝົດ 248 ແຫ່ງ ເທົ່າກັບ 92.88%ຂອງສະຖານການສຶກສາທັງໝົດ.
 |
(ຂ່າວ-ພາບ: ພຸດທະສອນ)
ຄໍາເຫັນ