 |
ເພື່ອສືບຕໍ່ເສີມຂະຫຍາຍຜົນງານດັ່ງກ່າວທີ່ຍາດມາໄດ້ນັ້ນ, ສະຫາຍ ພົນຕີ ພັນແສງ ບຸນພັນ ກຳມະການ
ຄະນະປະຈໍາພັກກະຊວງປ້ອງກັນປະເທດ, ຫົວໜ້າການເມືອງວິທະຍາຄານປ້ອງກັນຊາດໄກສອນ ພົມວິຫານໄດ້ໃຫ້ສໍາພາດວ່າ: ເພື່ອຮັບປະກັນໃຫ້ການກະກຽມເປີດສົກຮຽນໃໝ່ 2025-2026 ນີ້, ວປກ ໄດ້ປັບປຸງໂຄງການຫຼັກສູດການຮຽນ-ການສອນໃຫ້ຮັບການຈັດຕັ້ງປະະຕິບັດ ແລະ ມີປະສິດທິພາບສູງກວ່າເກົ່າ, ພ້ອມນັ້ນ, ຄະນະພັກ-ຄະນະອຳນວຍການໄດ້ສຸມໃສ່ຊີ້ນໍາບາງວຽກຕົ້ນຕໍສຳຄັນຄື: ໂດຍອີງຕາມກົດໝາຍການສຶກສາແຫ່ງຊາດ ສະບັບປັບປຸງເລກທີ 62/ສພຊ, ລົງວັນທີ 19/7/2016, ອີງຕາມມະຕິກອງປະຊຸມໃຫຍ່ຄັ້ງທີ VI ອົງຄະນະພັກກະຊວງປ້ອງກັນປະເທດຄັ້ງວັນທີ 7-8/7/2025 ວ່າດ້ວຍວຽກງານວິທະຍາຄານ-ໂຮງຮຽນທົ່ວກອງທັບ ນັບແຕ່ປີ 2025-2030, ອີງຕາມແຜນການອົບ ຮົມ-ກໍ່ສ້າງ ວປກ ປະຈໍາປີ 2025-2026 ໃຫ້ມີຄຸນນະພາບສູງກວ່າເກົ່າ ຄະນະພັກ-ຄະນະອຳນວຍການ ວປກ ຈຶ່ງໄດ້ຈັດຕັ້ງຄົ້ນຄວ້າປັບປຸງນິຕິກຳໂຄງການຫຼັກສູດການຮຽນ-ການສອນຈໍານວນໜຶ່ງ ເພື່ອໃຫ້ແທດເໜາະກັບສະພາບເງື່ອນ ໄຂຕົວຈິງຂອງຍຸກສະໄໝໃນປັດຈຸບັນ ເປັນຕົ້ນ: ຫຼັກສູກການຮຽນ-ການສອນວຽກງານປ້ອງກັນຊາດ-ປ້ອງກັນຄວາມສະ ຫງົບໃຫ້ການນໍາພັກ-ລັດ (ພະນັກງານນໍາພາ-ຄຸ້ມຄອງ) ຈາກ 45 ວັນມາເປັນ 65 ວັນ, ຫຼັກສູດຍຸດທະບັ້ນຮົບ-ຍຸດທະສາດລະບົບ 1 ປີ, ປັບປຸງເນື້ອໃນການສິດສອນຈໍນວນໜຶ່ງໃຫ້ຖືກຕ້ອງກັບເປົ້າໝາຍ, ຫຼັກສູດປະລິນຍາໂທ-ປະລິນຍາຕີ ແລະ ບັນດາເປົ້າໝາຍຮຽນພື້ນຖານແມ່ນຍັງຮັກສາໄວ້ຄືເກົ່າ ມີແຕ່ປັບປຸງທາງດ້ານເນື້ອໃນຂອງຫຼັກສູດການສິດສອນ ຈໍານວນໜຶ່ງເພື່ອໃຫ້ແທດເໝາະກັບຕົວຈິງ. ພ້ອມນັ້ນ, ໄດ້ປະສົມປະສານກັບການຮຽນແບບຕັ້ງໜ້າທັນສະໄໝກັບເຕັກໂນໂລຊີ, ບັນດາຂໍ້ມູນຂ່າວສານຜ່ານທາງອິນເຕີເນັດ, ເວັບໄຊທີ່ຕິດຕັ້ງຢູ່ບັນດາຫ້ອງຮຽນຈໍານວນໜຶ່ງຂອງວິທະຍາ ຄານ.
 |
ສໍາລັບບຸກຄະລາກອນທີ່ຈະເຂົ້າມາສຶກສາໃນສົກຮຽນ 2025-2026 ນີ້ມີຈໍານວນພົນທັງໝົດ 310 ສະຫາຍ, ມີ 110 ຫ້ອງ, ໂດຍຜ່ານການຄັດເລືອກຈາກບັນດາກຳລັງຫຼວງ-ກຳລັງທ້ອງຖິ່ນ, ຜ່ານອະນຸກຳມະການຄົ້ນຄວ້າຂັ້ນກະ ຊວງເຫັນວ່າຖືກຕ້ອງຕາມເງື່ອນໄຂມາດຖານຂອງວິທະຍາຄານໃນກອງທັບ. ສໍາລັບຖັນແຖວພະນັກງານ-ຄູ-ອາຈານຢູ່ແຕ່ລະຄະນະວິຊາຄູຄື: ຄະນະວິຊາຄູການທະຫານ, ຄູການເມືອງ, ຄູເຫຼົ່າຮົບ, ຄູ-ອາຈານສ່ວນຫຼາຍແມ່ນໄດ້ສຶກສາຮໍ່າຮຽນຢູ່ທັງພາຍໃນ ແລະ ຕ່າງປະເທດ, ມີຄູ-ອາຈານລະດັບການສຶກສາປະລິນຍາເອກກວມເອົາ 20%, ປະລິນຍາໂທກວມເອົາ 40%, ນອກນັ້ນແມ່ນຈົບປະລິນຍາຕີ. ໃນໄລຍະຜ່ານມາ, ວປກ ໄດ້ຈັດຕັ້ງຝຶກອົບຮົມບໍາລຸງຄູໄລຍະສັ້ນ 45 ວັນໃຫ້ຄູໃໝ່ໃນແຕ່ລະປີ ແລະ ໄດ້ຈັດຕັ້ງເອົາຄູລົງຝຶກຫັດຕົວຈິງຢູ່ກົມກອງທ້ອງຖິ່ນໄລຍະ 3 ເດືອນ ນັບແຕ່ເດືອນ 6-8/2025 ເປັນຄັ້ງທໍາອິດ. ນອກນີ້, ວິທະຍາຄານຍັງຈະສືບຕໍ່ນໍາເອົາຄູ-ອາຈານລົງຝຶກຫັດຕົວຈິງຢູ່ກຳລັງຫຼວງ-ກຳລັງທ້ອງຖິ່ນໃຫ້ມີຄວາມຮູ້-ຄວາມສາມາດ, ມີປະສົບການຕົວຈິງເພື່ອມາສິດສິດສອນຢູ່ວິທະຍາຄານໃຫ້ມີຄຸນນະພາບສູງກວ່າເກົ່າ, ໄດ້ຈັດຕັ້ງກວດກາສອບເສັງຄູສອນດີ-ສອນເກັງປະຈໍາປີ 2025 ຈໍານວນ 12 ສະຫາຍ ມາຈາກແຕ່ລະຄະນະວິຊາຄູ ແລະ ຄູ-ອາຈານໄດ້ໄປບໍາລຸງ, ທັດສະນະສຶກສາຢູ່ສສ ຫວຽດນາມ, ສປ ຈີນ, ໄດ້ຈັດຕັ້ງຄົ້ນຄວ້າສໍາມະນາວິທະຍາສາດບັນດາຫົວຂໍ້ນິຕິກຳຕ່າງໆ ຂອງແຕ່ລະຄະນະວິຊາຄູ ແລະ ເຂົ້າຮ່ວມກັບ 5 ວິທະຍາຄານເພື່ອເປັນການຄົ້ນຄວ້າປັບປຸງຫຼັກສູດການຮຽນ-ການສອນໃຫ້ແທດເໝາະກັບແຕ່ລະເປົ້າໝາຍ. ນອກນັ້ນ, ຍັງມີຄູຊຽວຊານຫວຽດນາມ, ຈີນ ແລະ ຣັດເຊຍທີ່ມາສິດສອນຢູ່ ວປກ ຕື່ມອີກ.
 |
ສະຫາຍ ພົນຕີ ພັນແສງ ບຸນພັນ ໃຫ້ຮູ້ຕື່ມວ່າ: ປັດຈຸບັນ ວປກ ໄດ້ກະກຽມຄວາມພ້ອມຮອບດ້ານໄຂສົກຮຽນ 2025-2026 ນີ້ 100% ເພື່ອບັນລຸຜົນສໍາເລັດຕາມແຜນການທີ່ວາງໄວ້, ຮຽກຮ້ອງໃຫ້ຄະນະຮັບຜິດຊອບ, ຄູ-ອາຈານນັກສຶກສາທຸກສະຫາຍ ຕ້ອງເປັນເຈົ້າການປະຕິບັດຂໍ້ກຳນົດ, ກົດລະບຽບຂອງກອງທັບ ກໍຄືຂອງວິທະຍາຄານໃຫ້ເຂັ້ມງວດ, ເພີ່ມທະວີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃນການສຶກສາຮໍ່າຮຽນເພື່ອເຮັດໃຫ້ການຮຽນ-ການສອນສົກຮຽນໃໝ່ນີ້ບັນລຸໄດ້ຈຸດປະສົງຄາດໝາຍທີ່ວາງໄວ້.
ຄໍາເຫັນ