 |
ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນວ ໄດ້ລາຍງານການກະກຽມ ສອບເສັງໃນຄັ້ງນີ້ວ່າ: ນວ ມີໂຮງຮຽນປະຖົມທັງໝົດ 542 ແຫ່ງ, ໃນນັ້ນມີໂຮງຮຽນເອກະຊົນ 209 ແຫ່ງ, ໂຮງ ຮຽນລັດ 333 ແຫ່ງ, ໂຮງຮຽນມັດທະຍົມສຶກສາທັງໝົດ 205 ແຫ່ງ, ໃນນັ້ນມີໂຮງຮຽນເອກະຊົນ 98 ແຫ່ງ, ໂຮງຮຽນລັດ 107 ແຫ່ງ, ໂຮງຮຽນທີ່ມີຊັ້ນ ມ4 ມີ 179 ແຫ່ງ ເພີ່ມຂຶ້ນ 4 ແຫ່ງ, ມີນັກຮຽນ 11,391 ຄົນ ຍິງ 5,988 ຄົນ ແລະ ໂຮງຮຽນທີ່ມີຊັ້ນ ມ7 ຈຳນວນ 118 ແຫ່ງ ເພີ່ມຂຶ້ນ 4 ແຫ່ງ ມີນັກຮຽນ 9,164 ຄົນ ຍິງ 4,755 ຄົນ.
 |
ສຳລັບການສອບເສັງຈົບຊັ້ນ ມ4 ຈະໄດ້ຈັດຂຶ້ນໃນລະຫວ່າງວັນທີ 11-13 ມິຖຸນາ 2025 ແບ່ງອອກເປັນ 29 ສູນສອບເສັງ (ສູນ) ມີນັກສອບເສັງທັງໝົດ 11,921 ຄົນ ຍິງ 5,988 ຄົນ, ມີຫ້ອງສອບເສັງ 558 ຫ້ອງ, ສະເລ່ຍຫ້ອງລະ 20-25 ຄົນ ແຕ່ລະຫ້ອງນັ່ງໂຕະລະ 1 ຄົນ, ກໍາມະການຍາມຫ້ອງທັງໝົດ 1,174 ຄົນ ຊຶ່ງໄດ້ຈັດຢູ່ແຕ່ລະເມືອງດັ່ງນີ້: ເມືອງຈັນທະບູລີມີ 1 ສູນ ຢູ່ສູນ ມສ ວຽງຈັນ, ເມືອງສີໂຄດຕະບອງມີ 5 ສູນ; ເມືອງໄຊເສດຖາມີ 4 ສູນ, ເມືອງສີສັດຕະນາກມີ 3 ສູນ, ເມືອງນາຊາຍທອງມີ 3 ສູນ, ເມືອງໄຊທານີມີ 7 ສູນ, ເມືອງຫາດຊາຍຟອງມີ 2 ສູນ, ເມືອງສັງທອງມີ 1 ສູນຢູ່ສູນ ມສ ສີທອງ; ເມືອງປາກງື່ມມີ 3 ສູນ.
ສ່ວນການສອບເສັງຈົບຊັ້ນ ມ7 ຈະໄດ້ຈັດຂຶ້ນໃນລະຫວ່າງວັນທີ 18-20 ມິຖຸນາ 2025 ແບ່ງອອກເປັນ 22 ສູນ ມີຈໍານວນນັກສອບເສັງທັງໝົດ 9,164 ຄົນ ຍິງ 4,755 ຄົນ, ມີຫ້ອງສອບເສັງ 446 ຫ້ອງ ສະເລ່ຍຫ້ອງລະ 21-25 ຄົນ ແຕ່ລະຫ້ອງນັ່ງໂຕະລະ 1 ຄົນ, ມີກໍາມະການຍາມຫ້ອງທັງໝົດ 1,231 ຄົນ, ໄດ້ຈັດຢູ່ແຕ່ລະເມືອງດັ່ງນີ້: ເມືອງຈັນທະບູລີ ມີ 2 ສູນ, ເມືອງສີໂຄດຕະບອງ ມີ 3 ສູນ, ເມືອງໄຊເສດຖາ ມີ 3 ສູນ, ເມືອງສີສັດຕະນາກ ມີ 2 ສູນ, ເມືອງນາຊາຍທອງ ມີ 2 ສູນ; ເມືອງໄຊທານີ ມີ 6 ສູນ; ເມືອງຫາດຊາຍຟອງ ມີ 1 ສູນ; ເມືອງສັງທອງ ມີ 1 ສູນ; ເມືອງປາກງື່ມ ມີ 2 ສູນ.
 |
ໂອກາດນີ້, ທ່ານເຈົ້າຄອງ ນວ ໄດ້ໃຫ້ກຽດໂອ້ລົມ ພ້ອມເນັ້ນໜັກໃຫ້ຄະນະຮັບຜິດຊອບທຸກພາກສ່ວນ ກໍຄືຄະນະກຳມະການຍາມຫ້ອງສອບເສັງ, ນັກສອບເສັງທັງໝົດ ຈົ່ງເອົາໃຈໃສ່ເບິ່ງແຍງສຸຂະພາບ, ປະຕິບັດລະບຽບການສອບເສັງຢ່າງເຄັ່ງຄັດ, ປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ ໂດຍສະເພາະນັກສອບເສັງທຸກຄົນຈົ່ງພ້ອມກັນຄົ້ນຄວ້າຍາດແຍ່ງຄະແນນການສອບເສັງຄັ້ງນີ້ໃຫ້ໄດ້ຕາມເປົ້າໝາຍທີ່ວາງໄວ້ ເຮັດໃຫ້ການສອບເສັງ ມີຜົນງານໂດດເດັ່ນ ປະກອບສ່ວນສະເຫຼີມສະຫຼອງວັນສຳຄັນຕ່າງໆຂອງພັກ-ຂອງຊາດທີ່ຈະມາເຖິງ.
ແຫຼ່ງຂ່າວ: ວຽງຈັນໃໝ່
ຄໍາເຫັນ