ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ IX ໃນວັນທີ 19 ພະຈິກນີ້ ທີ່ຫໍສະພາແຫ່ງຊາດ ໄດ້ດຳເນີນພາຍໃຕ້ການເປັນປະທານຂອງ ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ; ທ່ານ ນາງ ອໍາໄພວອນ ລ້ອມບຸນແພງ ເລຂາທິການສະພາແຫ່ງຊາດ ໄດ້ຕາງໜ້າຄະນະປະຈໍາສະພາແຫ່ງຊາດ ຂຶ້ນຜ່ານບົດລາຍງາຍການຈັດຕັ້ງປະຕິບັດແຜນການເຄື່ອນໄຫວ 5 ປີ (2021-2025), ປະຈໍາປີ 2025 ຂອງສະພາແຫ່ງຊາດ ຊຸດທີ IX ແລະ ວຽກງານຈຸດສຸມຮອດກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ X, ຮ່າງແຜນການເຄື່ອນໄຫວວຽກງານ 5 ປີ (2026-2030), ປະຈໍາປີ 2026 ຂອງສະພາແຫ່ງຊາດ ຊຸດທີ X.
ທ່ານນາງອໍາໄພວອນລ້ອມບຸນແພງ ກ່າວໃຫ້ຮູ້ຫຼາຍຜົນງານພົ້ນເດັ່ນ ໃນດ້ານນິຕິບັນຍັດ ຊຶ່ງນອກຈາກຜົນງານຂ້າງເທິງນັ້ນ ຊຶ່ງໄດ້ກ່າວວ່າ: ສໍາລັບປີ 2025,ໄດ້ພິຈາລະນາຮັບຮອງເອົາກົດໝາຍ 13 ສະບັບ;ໃນນີ້, ກົດໝາຍສ້າງໃໝ່ 5 ສະບັບແລະກົດໝາຍປັບປຸງ 8 ສະບັບ;ໄດ້ຮັບຄໍາສະເໜີຈາກພາກສ່ວນທີ່ກ່ຽວຂ້ອງໃນການຕີຄວາມໝາຍແລະອະທິບາຍກົດໝາຍທັງໝົດ 15 ບັນຫາຊຶ່ງສາມາດຕີຄວາມໝາຍຫຼືແກ້ໄຂດ້ວຍຮູບການຕ່າງໆສໍາເລັດ 14 ບັນຫາກວມເອົາ 93,33%;ໄດ້ອອກນິຕິກໍາໃຕ້ກົດໝາຍທັງໝົດ 80 ສະບັບ;ໃຫ້ສັດຕະຍາບັນແກ່ສົນທິສັນຍາແລະສັນຍາສາກົນໄດ້ທັງໝົດ 7 ສະບັບ.
ດ້ານການຕົກລົງບັນຫາສໍາຄັນພື້ນຖານຂອງປະເທດຊາດ,ໄລຍະ 5 ປີຜ່ານມາ ໄດ້ດໍາເນີນກອງປະຊຸມສະໄໝສາມັນ ແລະ ສະໄໝວິສາມັນ ຂອງສະພາແຫ່ງຊາດ ໄດ້12 ຄັ້ງ, ພິຈາລະນາຫົວຂໍ້ທັງໝົດ 196 ເນື້ອໃນ ແລະ ຮັບຮອງອອກເປັນມະຕິ 106 ສະບັບ.ປີ 2025,ໄດ້ດໍາເນີນກອງປະຊຸມສະໄໝສາມັນ 2 ຄັ້ງ ແລະ ກອງປະຊຸມສະໄໝວິສາມັນ 1 ຄັ້ງ, ພິຈາລະນາ 26 ເນື້ອໃນ ແລະຮັບຮອງອອກເປັນມະຕິ 26 ສະບັບ; ອັນພົ້ນເດັ່ນ, ໄດ້ພິຈາລະນາຮັບຮອງເອົາການປັບປຸງລັດຖະທໍາມະນູນ ສະບັບປີ 2025 ແລະ ຮັບຮອງເອົາການປັບປຸງກົງຈັກການຈັດຕັ້ງຂອງລັດຖະບານ; ໄດ້ດໍາເນີນກອງປະຊຸມຄະນະປະຈໍາສະພາແຫ່ງຊາດ ທັງໝົດ 60 ຄັ້ງ, ພິຈາລະນາຫົວຂໍ້ທັງໝົດ 768 ເນື້ອໃນ ແລະ ຮັບຮອງອອກເປັນມະຕິ 519 ສະບັບ; ປີ 2025 ໄດ້ດໍາເນີນກອງປະຊຸມຄະນະປະຈໍາສະພາແຫ່ງຊາດ 12 ຄັ້ງ, ກອງປະຊຸມວິສາມັນ 6 ຄັ້ງ, ໄດ້ພິຈາລະນາຫົວຂໍ້ເນື້ອໃນ 131 ເນື້ອໃນ ແລະ ອອກເປັນມະຕິ 91 ສະບັບ.
ດ້ານການຕິດຕາມກວດກາ, ໄດ້ຕິດຕາມກວດກາການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ ແຫ່ງລັດ, ແຜນເງິນຕາ ຕິດພັນກັບການປະຕິບັດສອງວາລະແຫ່ງຊາດ, ການຈັດຕັ້ງປະຕິບັດລັດຖະທໍາມະນູນແລະກົດໝາຍ, ການຈັດຕັ້ງປະຕິບັດມະຕິກົມການເມືອງສູນກາງພັກເລກທີ 112/ກມສພ, ດໍາລັດ 280/ລບ; ການຜັນຂະຫຍາຍເນື້ອໃນກົດໝາຍອອກເປັນນິຕິກໍາໃຕ້ກົດໝາຍ, ການຈັດຕັ້ງປະຕິບັດໂຄງການທົດລອງຂຸດຄົ້ນແຮ່ທາດ, ບັນຫາເສັ້ນທາງຄົມມະນາຄົມຂົນສົ່ງແລະຫົວຂໍ້ອື່ນໆໄດ້ 172 ຄັ້ງ. ພ້ອມກັນນັ້ນ, ຍັງໄດ້ຕິດຕາມກວດກາຢູ່ກອງປະຊຸມສະພາແຫ່ງຊາດດ້ວຍການຊັກຖາມ 490 ຄໍາຊັກຖາມ; ຄະນະປະຈໍາສະພາແຫ່ງຊາດໄດ້ຕິດຕາມກວດກາໂດຍຜ່ານການດໍາເນີນກອງປະຊຸມຮ່ວມລະຫວ່າງຄະນະປະຈໍາກັບພາກສ່ວນຕ່າງໆເພື່ອປຶກສາຫາລືແລະແກ້ໄຂບັນຫາເຄັ່ງຮ້ອນຂອງສັງຄົມ; ໄດ້ຊຸກຍູ້ການໂຄສະນາເຜີຍແຜ່ລັດຖະທໍາມະນູນ, ກົດໝາຍຢູ່ 6 ກະຊວງແລະທ້ອງຖິ່ນ 6 ຄັ້ງກວມເອົາ 13 ແຂວງແລະຍັງໄດ້ຮ່ວມໂຄສະນາເຜີຍແຜ່ລັດຖະທໍາມະນູນ, ກົດໝາຍແລະນິຕິກໍາໃຕ້ກົດໝາຍໄດ້ທັງໝົດ 17 ຄັ້ງຊຶ່ງມີຜູ້ເຂົ້າຮ່ວມທັງໝົດ 1, 631 ຄົນ, ຍິງ 572 ຄົນ; ຕິດຕາມກວດກາການຜັນຂະຫຍາຍມາດຕາຂອງກົດໝາຍອອກເປັນນິຕິກໍາໃຕ້ກົດໝາຍຊຶ່ງມີ 305 ມາດຕາກວມເອົາ 87 ກົດໝາຍ,ສາມາດຜັນຂະຫຍາຍແລ້ວ 46 ມາດຕາ, ກວມເອົາ 10ກົດໝາຍ; ຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍ 5 ຂົງເຂດຄື: ເສດຖະກິດ-ການເງິນ 4 ສະບັບ; ຍຸຕິທໍາ 4 ສະບັບ; ປ້ອງກັນຊາດ-ປ້ອງກັນຄວາມສະຫງົບ 3 ສະບັບ; ວັດທະນະທໍາ-ສັງຄົມ 4 ສະບັບແລະສະພາແຫ່ງຊາດ 4 ສະບັບ.ປີ 2025,ໄດ້ຕິດຕາມກວດກາຫົວຂໍ້ຕ່າງໆໄດ້ທັງໝົດ 31 ຄັ້ງ.
ນອກນັ້ນ, ຍັງໄດ້ຕິດຕາມກວດກາຢູ່ກອງປະຊຸມສະພາແຫ່ງຊາດດ້ວຍການຊັກຖາມ 36 ຄໍາຊັກຖາມ; ໄດ້ຮັບຄໍາຮ້ອງຂໍຄວາມເປັນທໍາຂອງປະຊາຊົນທັງໝົດ 1,700 ສະບັບ, ສາມາດພິຈາລະນາຄໍາຮ້ອງຂໍຄວາມເປັນທໍາໄດ້ 1,400 ສະບັບເທົ່າກັບ 82,35%, ຍັງຄ້າງ 300 ສະບັບທີ່ເຂົ້າມາໃນສະພາແຫ່ງຊາດຊຸດທີIX; ປີ 2025,ໄດ້ຮັບຄໍາຮ້ອງຂໍຄວາມເປັນທໍາ236 ສະບັບແລະພິຈາລະນາແກ້ໄຂໄດ້ 121 ສະບັບ; ໄດ້ຈັດກອງປະຊຸມປຶກສາຫາລືຄໍາຮ້ອງທີ່ມີຄວາມຫຍຸ້ງຍາກກັບພາກສ່ວນກ່ຽວຂ້ອງ 7 ຄັ້ງ, ສາມາດແກ້ໄຂໄດ້ 28 ເລື່ອງ; ຕ້ອນຮັບແລະໃຫ້ຄໍາປຶກສາແກ່ປະຊາຊົນ 424 ເທື່ອຄັ້ງ; ໄດ້ຮັບຄໍາຮ້ອງ, ຄໍາສະເໜີຂອງປະຊາຊົນຜ່ານໂທລະສັບສາຍດ່ວນທັງໝົດ 2,708 ເລື່ອງ, ບັນຫາທີ່ປະຊາຊົນສະເໜີຫຼາຍແມ່ນພົວພັນກັບການຄຸ້ມຄອງບໍລິຫານລັດ, ຄຸ້ມຄອງເສດຖະກິດ-ສັງຄົມບັນຫາສິ່ງແວດລ້ອມແລະອື່ນໆ.
ທ່ານ ນາງ ອໍາໄພວອນລ້ອມບຸນແພງ ຍັງໄດ້ໃຫ້ຮູ້ເຖິງຜົນງານດ້ານການສ້າງຄວາມເຂັ້ມແຂງໃຫ້ສະພາແຫ່ງຊາດ, ການເຄື່ອນໄຫວຂອງສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ການເຄື່ອນໄຫວຕ່າງປະເທດ. ພ້ອມນີ້, ກໍຍັງມີຂໍ້ຄົງຄ້າງຈໍານວນໜຶ່ງ, ສາເຫດດ້ານດີ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້. ນອກນີ້, ກໍໄດ້ໃຫ້ຮູ້ວຍການຈຸດສຸມຮອດກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ X ໃນ 5 ວຽກງາານ ເປັນຕົ້ນການຈັດຕັ້ງການລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ອື່ນໆ. ພ້ອມດຽວກັນ, ກໍໄດ້ຜ່ານຮ່າງແຜນການເຄື່ອນໄຫວວຽກງານ 5 ປີ (2026-2030) ຂອງສະພາແຫ່ງຊາດ ຊຸດທີ X ເປັນຕົ້ນຈະສູ້ຊົນສ້າງ ແລະ ປັບປຸງກົດໝາຍໃຫ້ໄດ້ 90 ສະບັບ (ສ້າງໃໝ່ 20, ປັບປຸງ 70 ສະບັບ).
ສຳລັບແຜນການເຄື່ອນໄຫວວຽກງານປະຈໍາປີ 2026 ຂອງສະພາແຫ່ງຊາດ ຊຸດທີ X, ທ່ານ ນາງ ອໍາໄພວອນລ້ອມບຸນແພງ ໄດ້ໃຫ້ຮູ້ວ່າ: ດ້ານນິຕິບັນຍັດ ຈະປັບປຸງແຜນການສ້າງ ແລະ ປັບປຸງກົດໝາຍ 5 ປີ ໃຫ້ມີຄວາມສອດຄ່ອງ; ກຳນົດແຜນການສ້າງ ແລະ ປັງປຸງກົດໝາຍ ປະຈໍາປີ 2026 ໃຫ້ໄດ້ 18 ສະບັບ; ໃນນີ້, ກົດໝາຍສ້າງໃໝ່ 2 ສະບັບ ແລະ ປັບປຸງ 16 ສະບັບ. ພ້ອມນີ້, ກໍມີແຜນການໃນດ້ານການຕົກລົງບັນຫາສໍາຄັນພື້ນຖານຂອງປະເທດຊາດ, ການຕິດຕາມກວດກາ, ການສ້າງຄວາມເຂັ້ມແຂງໃຫ້ສະພາແຫ່ງຊາດ, ການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ການເຄື່ອນໄຫວຕ່າງປະເທດ.
(ຂ່າວ: ສຸກສະຫວັນ, ພາບ: ບຸນຕອມ)
ຄໍາເຫັນ