(ສພຊ). ກອງປະຊຸມກວດກາເນື້ອໃນຮອບດ້ານຮ່າງກົດໝາຍວ່າດ້ວຍຜູ້ພິພາກສາ (ສະບັບປັບປຸງ) ໄດ້ມີຂຶ້ນໃນວັນທີ 24 ກັນຍາ ນີ້ ທີ່ເມືອງແກ້ວອຸດົມ ແຂວງວຽງຈັນ ໂດຍການເປັນປະທານຂອງທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ; ເຂົ້າຮ່ວມມີທ່ານ ຄຳແພງ ວິລະພັນ ປະທານກຳມາທິການຍຸຕິທຳ, ບັນດາທ່ານ ຮອງປະທານກຳມາທິການກົດໝາຍ, ຮອງປະທານກຳມາທິການຍຸຕິທຳ, ຮອງປະທານສານປະຊາຊົນສູງສຸດ, ຮອງລັດຖະມົນຕີກະຊວງຍຸຕິທຳ, ຮອງຫົວໜ້າຫ້ອງວ່າການສຳນັກງານປະທານປະເທດ, ຮອງຫົວໜ້າອົງການໄອຍະການປະຊາຊົນສູງສຸດ, ບັນດາທ່ານຄະນະທີ່ປຶກສາທາງດ້ານກົດໝາຍຂອງຄະນະປະຈຳສະພາແຫ່ງຊາດ, ທ່ານຜູ້ຕາງໜ້າ ກົມກົດໝາຍກະຊວງຍຸຕິທຳ, ກົມນິຕິກໍາຫ້ອງວ່າການສໍານັກງານນາຍົກລັດຖະມົນຕີ, ກົມກົດໝາຍຫ້ອງວ່າການສຳນັກງານປະທານປະເທດ, ຫົວໜ້າກົມ, ຮອງຫົວໜ້າກົມ ແລະ ພະນັກງານ-ລັດຖະກອນ.
ໂອກາດດັ່ງກ່າວ, ທ່ານ ນາງ ສູນທອນ ໄຊຍະຈັກ ໄດ້ກ່າວເປີດກອງປະຊຸມ ຊຶ່ງທ່ານກ່າວວ່າ: ກົດໝາຍວ່າດ້ວຍຜູ້ພິພາກສາ (ສະບັບປັບປຸງ) ທີ່ສານປະຊາຊົນສູງສຸດ ໄດ້ສະເໜີຫາຄະນະປະຈຳສະພາແຫ່ງຊາດ ຕາມໜັງສືສະເໜີຂອງສານປະຊາຊົນສູງສຸດ ສະບັບເລກທີ 1056/ສປປສ, ລົງວັນທີ 30 ສິງຫາ 2023, ກ່ອນທີ່ຈະສະເໜີຮ່າງກົດໝາຍສະບັບນີ້ຫາຄະນະປະຈຳສະພາແຫ່ງຊາດ ໃນຄັ້ງນີ້, ສານປະຊາຊົນສູງສຸດ ກໍໄດ້ສົມທົບກັບພາກສ່ວນທີ່ກ່ຽວຂ້ອງ ດຳເນີນການຄົ້ນຄວ້າປັບປຸງຕາມຂັ້ນຕອນຂອງການສ້າງ ແລະ ປັບປຸງກົດໝາຍ ຕາມກົດໝາຍວ່າດ້ວຍການສ້າງນິຕິກຳ. ສະນັ້ນ, ການຈັດກອງປະຊຸມໃນຄັ້ງນີ້ຈຶ່ງມີຄວາມໝາຍຄວາມສໍາຄັນຫຼາຍ ເພາະຈະເປັນການເອົາການສັງລວມການປະກອບຄຳຄິດຄຳເຫັນ, ການຄົ້ນຄວ້າເນື້ອໃນຂອງຮ່າງກົດໝາຍຢ່າງລະອຽດ,ຮອບດ້ານ ແນໃສ່ເຮັດໃຫ້ຮ່າງກົດໝາຍມີເນື້ອໃນທີ່ຄົບຖ້ວນ, ຮັດກຸມ ແລະ ສາມາດນຳເຂົ້າພິຈາລະນາຮັບຮອງເອົາໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX.
ໃນກອງປະຊຸມ, ທ່ານ ອານົງ ຍອຍສາຍຄຳ ຮອງປະທານສານປະຊາຊົນສູງສຸດ ໄດ້ຂຶ້ນຜ່ານບົດສະເໜີການປັບປຸງ ກ່ຽວກັບກົດໝາຍວ່າດ້ວຍຜູ້ພິພາກສາ ໂດຍໄດ້ຍົກໃຫ້ເຫັນສະພາບການຈັດຕັ້ງປະຕິບັດໄລຍະຜ່ານມາ, ເຫດຜົນ ແລະ ຄວາມຈຳເປັນໃນການປັບປຸງກົດໝາຍ, ຂະບວນການຄົ້ນຄວ້າປັບປຸງກົດໝາຍ, ໂຄງປະກອບ ແລະ ເນື້ອໃນສຳຄັນຂອງຮ່າງກົດໝາຍ ແລະ ອື່ນໆ; ຈາກນັ້ນ, ຄະນະຮັບຜິດຊອບປັບປຸງກົດໝາຍ ແລະ ບັນດາທ່ານທີ່ເຂົ້າຮ່ວມກອງປະຊຸມ ໄດ້ພ້ອມກັນຄົ້ນຄວ້າ, ປະກອບຄໍາເຫັນ ແລະ ເປັນເອກະພາບກັນໃສ່ຮ່າງກົດໝາຍວ່າດ້ວຍຜູ້ພິພາກສາ (ສະບັບປັບປຸງ) ຢ່າງກົງໄປກົງມາ ຊຶ່ງປະກອບມີ XII ພາກ, 12 ໝວດ (ເພີ່ມ 2 ໝວດ) ແລະ 69 ມາດຕາ (ເພີ່ມ 7 ມາດຕາ, ປັບປຸງ 46 ມາດຕາ ແລະນັງຮັກສາຄືເກົ່າ 16 ມາດຕາ) ເພື່ອເຮັດໃຫ້ເນື້ອໃນຂອງກົດໝາຍດັ່ງກ່າວ ຄົບຖ້ວນ ແລະ ສອດຄ່ອງກັບລັດຖະທຳມະນູນ, ກົດໝາຍ ອື່ນໆທີ່ປະກາດໃຊ້ແລ້ວ, ສົນທິສັນຍາ, ສັນຍາສາກົນທີ່ກ່ຽວຂ້ອງ ແລະ ການຈັດຕັ້ງປະຕິບັດຕົວຈິງ. ກອງປະຊຸມຄັ້ງນີ້ ໄດ້ຮັບການສະໜັບສະໜູນໂດຍມູນນິທິເອເຊຍ ປະຈຳ ສປປລາວ.
ຂ່າວ: ກຸກກິກ
ຄໍາເຫັນ