 |
ທ່ານ ຄູນ ຜາສຸກ ໄດ້ກ່າວວ່າ: ການກໍ່ສ້າງລັດແຫ່ງນິຕິກໍາ ແມ່ນໜຶ່ງໃນພາລະກິດສໍາຄັນຂອງພັກ ແລະ ລັດ ໂດຍມຸ່ງເນັ້ນໃຫ້ການບໍລິຫານລັດ, ການບໍລິຫານສັງຄົມ ແລະ ການຄຸ້ມຄອງສິດ ແລະ ຜົນປະໂຫຍດອັນຊອບທໍາຂອງປະຊາຊົນ ຕ້ອງດໍາເນີນໄປຕາມກົດໝາຍ. ການດໍາເນີນຄະດີແພ່ງ ເປັນກົນໄກສໍາຄັນໃນການຮັບປະກັນໃຫ້ການແກ້ໄຂຂໍ້ຂັດແຍ່ງທາງແພ່ງ ເປັນໄປຢ່າງຍຸຕິທໍາ, ໂປ່ງໃສ, ທັນເວລາ ແລະ ສອດຄ່ອງກັບຫຼັກນິຕິກຳ. ກົດໝາຍວ່າດ້ວຍ ການດໍາເນີນຄະດີແພ່ງ ສະບັບປັບປຸງ ປີ 2024 ໄດ້ຮັບການປັບປຸງເນື້ອໃນຫຼາຍດ້ານ ເພື່ອແກ້ໄຂຂໍ້ຈໍາກັດໃນການນໍາໃຊ້ກົດໝາຍສະບັບເກົ່າ, ປັບປຸງຂັ້ນຕອນໃຫ້ມີຄວາມຊັດເຈນ, ສະດວກ, ຮັດກຸມ ແລະ ມີປະສິດທິຜົນຫຼາຍຂຶ້ນ ພ້ອມທັງຮັບປະກັນ ການຄຸ້ມຄອງສິດ ແລະ ຜົນປະໂຫຍດອັນຊອບທໍາຂອງຄູ່ຄວາມ ແລະ ຜູ້ທີ່ກ່ຽວຂ້ອງ.
 |
ກອງປະຊຸມຄັ້ງນີ້ ຈຶ່ງມີຄວາມສໍາຄັນຫຼາຍ ເພື່ອໃຫ້ຜູ້ປະຕິບັດໜ້າທີ່ ໂດຍສະເພາະພະນັກງານສານປະຊາຊົນ, ຜູ້ປະກອບວິຊາຊີບດ້ານກົດໝາຍ ແລະ ຜູ້ກ່ຽວຂ້ອງ ໄດ້ຮັບຮູ້ ແລະ ເຂົ້າໃຈ ບັນດາຫຼັກການໃໝ່, ບັນດາຂັ້ນຕອນ ແລະ ຂໍ້ກໍານົດຕ່າງໆ ຂອງກົດໝາຍຢ່າງຖືກຕ້ອງ ແລະ ເປັນເອກະພາບ. ຈຸດປະສົງ ເພື່ອໃຫ້ຜູ້ເຂົ້າຮ່ວມມີຄວາມເຂົ້າໃຈຢ່າງເລິກເຊິ່ງ ກ່ຽວກັບເນື້ອໃນໃໝ່, ເນື້ອໃນມາດຕາປັບປຸງ ແລະ ມາດຕະການຕ່າງໆທີ່ໄດ້ກໍານົດໄວ້ໃນກົດໝາຍສະບັບປັບປຸງ; ເພື່ອສ້າງຄວາມເຂົ້າໃຈທີ່ເປັນເອກະພາບ ລະຫວ່າງສານປະຊາຊົນ, ອົງການໄອຍະການປະຊາຊົນ, ເຈົ້າໜ້າທີ່ ແລະ ພາກສ່ວນກ່ຽວຂ້ອງ ໃນທ້ອງຖິ່ນ ແລະ ເພື່ອຍົກສູງຄຸນນະພາບການແກ້ໄຂຄະດີແພ່ງ ໃຫ້ມີຄວາມຍຸຕິທໍາ ແລະ ຮັບໃຊ້ປະຊາຊົນໄດ້ຢ່າງມີປະສິດທິພາບ.
ຂ່າວ: ຍຸພິນທອງ
ຄໍາເຫັນ