ສ​ສກ ເລີ່ມສຶກສາ ຄົ້ນຄວ້າ ການຮຽນຮ່ວມຂອງນັກຮຽນພິການ

ກອງປະຊຸມ ດັ່ງກ່າວ ຈັດຂຶ້ນໃນວັນທີ 17 ສິງຫານີ້ ທີ່ ນເຄອນຫຼວງວຽງຈັນ ໂດຍການເປັນປະທານຂອງ ທ່ານ ລຳພູນ ຫຼວງໄຊ ຫົວໜ້າກົມພັດທະນາຄູ ແລະ ທ່ານ ນາງ ເຣເບັກກາ ແມັກຮິວ ຫົວໜ້າແຜນງານບີຄວາ, ມີພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, ຜູ້ເຂົ້າຮ່ວມກອງປະຊຸມໄດ້ປະກອບຄຳເຫັນຕໍ່ວິທີການສຶກສາຄົ້ນຄວ້າ, ປຶກສາຫາລືກ່ຽວກັບເຄື່ອງມື, ໄລຍະເວລາ ແລະ ເພື່ອຕົກລົງເປັນເອກະພາບກັນກ່ຽວກັບ ພາລະບົດບາດ ແລະ ໜ້າທີ່ຂອງທຸກພາກສ່ວນທີ່ກ່ຽວຂ້ອງ ກ່ອນທີ່ຈະເລີ່ມຕົ້ນການຈັດຕັ້ງປະຕິບັດ.

ການສຶກສາຄົ້ນຄວ້າດັ່ງກ່າວ ຈະໄດ້ດຳເນີນກໍລະນີສຶກສາຂະໜາດນ້ອຍຂອງໂຮງຮຽນປະຖົມ ໃນເມືອງຄູນ ແຂວງຊຽງຂວາງ ຕະຫຼອດສົກຮຽນ 2026–2027, ຈະມີນັກຮຽນທີ່ມີຄວາມພິການ 18 ຄົນເຂົ້າຮ່ວມ, ພ້ອມດ້ວຍຄູໃນໂຮງຮຽນ ແລະ ຊຸມຊົນຂອງໂຮງຮຽນເພື່ອຄົ້ນຫາບັນດາຫຼັກຖານ ການດຳເນີນງານກ່ຽວກັບ ວິທີການທີ່ເຮັດໄດ້ດີຈາກຊຸດອຸປະກອນຊ່ວຍເຫຼືອຄູໂມດູນທີ 14 ໃນສະພາບແວດລ້ອມຫ້ອງຮຽນຕົວຈິງ ແລະ ສິ່ງທີ່ຊ່ວຍຄູໃຫ້ນຳໃຊ້ໄດ້ຢ່າງຕໍ່ເນື່ອງ.

ທ່ານ ລຳພູນ ຫຼວງໄຊ ໄດ້ກ່າວວ່າ: “ການສຶກສາຄົ້ນຄວ້ານີ້ ເປັນບາດກ້າວທີ່ສຳຄັນໃນການປັບປ່ຽນເຄື່ອງມືເພື່ອການສຶກສາຮຽນຮ່ວມອັນໃໝ່ໃຫ້ກາຍເປັນການສະໜັບສະໜູນການຮຽນໃນຫ້ອງຮຽນແບບປະຕິບັດໄດ້ຈິງສຳລັບຄູ. ຊຸດອຸປະກອນຊ່ວຍເຫຼືອຄູ (TSP) ທີ 14 ແລະ ວິດີໂອພັດທະນາຄູ (TDV) ທີ 29 ໄດ້ພັດທະນາສຳເລັດແລ້ວ ແລະ ພ້ອມທີ່ຈະທົດລອງໃນໂຮງຮຽນ ໂດຍການຮວບຮວມເອົາທັງສອງເຄື່ອງມືນີ້ ຈະຊ່ວຍໃຫ້ຄູຮັບຮູ້ໄດ້ດີຂຶ້ນ, ວິທີການປະຕິບັດທີ່ງ່າຍ ແລະ ໃຊ້ໄດ້ຈິງເພື່ອຊ່ວຍເຫຼືອ ນັກຮຽນໃນການຮຽນຮູ້ໃນຫ້ອງຮຽນ. ການສຶກສາຄົ້ນຄວ້ານີ້ ຈະໄດ້ດຳເນີນທີ່ແຂວງຊຽງຂວາງ, ຄາດວ່າຈະຊ່ວຍໃຫ້ຮຽນຮູ້ເຖິງ ວິທີການໃດທີ່ແນະນຳໃນເຄື່ອງມື ສາມາດປະຕິບັດຕົວຈິງໄດ້ໃນໂຮງຮຽນ ແລະ ວິທີທີ່ໃດທີ່ຈະຕ້ອງໄດ້ປັບປຸງຕື່ມ ເພື່ອຊ່ວຍໃຫ້ນັກຮຽນທຸກຄົນສາມາດຮຽນຮູ້ໄດ້.”

ທ່ານ ນາງ ເຣເບັກກາ ແມັກຮິວ ກ່າວວ່າ: “ເມື່ອເດັກພິການ ໄດ້ຮັບໂອກາດໃນການຮຽນຮູ້ ເຊັ່ນ: ການອ່ານ, ການຂຽນ ແລະ ສ້າງທັກສະພື້ນຖານທີ່ເຂັ້ມແຂງ, ເຂົາເຈົ້າຈະໄດ້ຮຽນຮູ້ທັກສະທີ່ຈຳເປັນສຳລັບອານາຄົດ. ທັກສະເຫຼົ່ານີ້ ຈະຊ່ວຍໃຫ້ ເຂົາເຈົ້າຊອກຫາວຽກເຮັດງານທຳໄດ້ໃນອານາຄົດ, ສາມາດປະກອບສ່ວນແກ່ຄອບຄົວ ແລະ ຊຸມຊົນທ້ອງຖິ່ນ, ພ້ອມທັງ ເຕີບໃຫຍ່ໃນສັງຄົມທີ່ມີຄວາມຫ້າວຫັນ. ລັດຖະບານອົດສະຕຣາລີ ມີຄວາມພູມໃຈທີ່ໄດ້ສະໜັບສະໜູນກະຊວງສຶກສາທິການ ແລະ ກິລາ ໃນການສົ່ງເສີມການສຶກສາຮຽນຮ່ວມ ທີ່ສາມາດປະຕິບັດໄດ້ຈິງຫຼາຍຂຶ້ນສຳລັບຄູ ແລະ ມີປະສິດທິພາບຫຼາຍຂຶ້ນສຳລັບນັກຮຽນທຸກຄົນ.”

ຊຸດອຸປະກອນຊ່ວຍເຫຼືອຄູ ໂມດູນທີ 14 ແນະນໍາທີການ ທີ່ໃຊ້ໄດ້ຕົວຈິງແກ່ຄູ ເພື່ອຊ່ວຍເຫຼືອນັກຮຽນທີ່ມີຄວາມຫຍຸ້ງຍາກໃນການຮຽນໃນການສອນແຕ່ລະວັນ. ເອກະສານລວມມີ ເຄື່ອງມືທີ່ໃຊ້ໄດ້ງ່າຍ ທີ່ຊ່ວຍຄູໃຫ້ສັງເກດເຫັນຄວາມຕ້ອງການຄວາມຊ່ວຍເພື່ອໃຫ້ນັກຮຽນສາມາດຮຽນຮູ້, ສາມາດວາງແຜນການສອນ ສຳລັບບຸກຄົນ ແລະ ດັດປັບການສອນໃນຫ້ອງຮຽນຕາມວິທີທີ່ປະຕິບັດໄດ້ຈິງ ແລະ ງ່າຍຕໍ່ການນຳໃຊ້. ວິດີໂອ ພັດທະນາຄູທີ 29 ເປັນວິດີໂອເສີມທີ່ໄດ້ສະແດງໃຫ້ເຫັນສິ່ງທີ່ເກີດຂຶ້ນໃນຫ້ອງຮຽນທີ່ສາມາດສັງເກດເຫັນໄດ້ ເຊິ່ງອາດຈະຊີ້ບອກວ່າ ເດັກມີຄວາມພິການ ແລະ ຄູສາມາດຮຽນຮູ້ກ່ຽວກັບວິທີການ ທີ່ສາມາດນຳໃຊ້ ເຄື່ອງມືປະເມີນຄວາມຫຍຸ້ງຍາກໃນການຮຽນຮູ້ ສຳລັບຄູ. ວິດີໂອດັ່ງກ່າວໄດ້ຮັບການອອກແບບມາ ເພື່ອຊ່ວຍຄູໃນການສັງເກດລັກສະນະທ່າທາງຢ່າງລະອຽດ ແລະ ປະຕິບັດຂັ້ນຕອນຕໍ່ໄປ ເພື່ອເຂົ້າໃຈ ແລະ ຮູ້ວິທີປະຕິບັດເພື່ອຊ່ວຍຕອບສະໜອງຄວາມຕ້ອງການ ການຮຽນຮູ້ຂອງເດັກແຕ່ລະຄົນໃຫ້ດີຂຶ້ນ.

ການສຶກສາຄົ້ນຄວ້ານີ້ ຈະໃຊ້ຮູບແບບການຮຽນຮູ້ແບບປະສົມປະສານ ແລະ ອີງໃສ່ກໍລະນີສຶກສາ. ລວມມີ: ການສັງເກດການສອນໃນຫ້ອງຮຽນ, ຄູຕື່ມແບບຟອມ, ແຜນການຮຽນຮູ້, ຂໍ້ມູນການຕິດຕາມປະເມີນຜົນ, ການສຳພາດ ແລະ ການສົນທະນາກຸ່ມ ທີ່ເນັ້ນເຖິງ ວິທີເພື່ອຊ່ວຍໃຫ້ເຂົ້າໃຈວິທີທີ່ຄູນຳໃຊ້ເຄື່ອງມືໃນການຈັດຕັ້ງປະຕິບັດ. ການສຶກສາ ຄົ້ນຄວ້ານີ້ຍັງຈະສຶກສາເຖິງ ການມີສ່ວນຮ່ວມຂອງພໍ່ແມ່, ການໄດ້ຮັບຄຳແນະນຳ ແລະ ການສະໜັບສະໜູນທີ່ມີຢູ່ຜ່ານລະບົບຂອງໂຮງຮຽນ ແລະ ຂັ້ນເມືອງ.

ຕະຫຼອດສົກຮຽນ, ການສຶກສາຄົ້ນຄວ້າ ການທົດລອງນຳໃຊ້ເຄື່ອງມືນີ້ຈະມີການສະທ້ອນຄືນ ແລະ ການດັດປັບຫຼາຍຄັ້ງ ເພື່ອໃຫ້ສິ່ງທີ່ໄດ້ຮຽນຮູ້ໃນຕອນຕົ້ນ ສາມາດນຳໃຊ້ເພື່ອປັບປຸງການຈັດຕັ້ງປະຕິບັດ, ໃນຂະນະທີ່ ໜ້າວຽກຍັງດຳເນີນໄປປົກກະຕິ. ວິທີການແບບປະຕິບັດຊໍ້າຄືນນີ້ ຈະຊ່ວຍໃຫ້ ກະຊວງສຶກສາທິການ ແລະ ກິລາ (ສສກ) ແລະ ແຜນງານບີຄວາ ໄດ້ຮຽນຮູ້ວ່າເຄື່ອງມືເຫຼົ່ານີ້ມີປະໂຫຍດຫຼືບໍ່ ເທົ່ານັ້ນ, ແຕ່ຍັງຕ້ອງມີເງື່ອນໄຂໃດອີກແດ່ ເພື່ອໃຫ້ເຄື່ອງມືເຫຼົ່ານີ້ໄດ້ນຳໃຊ້ຢ່າງມີປະສິດທິພາບ ແລະ ຍືນຍົງ.

ການສຶກສາຄົ້ນຄວ້າຍັງຈະຊ່ວຍລະບຸເຖິງ ອຸປະສັກຕໍ່ການຮຽນຮູ້ ທີ່ສາມາດແກ້ໄຂໄດ້ໂດຍຜ່ານການປັບປຸງການສອນໃນໂຮງຮຽນ ແລະ ການອຳນວຍຄວາມສະດວກທີ່ເໝາະສົມ ແລະ ອຸປະສັກໃດ ທີ່ຕ້ອງການໃຫ້ການຊ່ວຍເຫຼືອທີ່ກວ້າງຂວາງຂື່້ນເຊັ່ນ: ການໃຫ້ຄຳແນະ, ການນຳໃຊ້ວິທີການຊ່ວຍເຫຼືອທີ່ທັນສະໄໝ, ການຟື້ນຟູສຸຂະພາບ ຫຼື ການບໍລິການອື່ນໆ.

ຂ່າວ: ສສກ