ພິທີເປີດຊຸດຝຶກອົບຮົມໄດ້ຈັດຂຶ້ນໃນວັນທີ 23 ກັນຍາຜ່ານມາ, ທີ່ເມືອງແກ້ວອຸດົມ ແຂວງວຽງຈັນ ໃຫ້ກຽດເຂົ້າຮ່ວມ ແລະ ເປັນປະທານ ໂດຍທ່ານ ສຸວັນ ຄູນດາລາ ຮອງຜູ້ອຳນວຍການໃຫຍ່ວິທະຍຸກະຈາຍສຽງແຫ່ງຊາດລາວ, ມີທ່ານ ໂອລົດ ແສນອາສາ ຜູ້ຕາງໜ້າອົງການສະຫະປະຊາຊາດ ກອງທຶນສຳລັບປະຊາກອນ (UNFPA) ທັງເປັນຜູ້ຮັບຜິດຊອບແຜນງານໄວໜຸ່ມ UNFPA ພ້ອມດ້ວຍສື່ອ້ອມຂ້າງສູນກາງ ແລະ ສື່ມວນຊົນຕາງໜ້າຈາກສອງແຂວງຜົ້ງສາລີ ແລະ ແຂວງບໍລິຄຳໄຊ ເຂົ້າຮວ່ມ.
ກອງປະຊຸມຄັ້ງນີ້, ຈັດຂຶ້ນເພື່ອຍົກລະດັບຄວາມຮູ້-ຄວາມສາມາດໃຫ້ບັນດາສື່ມວນຊົນອ້ອມຂ້າງສູນກາງ ແລະ ຈາກ 2 ແຂວງ ເພື່ອນຳສະເໜີຂໍ້ມູນຂ່າວສານກ່ຽວກັບວຽກງານເພດສຶກສາ ໃຫ້ຊາວໜຸ່ມ-ໄວໜຸ່ມໄດ້ຮັບຮູ້ ແລະ ເຂົ້າໃຈກ່ຽວກັບວິທີປ້ອງກັນຕົນເອງ ກ່ຽວກັບເພດສຶກສາໃຫ້ຫຼາຍຂຶ້ນ. ເພາະປັດຈຸບັນເກີດຜົນກະທົບທີ່ຫຼາຍທີ່ສຸດແມ່ນໄວໜຸ່ມ.
ກອງປະຊຸມໄດ້ມີການນໍາສະເໜີພາບລວມ ກ່ຽວກັບວຽກງານເພດສຶກສາ ແລະ ເນື້ອໃນເພດສຶກສາ, ນໍາສະເໜີຄວາມເປັນມາຂອງວິດີໂອເພດສຶກສາ, ນໍາສະເໜີເນື້ອໃນວິດີໂອເພດສຶກສາພາສາລາວ ແລະ ຊ້ອນວິດີໂອພາສາລາວເຂົ້າໃນລາຍການວິທະຍຸ, ໂທລະພາບ ແລະ ສື່ຕ່າງໆ ທີ່ເຂົ້າຮ່ວມໄດ້ຮັບຮູ້ ແລະ ເຂົ້າໃຈວ່າເພດສຶກສານີ້ແມ່ນຫຍັງ ເພື່ອນຳໄປໂຄສະນາເຜີຍແຜ່ໃຫ້ກັບໄວໜຸ່ມໄດ້ຮັບຮູ້ ແລະ ເຂົ້າໃຈໃຫ້ຫຼາຍຂຶ້ນ.
ຂ່າວ: ສົງການ ພັນແພງດີ
ຄໍາເຫັນ