 |
ໃນພິທີດັ່ງກ່າວ, ທ່ານ ນາງ ດາລາວອນ ກິດຕິພັນ ໄດ້ກ່າວສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜູ້ບໍລິຫານການສຶກສາທຸກຂັ້ນ ທີ່ໄດ້ເອົາໃຈໃສ່ຈັດການຮຽນ-ການສອນ ແລະ ຫ້າງຫາກະກຽມຄວາມພ້ອມຮອບດ້ານ ເປັນຕົ້ນ ສະຖານທີ່ສອບເສັງ, ກໍາມະການຄຸ້ມຄອງ ແລະ ສິ່ງອໍານວຍຄວາມສະດວກຕ່າງໆ ເພື່ອຮັບ ປະກັນໃຫ້ບັ້ນສອບເສັງດຳເນີນໄປຢ່າງມີປະສິດທິຜົນ. ບັ້ນສອບເສັງຈົບຊັ້ນ ມ7 ບຳລຸງ ເອກະພາບທົ່ວປະເທດໃນສົກຮຽນນີ້ ຈະຈັດຂຶ້ນຢ່າງເປັນທາງການໃນລະຫວ່າງວັນທີ 7-8 ກໍລະກົດ 2026 ທີ່ຈະມາເຖິງນີ້. ໃນສົກຮຽນ 2025-2026 ມີຕົວເລກນັກສອບເສັງທັງໝົດ 725 ຄົນ ຍິງ 293 ຄົນ (ທຽບໃສ່ສົກຮຽນຜ່ານມາແມ່ນຫຼຸດລົງ 93 ຄົນ ຍິງ 15 ຄົນ).
ໂອກາດດຽວກັນ, ທ່ານຮອງລັດຖະມົນຕີ ກໍໄດ້ເນັ້ນໜັກເຖິງຄວາມສຳຄັນຂອງການສຶກສານອກໂຮງຮຽນ ລະບົບບຳລຸງຍົກລະດັບວ່າ: ເປັນວຽກງານບຸລິມະສິດ ແລະ ຍຸດທະສາດທີ່ສຳຄັນຂອງພັກ-ລັດຖະບານ ໃນການສ້າງໂອກາດໃຫ້ປະຊາຊົນ, ພະນັກງານ, ທະຫານ, ຕຳຫຼວດ ແລະ ຊາວໜຸ່ມຜູ້ທີ່ພາດໂອກາດໄດ້ເຂົ້າເຖິງການສຶກສາຢ່າງທົ່ວເຖິງ, ຍຸຕິທຳ ແລະ ສະເໝີພາບ ເພື່ອສົ່ງເສີມການຮຽນຮູ້ຕະຫຼອດຊີວິດ ແລະ ສ້າງສັງຄົມແຫ່ງພູມປັນ ຍາ. ພ້ອມທັງເປັນບ່ອນຮອງຮັບ ແລະ ໃຫ້ໂອກາດຜູ້ທີ່ປະລະການຮຽນ ໃຫ້ໄດ້ກັບມາຮຽນຈົບການສຶກສາພາກບັງ ຄັບ ແລະ ສືບຕໍ່ຮຽນໃນລະດັບທີ່ສູງຂຶ້ນ ເພື່ອໄປພັດທະນາຕົນເອງ, ຄອບຄົວ ແລະ ປະເທດຊາດ.
ເພື່ອຮັບປະກັນໃຫ້ການສອບເສັງຄັ້ງນີ້ ດຳເນີນໄປດ້ວຍຄວາມເປັນລະບຽບຮຽບຮ້ອຍ, ໂປ່ງໃສ, ຍຸຕິທຳ ແລະ ບັນລຸຜົນສໍາເລັດຕາມຄາດໝາຍ, ທ່ານຮອງລັດຖະມົນຕີ ໄດ້ມີທິດຊີ້ນຳ ແລະ ເນັ້ນໜັກບາງຈຸດສໍາຄັນ ໃຫ້ຄະນະກຳມະການທຸກຂັ້ນ ຍົກສູງຄວາມຮັບຜິດຊອບທາງດ້ານການເມືອງ, ປະຕິບັດກົດລະບຽບການສອບເສັງຢ່າງເຂັ້ມງວດ, ໂປ່ງໃສ ແລະ ຍຸຕິທຳທີ່ສຸດ; ນັກສອບເສັງຂໍໃຫ້ມີຄວາມໝັ້ນໃຈໃນຕົນເອງ, ນໍາໃຊ້ຄວາມຮູ້ ແລະ ປະ ສົບການທີ່ໄດ້ຮຽນມາເຂົ້າໃນການສອບເສັງຢ່າງມີສະຕິ, ຮອບຄອບ ແລະ ປະຕິບັດລະບຽບວິໄນການສອບເສັງຢ່າງຊື່ສັດບໍລິສຸດ; ພະແນກ ສກຂ ສືບຕໍ່ກະກຽມຄວາມພ້ອມດ້ານຕ່າງໆ ຕາມການແນະນຳຂອງກົມການສຶກສານອກໂຮງຮຽນ; ພ້ອມທັງຖືໂອກາດນີ້ໃນການໂຄສະນາວຽກງານການສຶກສານອກໂຮງຮຽນດ້ວຍຫຼາຍຮູບແບບ ເພື່ອໃຫ້ສັງຄົມເຂົ້າໃຈ ແລະ ໃຫ້ການສະໜັບສະໜູນຫຼາຍຂຶ້ນ; ການສະຫຼຸບຕີລາຄາພາຍຫຼັງສິ້ນສຸດການສອບເສັງ, ຕ້ອງມີການສະຫຼຸບ, ຖອດຖອນບົດຮຽນຢ່າງລະອຽດ ເພື່ອເປັນທິດທາງປັບປຸງໃນຕໍ່ໜ້າ ແລະ ລາຍງານໃຫ້ຂັ້ນສູນກາງຮັບຊາບ.
ຂ່າວ-ພາບ: ການຈະນາ
ຄໍາເຫັນ