ທ່ານ ສໍາລານ ພັນຄະວົງ ຮອງລັດຖະມົນຕີ ກະຊວງສຶກສາທິການ ແລະ ກິລາ ໄດ້ຊີ້ແຈ້ງວ່າ: ໃນຊຸມປີຜ່ານມາ ລັດຖະບານ ໄດ້ຈັດສັນເພີ່ມງົບປະມານ 215.30 ຕື້ກີບ ເຂົ້າໃນ ວຽກບູລິມະສິດຕ່າງໆ ເປັນຕົ້ນແມ່ນເພີ່ມອັດຕາເງິນອາຫານທ່ຽງໃນໂຮງຮຽນໃຫ້ນັກຮຽນປະຖົມທີ່ຢູ່ເຂດຫ່າງໄກສອກຫຼີກ ຈາກ 1,000 ກີບ ມາເປັນ 5,000 ກີບ/ຄົນ/ມື້, ຈໍານວນ: 127.65 ຕື້ກີບ ເພື່ອເສີມສ້າງໃຫ້ນ້ອງນັກຮຽນ ໄດ້ຮັບໂພຊະນາການທີ່ດີ ແລະ ການພັດທະນາການຈະເລີນໄວຕາມເກນອາຍຸແຕ່ລະໄລຍະ,ເພີ່ມເບ້ຍລ້ຽງນັກຮຽນ-ນັກສຶກສາຈໍານວນ: 91.54 ຕື້ກີບເປັນຕົ້ນ ເບ້ຍລ້ຽງນັກຮຽນພິເສດ (ເດັກພິການ ແລະ ດ້ອຍໂອກາດ), ສູນຟື້ນຟູຄົນພິການ ຈາກ 90,000 ກີບມາເປັນ 300,000ກີບ, ເບ້ຍລ້ຽງນັກຮຽນຊົນເຜົ່າ, ນັກຮຽນພິເສດ, ທຸກຍາກ ແລະ ດ້ອຍໂອກາດ ຈາກ 200,000 ກີບ ມາເປັນ 300,000 ກີບ, ນັກຮຽນພອນສະຫວັນຈາກ 250,000 ກີບ ມາເປັນ 350,000 ກີບ, ນັກຮຽນອະຊິວະ ແລະ ການສຶກສາຊັ້ນສູງ ຈາກ 200,000 ກີບ ມາເປັນ 500,000 ກີບ ແລະ ນັກຮຽນສ້າງຄູ ຈາກ 200,000 ກີບ ມາເປັນ 700,000 ກີບ ເພື່ອຫຼຸດຜ່ອນການປະລະການຮຽນ ແລະ ຊຸກຍູ້ໃຫ້ນ້ອງນັກຮຽນສືບຕໍ່ສຶກສາຮໍ່າຮຽນໃຫ້ມີວິຊາຊີບຕາມເປົ້າໝາຍແຜນຍຸດທະສາດຂອງຂະແໜງສືກສາ.
ທ່ານ ສໍາລານ ພັນຄະວົງ ຍັງໄດ້ກ່າວອີກວ່າ: ເພື່ອໃຫ້ໂຮງຮຽນຮຽນລັດມີຄຸນນະພາບ ແລະ ດຶງດູດ ໃຫ້ນັກຮຽນມາຮຽນເພີ່ມຂຶ້ນ ກະຊວງສຶກສາທິການ ແລະ ກິລາ ໄດ້ສຸມໃສ່ໃນການສົ່ງເສີມວຽກງານການເຂົ້າເຖິງ, ວຽກງານປັບປຸງຄຸນນະພາບ ແລະ ວຽກງານບໍລິຫານຄຸ້ມຄອງຄື: ສົ່ງເສີມການເຂົ້າເຖິງ ສືບຕໍ່ການແນະນໍາ, ໂຄສະນາໃຫ້ພໍ່ແມ່ຜູ້ປົກຄອງໄດ້ສົ່ງລູກຫຼານໄດ້ສົ່ງເຂົ້າມາຮຽນ ແລະ ໃຫ້ຮຽນຈົນຈົບໂດຍມີວີດີໂອສັ້ນໆ,ສືບຕໍ່ຈັດຕັ້ງ ແລະ ຜັນຂະຫຍາຍມະຕິຕົກລົງ, ນະໂຍບາຍ ແລະ ມາດຕະການແກ້ໄຂການຂາດແຄນຄູສອນ, ການປະລະການຮຽນ ແລະ ການສົ່ງເສີມເຂົ້າຮຽນວິຊາຊີບ ສະບັບເລກທີ 09/ລບ, ລົງວັນທີ 17 ກໍລະກົດ 2023; ຈັດຕັ້ງການຮຽນ-ການສອນສາມັນວິຊາຊີບ ໄປສູ່ໂຮງຮຽນທີ່ມີເງື່ອນໄຂ; ສະໜອງເບ້ຍລ້ຽງ ແລະ ອາຫານທ່ຽງ ໃຫ້ແກ່ນັກຮຽນທຸກຍາກ ແລະ ດ້ອຍໂອກາດ ໃນໂຮງຮຽນເປົ້າໝາຍ ແຕ່ລະສົກຮຽນ (ສໍາຫຼັບເຂດຫ່າງໄກ) ແລະ ໃຫ້ສິ່ງຈູງໃຈໃຫ້ນັກຮຽນ ແລະ ຄູ.
ທ່ານ ສໍາລານ ພັນຄະວົງ ຍັງໄດ້ກ່າວອີກວ່າ: ສຳລັບຈຸດປະສົງຂອງການປັບປຸງລະບົບການສຶກສາມາເປັນ 6+3+3ເພື່ອປັບປຸງໂຄງສ້າງການສຶກສາຂັ້ນພື້ນຖານຂອງ ສປປ ລາວ ໃຫ້ສອດຄ່ອງກັບມາດຕະຖານຂອງສາກົນ,ເພື່ອປັບປຸງຜົນການຮຽນຂອງນັກຮຽນໂດຍຮັບປະກັນໃຫ້ນັກຮຽນມີເວລາພຽງພໍໃນການພັດທະນາທັກສະພື້ນຖານ,ເພື່ອຄວາມເທົ່າທຽມ ໂດຍການເສີມຂະຫຍາຍການຮຽນຮູ້ໃນໄວເດັກໃນກຸ່ມດ້ອຍໂອກາດ,ເພື່ອສົ່ງເສີມການເລື່ອນຊັ້ນ ແລະ ການສືບຕໍ່ຮຽນລະຫວ່າງຊັ້ນປະຖົມ ແລະ ມັດທະຍົມຕອນຕົ້ນ ແລະ ຄາດຄະເນຜົນໄດ້ຮັບຈາກການປັບໂຄງສ້າງ ແມ່ນຜົນສຳເລັດດ້ານການຮຽນຂອງນັກຮຽນດີຂຶ້ນ,ທັກສະພື້ນຖານດີຂຶ້ນ ແລະ ການກຽມພ້ອມສໍາລັບການສຶກສາຊັ້ນມັດທະຍົມດີຂຶ້ນ, ຄວາມກົດດັນຕໍ່ນັກຮຽນ ແລະ ຄູສອນຈະຫຼຸດລົງ, ມີເວລາຫຼາຍຂຶ້ນໃນການພັດທະນາຄວາມຮູ້, ທັກສະ ແລະ ຄວາມໝັ້ນໃຈ ເພື່ອບັນລຸມາດຕະຖານການຮຽນຊັ້ນປະຖົມ ນັກຮຽນຈະມີໂອກາດແລະ ຄວາມເປັນໄປໄດ້ໃນການຮຽນ ແລະ ພັດທະນາຕົນເອງຫຼາຍຂຶ້ນ.ອັດຕາການເຂົ້າເຖິງ ແລະ ການຮຽນຕໍ່ເພີ່ມຂຶ້ນ ຈະມີເດັກນ້ອຍຈໍານວນຫຼາຍຂຶ້ນ, ການສຶກສາຊັ້ນປະຖົມ 6 ປີ ຈະເພີ່ມການເຂົ້າເຖິງຊັ້ນປະຖົມ ແລະ ການຮຽນທີ່ດີຂຶ້ນໃນ 6 ປີຈະຊ່ວຍເດັກມີຄວາມກຽມພ້ອມດີຂຶ້ນ ກ່ອນຈະຂຶ້ນຊັ້ນມັດທະຍົມຕອນຕົ້ນ, ດັ່ງນັ້ນຈະເພີ່ມອັດຕາການເລື່ອນຊັ້ນ ແລະ ການສືບຕໍ່ຮຽນໃນຊັ້ນມັດທະຍົມ.
ຂ່າວ-ພາບ:ບຸນຕອມ
ຄໍາເຫັນ