ໃນໂອກາດເຂົ້າຮ່ວມກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ X. ທ່ານ ກົງເພັດ ແກ້ວບົວພາ ຮອງປະທານສະພາປະຊາຊົນແຂວງ (ສສຂ) ສະມາຊິກສະພາແຫ່ງຊາດ (ສສຊ) ເຂດ 3 ແຂວງຫຼວງນໍ້າທາ ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນໃນວັນທີ 8 ກໍລະກົດນີ້ວ່າ: ກອງປະຊຸມໃນມື້ນີ້, ໄດ້ພິຈາລະນາຄົ້ນຄວ້າບັນຫາການສະເໜີຂອງລັດຖະບານກ່ຽວກັບວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ຊຶ່ງເນື້ອໃນຕົ້ນຕໍມີຫຼາຍບັນຫາສຳຄັນ ທີ່ລັດຖະບານໄດ້ສະເໜີ ເພາະວາລະແຫ່ງຊາດມີຄວາມສໍາຄັນ. ເພື່ອແກ້ໄຂບັນຫາດັ່ງກ່າວ, ລັດຖະບານໄດ້ປະເມີນຕາມດຳລັດ 348 ເຫັນວ່າຄອບຄົວທຸກຍາກຢູ່ໃນປະເທດເຮົາມີເຖິງ 189,000 ຄອບຄົວ ແລະ ບ້ານທຸກຍາກ 2,000 ກວ່າບ້ານ ແລະ ເມືອງທຸກຍາກ 66 ເມືອງ. ຍ້ອນສາເຫດດັ່ງກ່າວ, ລັດຖະບານຈຶ່ງໄດ້ກຳນົດວາລະແຫ່ງຊາດເພື່ອສຸມໃສ່ 2 ບັນຫາໃຫຍ່ຄື: 1) ເພື່ອສ້າງອາຊີບ, ແຫຼ່ງລາຍຮັບທີ່ໝັ້ນຄົງ ແລະ ຍືນຍົງໃຫ້ປະຊາຊົນ; 2) ເພື່ອພັດທະນາພື້ນຖານໂຄງລ່າງໄປສູ່ເຂດຊົນນະບົດ ແລະ ສິ່ງອຳນວຍຄວາມສະດວກຕ່າງໆ ຢູ່ໃນຊົນນະບົດ. ຖ້າຫາກ 2 ບັນຫານີ້ແກ້ໄຂໄດ້ ຈະເຮັດໃຫ້ປະຊາຊົນເຂດທຸກຍາກ, ຄອບຄົວທຸກຍາກ ແລະ ບ້ານທຸກຍາກຈະສາມາດຫຼຸດລົງໄດ້. ສ່ວນເນື້ອໃນຂອງວາລະແຫ່ງຊາດ ກໍໄດ້ກຳນົດມີຫຼາຍບັນຫາສຳຄັນ ໂດຍສະເພາະມີຄວາມຈຳເປັນຫຍັງຈຶ່ງສ້າງວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ແມ່ນອີງໃສ່ທິດ, ທັດສະ ນະຊີ້ນຳຂອງພັກ, ອີງໃສ່ມະຕິ XII ແລະ ກອງປະຊຸມໃຫຍ່ ຄັ້ງທີ XI ຂອງພັກ ກໍໄດ້ອີງໃສ່ຈຸດປະສົງສໍາຄັນນີ້.ນອກນີ້, ກໍໄດ້ກໍານົດບັນດາເນື້ອໃນຕ່າງໆ ເປັນຕົ້ນ 8 ຄາດໝາຍໃຫຍ່, 5 ຫຼັກການ ປະກອບມີ: ຫຼັກການຮັບ ປະກັນຄວາມເດັດຂາດ, ເຂັ້ມງວດໃນການຈັດຕັ້ງປະຕິບັດ ການພັດທະນາຊົນນະບົດ ແລະ ແກ້ໄຂຄວາມທຸກຍາກ ຫຼືຫຼັກການຮັບປະກັນຄວາມໂປ່ງໃສ, ຫຼັກການເລື່ອງວິທະຍາສາດ, ເລື່ອງວິຊາການ. ວຽກງານວິຊາການດ້ານກະສິກຳ, ດ້ານພື້ນຖານໂຄງລ່າງຕ່າງໆ ທີ່ໄປຊ່ວຍປະຊາຊົນເຂດຊົນນະບົດຕ້ອງໄດ້ເປັນອາຊີບ, ຮັບປະ ກັນແທ້ໆ ແລະ ການຮັບປະກັນຄຸນນະພາບ. ໃນນັ້ນ, ກຳນົດ 5 ວຽກຈຸດສຸມຄື: ການສ້າງອາຊີບທີ່ໝັ້ນຄົງ ໃຫ້ປະຊາຊົນຢ່າງຍືນຍົງ; ພັດທະນາພື້ນຖານໂຄງລ່າງ; ການສ້າງຄວາມເຂັ້ມແຂງໃຫ້ອົງການຈັດຕັ້ງຢູ່ໃນຂັ້ນທ້ອງຖິ່ນ, ຂັ້ນບ້ານ, ຢູ່ເຂດຊົນນະບົດຕ້ອງມີການສ້າງຄວາມເຂັ້ມແຂງໃຫ້ເຂົາເຈົ້າ; ຈະຕ້ອງໄດ້ຍາດແຍ່ງຊອກຄົ້ນຄວ້າເອົາທຶນຮອນມາເພື່ອພັດທະນາຊົນນະບົດ ແລະ ແກ້ໄຂຄວາມທຸກຍາກໃຫ້ໄດ້ຫຼາຍເທົ່າທີ່ຈະຫຼາຍໄດ້; ການສ້າງ ແລະ ປັບປຸງກົດໝາຍ, ການສ້າງ ແລະ ປັບປຸງນິຕິກຳ ຫຼືບັນດາກົນໄກຕ່າງໆ ໃນການປະສານສົມທົບ ລະຫວ່າງຂະແໜງການທີ່ກ່ຽວຂ້ອງ (ກະຊວງ, ທ້ອງຖິ່ນ, ແຂວງ, ຂັ້ນເມືອງ, ບ້ານ) ຕ້ອງໄດ້ສ້າງກົນໄກປະ ສານງານ ເຮັດໃຫ້ການແກ້ໄຂຄວາມທຸກຍາກໄດ້ຮັບຜົນດີເທົ່າທີ່ຈະດີໄດ້.
ທ່ານ ກົງເພັດ ແກ້ວບົວພາ ກ່າວຕື່ມວ່າ: ຖ້າຫາກວ່າວາລະແຫ່ງຊາດໄດ້ຮັບການຮັບຮອງຈາກສະພາແຫ່ງຊາດ ຈະສ້າງເປັນແຜນລະອຽດຂອງແຕ່ລະທ້ອງຖິ່ນ, ຂະແໜງການ ເພື່ອນຳພາປະຊາຊົນຈັດຕັ້ງປະຕິບັດເຮັດໃຫ້ປະຊາຊົນສາມາດຫຼຸດພົ້ນອອກຈາກຄອບຄົວທຸກຍາກ. ຊຶ່ງຍັງມີຄອບຄົວທຸກຍາກຫຼາຍ, ຄາດຄະເນວ່າຖ້າຫາກຮັບຮອງແລ້ວຈະແກ້ໄຂໃຫ້ໄດ້ 100,000 ຄອບຄົວ. ໝາຍວ່າຄອບຄົວທຸກຍາກ 14% ຢູ່ໃນປະເທດເຮົາຈະສາມາດຫຼຸດລົງເປັນຕົວເລກຫຼັກດຽວເປັນ 8% ແລະ ບ້ານຈະສາມາດຫຼຸດລົງ, ບ້ານທຸກຍາກ ແລະ ເມືອງທຸກຍາກ ກໍສາມາດຫຼຸດລົງ ເຮັດໃຫ້ປະຊາຊົນໄດ້ຮັບຜົນປະໂຫຍດເທົ່າທີ່ຄວນ. ທ່ານ ກົງເພັດ ແກ້ວບົວພາ ຍັງກ່າວເຖິງຄວາມຫຍຸ້ງຍາກ ກ່ຽວກັບການແກ້ໄຂຄວາມທຸກຍາກໃນໄລຍະຜ່ານມາ. ຖ້າຫາກມີແຕ່ພັກ-ລັດ ຂັ້ນເທິງເປັນຜູ້ຈັດຕັ້ງປະຕິບັດ, ເປັນຜູ້ສ້າງແຜນຈັດຕັ້ງປະຕິບັດ ແນ່ນອນຈະບໍ່ໄດ້ຮັບຜົນສຳເລັດ ແລະ ຮຽກຮ້ອງໃຫ້ປະຊາຊົນບັນດາເຜົ່າ, ປະຊາຊົນຢູ່ໃນເຂດຊົນນະບົດທຸກໆແຂວງ, ເມືອງ ຕ້ອງເປັນເຈົ້າການເຂົ້າຮ່ວມນຳພັກ-ລັດຂັ້ນເທິງໂດຍສະເພາະ ການເຂົ້າຮ່ວມເຊື່ອມຊຶມ-ຮັບຮູ້ເນື້ອໃນຈິດໃຈຂອງວາລະແຫ່ງຊາດນີ້. ຫຼັງຈາກນັ້ນ, ຈະໄດ້ເຊື່ອມຊຶມບັນດາເອກະສານຕ່າງໆ ໂດຍຂັ້ນເທິງຈະຕ້ອງໄດ້ສ້າງເປັນເອກະສານຄູ່ມືລົງໄປເຜີຍແຜ່ ເພື່ອໃຫ້ປະຊາຊົນຮັບຮູ້, ເຂົ້າຮ່ວມແຕ່ຫົວທີ ເຮັດໃຫ້ການຈັດຕັ້ງປະຕິບັດວາລະແຫ່ງຊາດໄດ້ຮັບຜົນດີຢ່າງເປັນຮູບປະທໍາ.
ຄໍາເຫັນ