ສສຊ ແຂວງຜົ້ງສາລີສະເໜີລັດຖະບານແກ້ໄຂຫຼາຍບັນຫາທາງດ້ານເສດຖະກິດ-ສັງຄົມ

ທ່ານ ສົມຈິດ ຫັບລາກອນກ່າວວ່າ:ຕະຫຼອດ6 ເດືອນຜ່ານມາ ເຖິງແມ່ນປະເທດເຮົາຈະໄດ້ຜົນກະທົບຫຼາຍດ້ານ ທັງປັດໄຈພາຍໃນ ແລະພາຍນອກສົ່ງຜົນກະທົບໂດຍກົງຕໍ່ເສດຖະກິດ-ສັງຄົມ ເຮັດໃຫ້ລາຄາສິນຄ້າແພງຂຶ້ນແຕ່ເຖິງຢ່າງໃດກໍຕາມລັດຖະບານໄດ້ມີຄວາມພະຍາຍາມໃນການຈັດຕັ້ງປະຕິບັດແກ້ໄຂບັນຫາດັ່ງກ່າວຈົນເຮັດໃຫ້ປະເທດຊາດສືບຕໍ່ມີຄວາມສະຫງົບສຸກ,ມີສະຖຽນລະພາບດ້ານການເມືອງ, ເສດຖະກິດຂະຫຍາຍຕົວໃນລະດັບ4.5% ມີຫຼາຍຄາດໝາຍໄດ້ບັນລຸຕາມແຜນການທີ່ວາງໄວ້.ອັດຕາເງິນເຟີ້ຫຼຸດລົງຈົນມາຮອດປັດຈຸບັນ ສະເລ່ຍ17.76% ສົມທຽບປີ(2024)24.77% ຄາດວ່າໝົດປີອັດຕາເງິນເຟີ້ຈະຫຼຸດລົງບໍ່ເກີນ1ໂຕເລກ,ອັດຕາແລກປ່ຽນເຫັນວ່າເງິນກີບຄ່ອຍໆແຂງຕົວຂຶ້ນ,ການຄຸ້ມຄອງເງິນຕາຕ່າງປະເທດສາມາດຊໍາລະຜ່ານທະນາ ຄານໄດ້ 68.18% ຂອງມູນຄ່າສົ່ງອອກ, ການຜະລິດສິນຄ້າພາຍໃນເພື່ຶຶອທົດແທນການນຳເຂົ້າ ແລະ ສົ່ງອອກຕ່າງປະເທດໂດຍສະເພາະສົ່ງອອກໄປຈີນ) ມີທ່າທີດີຂຶ້ນພົ້ນເດັ່ນແມ່ນຢ່າງພາລາ,ໝາກມ່ວງ ແລະ ສິນຄ້າອື່ນໆ, ປັບປຸງກົນໄກຄຸ້ມຄອງແຮ່ທາດປະເພດຕ່າງໆ, ປັບປຸງ ແລະ ກໍ່ສ້າງຫຼາຍເສັ້ນທາງທົ່ວປະເທດ, ສືບຕໍ່ຍົກລະດັບທາງເລກ12,ເລກ9,ກໍ່ສ້າງທາງດ່ວນວຽງຈັນຮ່າໂນ້ຍ,ປັບປຸງສະໜາມບິນວັດໄຕ ແລະ ອື່ນໆເຫັນວ່າມີຜົນສໍາເລັດເປັນກ້າວໆ.

ທ່ານ ສົມຈິດ ຫັບລາກອນ ກ່າວຕື່ມວ່າ: ຄຽງຄູ່ຜົນສໍາເລັດກໍຍັງມີຂໍ້ຄົງຄ້າງຫຼາຍຢ່າງທີ່ຢາກໃຫ້ລັດຖະບານເອົາໃຈໃສ່ຕື່ມເປັນຕົ້ນບັນຫາໄຟຟ້າທີ່ແພງຂຶ້ນສົ່ງຜົນກະທົບຕໍ່ການດຳລົງຊີວິດຂອງປະຊາຊົນ ແລະ ທຸລະກິດພາຍໃນປະເທດທີ່ຕ້ອງແບກຮັບຄ່າໄຟໃນແຕ່ລະເດືອນ; ການຄຸ້ມຄອງອັດຕາເງິນເຟີ້, ລາຄາສິນຄ້າແພງຂຶ້ນຢາກໃຫ້ລັດຖະບານແກ້ໄຂ ໂດຍໃຊ້ທຸກມາດຕະການຂອງທະນາຄານໃນການຊື້-ຂາຍ; ການຄຸ້ມຄອງການຂຸດຄົ້ນແຮ່ທາດຕ່າງໆໃຫ້ເຂົ້າສູ່ລະບຽບກົດໝາຍ, ແກ້ໄຂຜົນກະທົບຕໍ່ປະຊາຊົນ, ການນຳໃຊ້ສານເຄມີຂອງໂຄງການຕ່າງປະເທດ ຕ້ອງປະຕິບັດມາດຕະການເດັດຂາດຕໍ່ຜູ້ລະເມີດລະບຽບກົດໝາຍ; ການປັບປຸງ ແລະກໍ່ສ້າງເສັ້ນທາງທີ່ເປ່ເພ ສ້າງຄວາມຫຍຸ້ງຍາກໃນການສັນຈອນໄປ-ມາ ລວມເຖິງການຂົນສົ່ງສິນຄ້າຂອງປະຊາຊົນ, ການຊຳລະໜີ້ສິນໂຄງການທີ່ຍັງຄົງຄ້າງໃນໄລຍະຜ່ານມາ; ສົ່ງເສີມຊຸກຍູ້ການຜະລິດພາຍໃນໃຫ້ຫຼາຍຂຶ້ນ ເພື່ອທົດແທນການນຳເຂົ້າ ແລະ ສົ່ງອອກ, ປົກປ້ອງສິນຄ້າທີ່ເຮົາຜະລິດໄດ້,ຄຸ້ມຄອງອໍານວຍຄວາມສະດວກຕໍ່ປັດໄຈການຜະລິດແນວພັນ,ຝຸ່ນ ແລະ ອື່ນໆໃຫ້ມີລາຄາຖືກ,ຜະລິດໃຫ້ໄດ້ຫຼາຍ, ສິນຄ້າການຜະລິດທີ່ພວກເຮົາມີທ່າແຮງ; ສືບຕໍ່ແກ້ໄຂວຽກງານສຶກສາ, ການຮຽນ-ການສອນ, ການປະລະການຮຽນ, ຄູສອນບໍ່ພຽງພໍ ແລະ ສ້າງສິ່ງອຳນວຍຄວາມສະດວກດ້ານໂຄງລ່າງພື້ນຖານວຽກງານການສຶກສາ, ຍົກສູງຄຸນນະພາບການສຶກສາ; ແກ້ໄຂບັນຫາການສະໜອງອຸປະກອນແພດ,ຢາໃນໂຮງໝໍໃຫ້ພຽງພໍ ແລະ ສະເໜີໃຫ້ລັດຖະບານປະຕິບັດມາດຕະການເດັດຂາດຕໍ່ຜູ້ລະເມີດລະບຽບການກົດໝາຍພາກສ່ວນຜູ້ປະກອບການ ແລະ ເຈົ້າໜ້າທີ່ລັດທີ່ສ້າງຄວາມເສຍຫາຍຕໍ່ປະເທດຊາດ.(ຂ່າວ: ວັນເພັງ)