ໄດ້ສືບຕໍ່ປະກອບຄຳຄິດຄຳເຫັນໃສ່ບົດລາຍງານ ຂອງລັດຖະບານໂດຍສສຊ ໄດ້ສະເໜີໃຫ້ລັດຖະບານ ສືບຕໍ່ແກ້ໄຂຫຼາຍບັນຫາສຳຄັນ ຕິດພັນກັບການພັດທະນາເສດຖະກິດ-ສັງຄົມ ຂອງປະເທດເປັນຕົ້ນ:ດ້ານການສຶກສາ, ການລົງທຶນຂອງບັນດາໂຄງການຕ່າງໆ, ສາທາລະນະສຸກ, ການຄຸ້ມຄອງປົກປັກຮັກສາເສັ້ນທາງຫຼວງແຫ່ງຊາດ, ການປະຕິຮູບວິສາຫະກິດ ແລະ ອື່ນໆ.
ທ່ານ ພົຕ ສາຍໃຈ ກົມມະສິດ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 5 ແຂວງບໍ່ແກ້ວ ໄດ້ມີຄຳເຫັນກ່ຽວກັບການຈັດເກັບລາຍຮັບຈາກໂຄງການບໍ່ແຮ່, ປັດຈຸບັນ ຂັ້ນສູນກາງ ແລະ ທ້ອງຖິ່ນ ໄດ້ອະນຸມັດໂຄງການສໍາຫຼວດ, ການປຸງແຕ່ງແຮ່ທາດ ມີທັງໝົດ 1,000 ກວ່າບໍລິສັດ, ມີ 1,200 ກວ່າກິດຈະກໍາ ແຕ່ເມື່ອມາເບິ່ງການຈັດເກັບລາຍຮັບຈາກພາກສ່ວນກ່ຽວຂ້ອງແລ້ວເຫັນວ່າບໍ່ສົມສ່ວນ, ການເກັບລາຍຮັບແມ່ນຫຼຸດລົງ ທຽບໃສ່ປີ 2023. ສະນັ້ນ, ຢາກໃຫ້ລັດຖະບານ ລາຍງານຄືນກ່ຽວກັບໂຕເລກຜ່ານການປະເມີນ ໄດ້ໂຈະ, ໄດ້ຖອນຄືນໂຄງການ ມາເປັນຂອງລັດຖະບານມີຈັກໂຄງການ ໃນຈໍານວນ 1,000 ກວ່າໂຄງການ.
ສຳລັບການແກ້ໄຂພາຫະນະທີ່ນໍາເຂົ້າບໍ່ຖືກຕ້ອງ ບັນຫາດັ່ງກ່າວ, ຢູ່ໃນ 5 ແຂວງພາກເໜືອມີ 5,800 ກວ່າຄັນ ສະເໜີໃຫ້ລັດຖະບານໄດ້ຮີບຮ້ອນລົງສົມທົບກັບບັນດາແຂວງ, ລົງໄປເບິ່ງສະພາບຄວາມເປັນຈິງ ແລະ ແກ້ໄຂໃຫ້ຖືກຕ້ອງຕາມຂະບວນການ. ສ່ວນໂຄງການກໍ່ສ້າງຕາຝັ່ງເຈື່ອນ ຢູ່ບັນດາແຂວງພາກເໜືອ ແລະ ພາກໃຕ້ ເວົ້າສະເພາະ ຢູ່ແຂວງບໍ່ແກ້ວ ແມ່ນມີຜົນກະທົບຫຼາຍໃນໄລຍະລະດູຝົນ ສ້າງຜົນເສຍຫາຍຕໍ່ບ້ານເຮືອນຂອງປະຊາຊົນ ແລະ ເສັ້ນທາງ ທີ່ຢູ່ລຽບແຄມນ້ຳ ໄດ້ຮັບຄວາມເສຍຫາຍ ທັງນີ້, ຍ້ອນວ່າຂາດງົບປະມານ ໃນການກໍ່ສ້າງ.
ທ່ານ ວໍລະສິດ ສິວົງດາວ ສສຊ ເຂດເລືອກຕັ້ງທີ 13 ແຂວງສະຫວັນນະເຂດ ມີຄຳເຫັນວ່າ: ຜ່ານການລົງຊຸກຍູ້ຕິດຕາມກວດກາວຽກງານການສຶກສາ ເຫັນວ່າຂົງເຂດການສຶກສານັ້ນແມ່ນໜ້າເປັນຫ່ວງຫຼາຍ ເປັນຕົ້ນແມ່ນຄຸນນະພາບການສຶກສາຍັງຕໍ່າ ໂດຍສະເພາະຢູ່ໃນເຂດຊົນນະບົດ ການປະລະການຮຽນ ແມ່ນປະລະແຕ່ຢູ່ຊັ້ນປະຖົມ, ສໍາລັບ ເຂດຕົວເມືອງ ແມ່ນປະລະຂັ້ນມັດທະຍົມ ເພາະວ່າຍ້ອນສະພາບເສດຖະກິດ ຈຶ່ງພາກັນຫຼັ່ງໄຫຼໄປເຮັດວຽກ. ສະນັ້ນ, ສະເໜີລັດຖະບານ ເອົາໃຈໃສ່ຮີບຮ້ອນແກ້ໄຂແທ້ໆ. ສຳລັບສາເຫດທີ່ພາໃຫ້ເກີດການປະລະການຮຽນ ແລະ ຄຸນນະພາບການສຶກສາຕໍ່າ ອັນທີ່ໜຶ່ງແມ່ນຍ້ອນຄູສອນບໍ່ພຽງພໍ ຕ້ອງໄດ້ສອນຫ້ອງຄວບ,ເມື່ອເປັນເຊັ່ນນັ້ນກໍບໍ່ສາມາດຮັບປະກັນຄຸນນະພາບການສຶກສາໄດ້. ສໍາລັບ ແຂວງສະຫວັນນະເຂດ ແມ່ນມີໂຮງຮຽນ 2 ພັນກວ່າແຫ່ງ ມີອະນຸບານ, ປະຖົມ ແລະ ມັດທະຍົມ ມີຄູສອນພຽງແຕ່ 8 ພັນຄົນ, ໃນນັ້ນ ຄູອາສາສະໝັກ 1,600 ຄົນ ເມື່ອສະເລ່ຍແລ້ວໂຮງຮຽນແຫ່ງໜຶ່ງຈະມີຄູສອນປະມານ 4 ຄົນ. ອັນທີສອງ ຫຼັກສູດການສຶກສາໃໝ່ນີ້ ກໍເປັນບັນຫາ ເພາະວ່າຢູ່ຊົນນະບົດ ບໍ່ມີໂຮງຮຽນອະນຸບານ ບໍ່ມີໂຮງຮຽນປ.ກຽມ, ບໍ່ໄດ້ຮຽນພະຍັນຊະນະ, ສະຫຼະ ບໍ່ຄືໂຮງຮຽນໃນຕົວເມືອງ. ອີກບັນຫາໜຶ່ງ ແມ່ນຍ້ອນບັນຫາເສດຖະກິດຂອງຄອບຄົວ.
ສໍາລັບ ການແກ້ໄຂນັ້ນ, ຕ້ອງໄດ້ເພີ່ມຄູສອນໃຫ້ພຽງພໍ ຢ່າງໜ້ອຍຫ້ອງໜຶ່ງຕ້ອງມີຄູ 1 ຄົນ ຮັບຜິດຊອບ, ພ້ອມນີ້, ລັດຖະບານຕ້ອງໄດ້ສະໜອງງົບປະມານໃຫ້, ບໍ່ມີກໍຕ້ອງໄດ້ຊອກຊ່ອງທາງຫາວິທີແກ້, ພ້ອມທັງ ແກ້ໄຂຫຼັກສູດການສຶກສາ ຄືນໃໝ່, ທົບທວນຄືນໃໝ່ ແລະ ອື່ນໆ.
ທ່ານ ຄໍາແສນ ສີສະວົງ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 9 ແຂວງຊຽງຂວາງ ມີຄຳເຫັນສະເໜີໃຫ້ລັດຖະບານ ແກ້ໄຂຫຼາຍບັນຫາ ໂດຍສະເພາະດ້ານການສຶກສາ ເຫັນວ່າຄຸນນະພາບການສຶກສາມີລັກສະນະຖົດຖອຍລົງ ໃນຊຸມປີຜ່ານມານີ້, ສະນັ້ນ, ເພື່ອສືບຕໍ່ຍົກລະດັບການສຶກສາໃຫ້ທຽບທັນກັບປະເທດໃນພາກພື້ນອາຊຽນ ສະເໜີໃຫ້ລັດຖະບານ ທຸ້ມງົບປະມານໃສ່ການສຶກສາ ໂດຍສະເພາະການສຶກສາຢູ່ເຂດຫ່າງໄກສອກຫຼີກ ແລະ ອື່ນໆ.
ຂ່າວ-ພາບ: ຍຸພິນທອງ- ເກດສະໜາ
ຄໍາເຫັນ