ສສຊ-ສສຂເຜີຍແຜ່ຜົນສໍາເລັດກອງປະຊຸມ ສະໄໝສາມັນ ເທື່ອທີ 6 ຢູ່ເມືອງພຽງ

 ທ່ານ ບຸນລ້ວນ ຊົມສີຫາປັນຍາ ຮອງປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 7ແຂວງໄຊຍະບູລີ ແລະ ສະມາຊິກສະພາປະຊາຊົນແຂວງ ປະຈໍາເມືອງພຽງໄດ້ລົງເຜີຍຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ II  ຢູ່ເມືອງພຽງຂຶ້ນໃນວັນທີ 26 ມັງກອນຜ່ານມາ ໂດຍທ່ານ ເສີດ ແສງສຸລິນ ເຈົ້າເມືອງໆພຽງ, ມີການນຳເມືອງ ຕະຫຼອດຮອດພະນັກງານ-ລັດຖະກອນ, ທະຫານ, ຕໍາຫຼວດ ເຂົ້າຮ່ວມຮັບຟັງ.
    ຈຸດປະສົງໃນການລົງເຜີຍແຜ່ຄັ້ງນີ້, ເພື່ອເປັນການຈັດຕັ້ງຜັນຂະຫຍາຍ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ II ທີ່ສະພາແຫ່ງຊາດ ແລະ ສະພາປະຊາຊົນແຂວງ ໄດ້ຄົ້ນຄວ້າ, ພິຈາລະຈາ ແລະ ຮັບຮອງເອົາບັນຫາທີ່ສໍາຄັນຂອງຊາດ ແລະ ຂອງແຂວງ.
    ທັງນີ້ ເພື່ອເຮັດໃຫ້ພະນັກງານ-ລັດຖະກອນ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າຮັບຮູ້ເຂົ້າໃຈຕໍ່ສະພາບເສດຖະກິດໃນປັດຈຸບັນທີ່ເປັນບັນຫາທ້າທາຍໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ.
    ໃນຕອນເຊົ້າຂອງວັນດຽວກັນນີ້, ສະມາຊິກສະພາແຫ່ງຊາດ ປະຈໍາແຂວງເລືອກຕັ້ງທີ 7 ແຂວງໄຊຍະບູລີພ້ອມດ້ວຍສະມາຊິກສະພາປະຊາຊົນແຂວງ ປະຈໍາເມືອງພຽງ ຍັງໄດ້ລົງເຜີຍຜົນສໍາເລັດກອງປະຊຸມ ສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ຂອງສະພາປະຊາຊົນແຂວງ ຊຸດທີII ແລະ ພົບປະໂອ້ລົມປະຊາຊົນຢູ່ບ້ານນໍ້າປູຍ,ບ້ານນ້ຳສົງແລະບ້ານນ້ຳງີມຕື່ມອີກ.
ຂ່າວ-ພາບ: ແສງສຸດາ ກິ່ງສະຫວັດ.