ສສຊ,ສສນວລົງພົບປະຜູ້ມີສິດເລືອກຕັ້ງ ພະແນກການເງິນນະຄອນຫຼວງວຽງຈັນ

ສະມາຊິກສະພາແຫ່ງຊາດ(ສສຊ) ຊຸດທີ IX ປະຈຳເຂດເລືອກຕັ້ງທີ 1 ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ ຊຸດທີ II (ສສນວ) ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ນະຄອນຫຼວງວຽງຈັນ ຊຸດທີ IIໃນວັນທີ 23 ມັງກອນ ນີ້ ທີ່ພະແນການເງິນນະຄອນຫຼວງວຽງຈັນ ຊຶ່ງນຳໂດຍ ທ່ານ ອານຸພາບ ຕຸນາລົມ ປະທານສະພາປະຊາຊົນ  ນະຄອນຫຼວງວຽງຈັນ ພ້ອມດ້ວຍຄະນະ, ມີພະນັກງານ-ລັດຖະກອນ ພະແນກການເງິນນະຄອນຫຼວງວຽງຈັນ ເຂົ້າຮ່ວມ.
ໃນການລົງພົບປະໃນຄັ້ງນີ້ ຜູ້ເຂົ້າຮ່ວມກອງປະຊຸມໄດ້ຮັບຟັງການລາຍງານສະພາບການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2023 ແລະ ທິດທາງແຜນການປີ 2024 ຂອງຂະແໜງການເງິນໂດຍສັງເຂບຈາກທ່ານ ສີລິລາດ ທົງສິນທອງເພັງ ຫົວໜ້າພະແນກການເງິນ ນວ ຈາກນັ້ນ ສສຊ,
ສສວນ ກໍໄດ້ຜັດປ່ຽນເຜີຍແຜ່ ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX  ແລະ ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນນະຄອນຫຼວງວຽງຈັນ ຊຸດທີ II, ພ້ອມທັງລົງມາເຄື່ອນໄຫວຕິດຕາມ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ຂອງພະແນກການເງິນນະຄອນຫຼວງວຽງຈັນ.ໃຫ້ພະນັກງານ-ລັດຖະກອນ ໄດ້ຮັບຮູ້ ແລະ ເຂົ້າໃຈຕໍ່ເນື້ອໃນສຳຄັນຂອງສອງກອງປະຊຸມດັ່ງກ່າວ.
ຂ່າວ-ພາບ:ຍຸພິນທອງ