ປັດຈຸບັນ ນວ ພົບບັນຫາການຂາດແຄນຄູຈໍານວນຫຼາຍ ຊຶ່ງຂະແໜງການສຶກສາ ມີຄວາມຕ້ອງການຄູເພີ່ມຈໍານວນ 859 ຄົນ, ຕໍ່ກັບຄຸນນະພາບການສຶກສາຖ້າທຽບໃສ່ທົ່ວປະເທດ, ນວ ແມ່ນນໍາໜ້າສະແດງອອກ ມີນັກຮຽນເກັ່ງລະດັບຊາດ ມ.4 ແລະ ມ.7 ທຸກປີ ແລະ ພິເສດສົກປີ 2024-2025 ນວ ສາມາດຍາດໄດ້ 7 ຄົນ, ນັກຮຽນທີ່ໄດ້ໃບປະກາດແດງສົກຮຽນຜ່ານມາ 60 ຄົນ, ພາກລັດ 30 ຄົນ.
ທິດທາງໃນການແກ້ໄຂໃນສະພາບທີ່ພະແນກສຶກສາ ສາມາດເຮັດໄດ້ມີ ຄື: 1. ໂຮມໂຮງຮຽນປະຖົມພາຍໃນກຸ່ມທີ່ມີຄວາມເປັນໄປໄດ້ ມາເປັນໂຮງຮຽນຂະໜາດກາງ ຫຼື ໃຫຍ່ ເພື່ອລະດົມຊັບພະຍາກອນຊົມໃຊ້ຮ່ວມກັນ ເຊັ່ນ: ຄູສອນ, ອຸປະກອນ ແລະ ການສະໜັບສະໜູນຈາກຊຸມຊົນ; 2. ຝຶກອົບຮົມວິທີສິດສອນໃຫ້ແກ່ຄູ ແລະ ສອນເພີ່ມໃຫ້ນັກຮຽນອ່ອນ ໃນໄລຍະພັກແລ້ງ; 3. ການຮ່ວມມືລະຫວ່າງໂຮງຮຽນພາກລັດ ແລະ ເອກະຊົນ ເພື່ອແລກປ່ຽນບົດຮຽນນໍາກັນ, ແລກປ່ຽນຄູ-ອາຈານໃນບ່ອນທີ່ສາມາດຈັດຕັ້ງປະຕິບັດໄດ້, ການຊ່ວຍເຫຼືອອຸປະກອນ ແລະ ໄອຊີທີ ເຂົ້າໃນການຮຽນ-ການສອນ; 4. ສືບຕໍ່ລະດົມການປະກອບສ່ວນຂອງພໍ່ແມ່ນັກຮຽນຕາມຄວາມສາມາດດ້ວຍການແຈ້ງແຜນພັດທະນາໂຮງຮຽນໃຫ້ພວກເພິ່ນເຂົ້າໃຈ; 5. ເພື່ອໃຫ້ໄດ້ຮັບການຮ່ວມມືຈາກຜູ້ປົກຄອງນັກຮຽນໃຫ້ຫຼາຍຂຶ້ນ ແລະ ມີຄວາມເປັນເຈົ້າການໃນການສົ່ງເສີມລູກຫຼານຂອງຕົນ ແມ່ນໄດ້ສະ ເໜີໃຫ້ຫ້ອງການສຶກສາເມືອງປະສານສົມທົບກົບອົງການປົກຄອງບ້ານນໍາເອົາບາງຂໍ້ກົດໝາຍການສຶກສາເຂົ້າໃນລະບຽບຂອງບ້ານເພື່ອມີມາດຕະການຕໍ່ຜູ້ປົກຄອງທີ່ບໍ່ເອົາໃຈໃສ່ຕໍ່ລູກຫຼານ.
ສໍາລັບຫຼັກສູດການສຶກສາ ພວກເຮົາບໍ່ສາມາດປັບຫຼັກສູດເອງໄດ້ ຕ້ອງໄດ້ປະຕິບັດຕາມຫຼັກສູດແຫ່ງຊາດທີ່ກະຊວງສຶກສາທິການ ແລະ ກິລາວາງອອກ. ແຕ່ວິທີການສິດສອນແບບໃໝ່ເພື່ອຫັນສູ່ການສອນແບບທັນສະໄໝ ຍັງມີຄວາມທ້າທາຍສູງ ຕໍ່ຄູຈໍານວນໜຶ່ງທີ່ບໍ່ທັນສາມາດພັດທະນາຕົນເອງໄດ້ທັນກັບສະພາບ; ເພື່ອຍົກສູງຄຸນນະພາບຂອງການສຶກສາຢູ່ໃນໂຮງຮຽນພາກລັດ ສະເໜີອົງການປົກຄອງ ນວ ໃຫ້ທິດຊີ້ນໍາ ແລະ ສະ ໜອງງົບປະມານຊ່ວຍຂະແໜງການສຶກສາຕື່ມ ໂດຍສະເພາະແມ່ນພື້ນຖານໂຄງລ່າງ; ສະເໜີບັນດາທ່ານ ສສຊ ແລະ ສສນວ ໃນການຊ່ວຍຊອກແຫຼ່ງທຶນ ແລະ ການປະກອບສ່ວນຂອງສັງຄົມຊ່ວຍໂຮງຮຽນທີ່ມີຄວາມຫຍຸ້ງຍາກ.
ສະເໜີໃຫ້ອົງການປົກຄອງ ຄົ້ນຄວ້າເອົາໂຮງຮຽນວິຊາຊີບ ແລະ ໂຮງຮຽນຊັ້ນ ມ.ປາຍ ໃຫ້ຕິດພັນກັບການສະໜອງແຮງງານໃຫ້ໂຄງການລົງທຶນພາຍໃນ ນວ. ຂໍ້ມູນໂຮງຮຽນ: ສະເໜີຄົ້ນຄວ້າສ້າງໂຮງຮຽນສາມັນ + ວິຊາຊີບ ກັບທີ່ ທີ່ຕິດພັນກັບຄວາມສະໝັກໃຈ, ສາມາດສ້າງລາຍຮັບໃນໄລຍະການຝຶກງານ; ສະເໜີຕິດພັນກັບການຜະລິດ, ວຽກເຮັດງານທໍາທີ່ມີຕົວແບບ ໂຮງຮຽນວຽງຈັນ-ຮ່າໂນ້ຍ, ມີວຽກເຮັດຮອງຮັບ; ສະເໜີໃຫ້ອົງການປົກຄອງຄົ້ນຄວ້າເອົາໂຮງຮຽນວິຊາຊີບ ແລະ ໂຮງຮຽນຊັ້ນ ມ.ປາຍ ໃຫ້ຕິດພັນກັບການສະໜອງແຮງງານໃຫ້ໂຄງການລົງທຶນພາຍໃນ ນວ.
ຕໍ່ຄໍາສະເໜີ ແລະ ຄໍາເຫັນ ດັ່ງກ່າວ ແມ່ນຖືກຕ້ອງຕາມແນວທາງຂອງກະຊວງສຶກສາທິການ ແລະ ກິລາ ຊຶ່ງໄດ້ຊີ້ນໍາໃຫ້ບັນດາແຂວງ, ນະຄອນຫຼວງ ຈັດຕັ້ງຫຼັກສູດສາມັນວິຊາຊີບຕາມຂໍ້ຕົກລົງເລກທີ 1815/ວຕວມ ລົງວັນທີ 18 ພຶດສະພາ 2016 ສອນແບບຄູ່ຂະໜານ (ຫຼັກສູດໄລຍະສັ້ນ C1, C2, C3) ຊຶ່ງ ນວ ກໍໄດ້ຈັດຕັ້ງປະຕິບັດເລີ່ມແຕ່ສົກຮຽນ 2023-2024 ຢູ່ວິທະຍາໄລເຕັກນິກວິຊາຊີບວຽງຈັນ-ຮ່າໂນ້ຍ ມີຢູ່ 2 ໂຮງຮຽນຄື: ມສ ເຈົ້າອານຸວົງ ແລະ ມສ ໄຊເສດຖາ ໃນສາຂາ ສ້ອມແປງຄອມພິວເຕີ ແລະ ຊ່າງຕິດຕັ້ງໄຟຟ້າໃນອາຄານ. ປັດຈຸບັນມີນັກຮຽນ 96 ຄົນ, ຍິງ 27 ຄົນ ແລະ ຍັງມີ ໂຮງຮຽນ ມສ ນາຄວາຍ ແລະ ມສ ສາລະຄໍາ ໄປຮຽນຢູ່ວິທະຍາໄລເຕັກນິກກະສິກໍາດົງຄໍາຊ້າງ ໃນສາຂາປູກຝັງ ແລະ ລ້ຽງສັດ. ນອກຈາກຫຼັກສູດແບບຄູ່ຂະໜານແລ້ວ ພວກເຮົາຍັງໄດ້ຈັດຕັ້ງການຮຽນ-ການສອນວິຊາຊີບໄລຍະພັກສິ້ນປີຮຽນ ໃຫ້ແກ່ນັກຮຽນມັດທະຍົມຕອນຕົ້ນ, ຕອນປາຍ ແລະ ຊາວໜຸ່ມ, ໄວໜຸ່ມຢູ່ສູນຝຶກອົບຮົມວິຊາຊີບນອກໂຮງຮຽນຂອງພະແນກສຶກສາ, ສູນຝຶກວິຊາຊີບນາຊາຍທອງ ແລະ ວິທະຍາໄລເຕັກນິກປາກປ່າສັກ, ວິທະຍາໄລເຕັກນິກວິຊາຊີບວຽງຈັນ-ຮ່າໂນ້ຍ ໃນສາຂາປຸງແຕ່ງອາຫານ, ເສີມສວຍ, ຊ່າງໄອທີ, ຊ່າງແປງເຄື່ອງເຢັນ ແລະ ຊ່າງສ້ອມແປງລົດຈັກ, ມີນັກຮຽນເຂົ້າຮຽນທັງໝົດ 347 ຄົນ.
ແຜນການໃນຕໍ່ໜ້າ: 1. ຂະຫຍາຍໄປບັນດາໂຮງຮຽນສາມັນທີ່ມີເງື່ອນໄຂໃນການຈັດຕັ້ງຫຼັກສູດສາມັນວິຊາຊີບຮ່ວມກັບບັນດາວິທະຍາໄລໃນນະຄອນຫຼວງ; 2. ສົມທົບກັບຜູ້ປະກອບການ ແລະ ອົງການຈັດຕັ້ງທີ່ກ່ຽວຂ້ອງພາກລັດ ແລະ ເອກະຊົນ ເພື່ອສົ່ງເສີມການມີວຽກເຮັດງານທໍາໃຫ້ຫຼາຍຂຶ້ນ.
ສະເໜີກ່ຽວກັບການສຶກສາຕິດພັນກັບຫົວຄິດປະດິດສ້າງຫຼັກສູດການສຶກສາ, ສ້າງໂຮງຮຽນກິນນອນ ແລະ ສ້າງວິຊາຊີບ: ຕໍ່ການສຶກສາຕິດພັນກັບຫົວຄິດປະດິດສ້າງ, ຫຼັກສູດການສຶກສານັ້ນ ພະແນກສຶກສາທິການ ແລະ ກິລາ ໄດ້ຜັນຂະຫຍາຍວຽກງານວິທະຍາສາດເຂົ້າໃນສາຍສາມັນສຶກສາ ເປັນຕົ້ນການຫັນສູ່ການສຶກສາແບບທັນສະໄໝ ເຊັ່ນ: ການສ້າງຫ້ອງສອນທັນສະໄໝ ເພື່ອໃຫ້ຄູໄດ້ນໍາໃຊ້ໄອຊີທີ ເຂົ້າໃນການຮຽນການສອນ, ສົ່ງເສີມຫ້ອງທົດລອງ ແລະ ປັນຍາປະດິດ; ສະເໜີອົງການປົກຄອງມີວິທີການ ແລະ ກົນໄກແກ້ໄຂ ກ່ຽວກັບການຈັດຕັ້ງປະຕິບັດຄາດໝາຍໃຫ້ບັນລຸອັດຕາການປະລະການຮຽນ; ສືບຕໍ່ບໍາລຸງນັກຮຽນອ່ອນ; ຈັດຕັ້ງບໍາລຸງໃຫ້ນັກຮຽນ ມ4 ແລະ ມ7 ໃນທຸກໆໂຮງຮຽນທົ່ວ ນວ ກຽມຄວາມພ້ອມໃຫ້ນັກຮຽນໃນການສອບເສັງຈົບຊັ້ນມັດທະຍົມຕອນຕົ້ນ ແລະ ຕອນປາຍ ແລະ ວຽກງານອື່ນໆ.
ຄໍາເຫັນ