ການແຂ່ງຂັນລາຍການນີ້ ໄດ້ຈັດຂຶ້ນໃນລະຫວ່າງວັນທີ 19 ກໍລະກົດ ຫາ 16 ສິງຫາ 2025 ທີ່ສະໜາມກິລາເຕະບານຫຍ້າທຽມ ລ້ານຊ້າງ ບ້ານໜອງໄຮ ເມືອງຫາດຊາຍຟອງ ນະຄອນຫຼວງວຽງຈັນ ຊຶ່ງມີ 13 ພາກສ່ວນເຂົ້າຮ່ວມຊີງໄຊ ແລະ ຖືກຈັດແບ່ງອອກເປັນ 3 ກຸ່ມ ແຕ່ລະກຸ່ມແຂ່ງຂັນພົບກັນໝົດ ຄັດເລືອກເອົາອັນດັບທີ 1-2 ຂອງແຕ່ລະກຸ່ມ ຜ່ານເຂົ້າຮອບ 8 ທີມສຸດທ້າຍ ແລະ ຄັດເລືອກເອົາທີມອັນດັບທີ 3 ທີ່ມີຄະແນນດີທີ່ສຸດອີກ 2 ທີມຈາກ 3 ກຸ່ມຕື່ມອີກເພື່ອໃຫ້ຄົບ 8 ທີມ. ສຳລັບ ກຸ່ມ ເອ ປະກອບມີ: ເມືອງຫາດຊາຍຟອງ, ເມືອງນາຊາຍທອງ, ເມືອງໄຊເຊດຖາ ເອ, ເມືອງຈັນທະບູລີ ແລະ ເມືອງໄຊເຊດຖາ; ກຸ່ມ ບີ ປະກອບມີ: ເມືອງໄຊທານີ, ເອັດອີຊີ ຢູໄນເຕັດ ໄຊທານີ, ເມືອງປາກງື່ມ ແລະ ເມືອງສີໂຄດຕະບອງ; ກຸ່ມ ຊີ ປະກອບມີ: ເມືອງສີສັດຕະນາກ, ເມືອງຫາດ ຢູໄນເຕັດ, ເມືອງສັງທອງ ແລະ ເອັມເອັນ ໂລຈີສຕິກ.
ຜົນຂອງການແຂ່ງຂັນມີດັ່ງນີ້: ຄອງແຊັມ (ທີ 1) ທີມ ເມືອງຫາດ ຢູໄນເຕັດ ໄດ້ຮັບຂັນແຊັມ ແລະ ເງິນ 50 ລ້ານກີບ, ທີ 2 ເອັດອີຊີ ຢູໄນເຕັດ ໄຊທານີ ໄດ້ຮັບຫຼຽນລາງວັນ ແລະ 30 ລ້ານກີບ ແລະ ທີ 3 ເມືອງປາກງື່ມ ໄດ້ຮັບຫຼຽນລາງວັນ ແລະ 20 ລ້ານກີບ.
ນອກນັ້ນ, ຍັງມີລາງວັນນັກກິລາຍິງປະຕູໄດ້ສູງສຸດ, ຜູ້ຮັກສາປະຕູດີເດັ່ນ, ຄູຝຶກດີເດັ່ນ, ກຳມະການຕັດສິນດີເດັ່ນ, ທີມມາລະຍາດດີເດັ່ນ.
ເປັນກ່ຽດເຂົ້າຮ່ວມ ມອບຂັນລາງວັນ ຂອງທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນ (ນວ) ປະທານສະມາຄົມກິລາ - ກາຍຍະກຳ ນວ ທັງເປັນປະທານຈັດການແຂ່ງຂັນ, ທ່ານ ບົວຄົງ ນາມມະວົງ ລັດຖະມົນຕີຫົວໜ້າຫ້ອງການສຳນັກງານນາຍົກລັດຖະມົນຕີ, ທ່ານ ຈັນສະໝອນ ຜ່ອງຈັນທາ ຜູ້ອຳນວຍການຝ່າຍການຕະຫຼາດ ບໍລິສັດ ເບຍລາວ ຈຳກັດ.ການແຂ່ງຂັນໃນລາຍການນີ້ແມ່ນໄດ້ຮັບການສະໜັບສະໜູນຫຼັກ ຈາກ ບໍລິສັດ ເບຍລາວ.
(ຂ່າວ: ຕຸໄລເພັດ)
ຄໍາເຫັນ