ສະນັ້ນ, ການພັດທະນາອຸດສາຫະກໍາການທ່ອງທ່ຽວຢູ່ປະເທດເຮົາໃນຕໍ່ໜ້ານີ້ ຕ້ອງເລັ່ງໃສ່ການພັດທະນາບັນດາຫົວໜ່ວຍທຸລະກິດທັງໝົດທີ່ນອນຢູ່ໃນຂະແໜງອຸດສາຫະກໍາການທ່ອງທ່ຽວໃຫ້ມີຄວາມຈະເລີນກ້າວໜ້າ ແລະ ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ ດ້ວຍການປັບປຸງໃຫ້ມີມາດຕະຖານທີ່ດີ ຄື: ປັບປຸງພັດທະນາ ຫົວໜ່ວຍທຸລະກິດບໍລິການນໍາທ່ຽວ ລວມທັງພະນັກງານນໍາທ່ຽວ, ພັດທະນາແຫຼ່ງທ່ອງທ່ຽວຕ່າງໆ, ໂຮງແຮມ, ເຮືອນພັກ, ບໍລິການຮ້ານອາຫານ, ເຄື່ອງດື່ມ, ບໍລິການຂົນສົ່ງທາງອາກາດ, ທາງບົກ ແລະ ທາງນໍ້າ (ທຸລະກິດເຮືອທ່ອງທ່ຽວ) ເຄື່ອງທີ່ລະນຶກ ແລະ ສະຖານບັນເທີງ ບ່ອນພັກຜ່ອນຢ່ອນໃຈ...
ເພີ່ມທະວີການກໍ່ສ້າງ ແລະ ພັດທະນາບຸກຄະລາກອນອຸດສາຫະກໍາການທ່ອງທ່ຽວ ໂດຍສົມທົບກັບສະມາຄົມທຸລະກິດທ່ອງທ່ຽວ, ສະມາຄົມໂຮງແຮມ ແລະ ຮ້ານອາຫານ ສະຖາບັນການສຶກສາທີ່ກ່ຽວຂ້ອງເຊັ່ນ: ມະຫາວິທະຍາໄລແຫ່ງຊາດ, ມະຫາວິທະຍາໄລເອກະຊົນ ຈັດຕັ້ງການຝຶກອົບຮົມ ຍົກລະດັບຄວາມຮູ້, ຄວາມສາມາດ ໃຫ້ແກ່ຜູ້ປະກອບການທຸລະກິດທ່ອງທ່ຽວ, ໂຮງແຮມ, ເຮືອນພັກ ແລະ ຮ້ານອາຫານ ທັງສາມລະດັບຄື: ລະດັບຜູ້ອໍານວຍການ/ຜູ້ຈັດການ, ລະດັບຜູ້ຄວບຄຸມງານ ແລະ ລະດັບຜູ້ບໍລິການ, ຊຸກຍູ້ສົ່ງເສີມການຮຽນ,ການສອນລະດັບຊັ້ນສູງດປະລິນຍາຕີ ແລະ ວິຊາຊີບກ່ຽວກັບການທ່ອງທ່ຽວໃຫ້ຫຼາຍຂຶ້ນ. ຊຸກຍູ້ສົ່ງເສີມໃຫ້ບັນດາສະມາຄົມທຸລະກິດ ແລະ ກຸ່ມທຸລະກິດ ແລະ ຫົວໜ່ວຍທຸລະກິດອຸດສາຫະກໍາການທ່ອງທ່ຽວໄດ້ມີກົນໄກປະສານ ກ້າວໄປເຖິງສ້າງເຄືອຂ່າຍຜູກພັນດ້ານທຸລະກິດນໍາກັນ, ອູ້ມຊູສະໜັບສະໜູນຊ່ວຍເຫຼືອຊຶ່ງກັນ ແລະ ກັນ ຮ່ວມກັນກໍານົດນະໂຍບາຍ,ວິທີການ, ຮູບການໃນການດຶງດູດນັກທ່ອງທ່ຽວຕະຫຼອດການກໍານົດລາຄາຄ່າບໍລິການໃນແຕ່ລະລະດູການຂອງການທ່ອງທ່ຽວ. ເປັນເຈົ້າການປະສານສົມທົບກັບພາກສ່ວນ, ຂະ ແໜງການກ່ຽວຂ້ອງ, ປັບປຸງຂອດບໍລິການນັກທ່ອງທ່ຽວທີ່ຢູ່ພາຍໃຕ້ການຄຸ້ມຄອງ, ກວດກາຂອງແຕ່ລະພາກສ່ວນເຊັ່ນ: ການບໍລິການຂົນສົ່ງ, ການບໍລິການຢູ່ດ່ານສາກົນເຂົ້າ-ອອກປະເທດ, ການບໍລິການແຫຼ່ງທ່ອງທ່ຽວຕ່າງໆ ແລະ ການບໍລິການອື່ນໆທີ່ກ່ຽວກັບກິດຈະກໍາຂອງນັກທ່ອງທ່ຽວ. ສືບຕໍ່ພົວພັນ ແລະ ເສີມຂະຫຍາຍການແລກປ່ຽນບົດຮຽນທາງວິຊາການ, ຮ່ວມມືດ້ານການດໍາເນີນທຸລະກິດອຸດສາຫະກໍາການທ່ອງທ່ຽວຂອງປະເທດເຮົາ ກັບ ບັນດາປະເທດໃກ້ຄຽງ, ອະນຸພາກພື້ນແມ່ນໍ້າຂອງ ແລະ ບັນດາປະເທດອາຊຽນ.
ເພື່ອພັດທະນາອຸດສະຫະກໍາ ການທ່ອງທ່ຽວ ຢູ່ປະເທດພວດເຮົາໃນຕໍ່ໜ້າໃຫ້ເຂົ້າສູ່ລະບົບ, ມີຄວາມເປັນລະບຽບຮຽບຮ້ອຍ ແລະ ເພື່ອເຮັດໃຫ້ອຸດສາຫະກໍາການທ່ອງທ່ຽວຂອງລາວມີຄວາມເຂັ້ມແຂງ, ມີຄຸນນະພາບການບໍລິການທີ່ດີໄດ້ມາດຕະຖານສາກົນເທື່ອລະກ້າວ ແລະ ດໍາເນີນທຸລະກິດໃຫ້ສອດຄ່ອງກັບລະບຽບກົດໝາຍທີ່ວາງອອກ, ສາມາດແຂ່ງຂັນກັບປະເທດໃກ້ຄຽງ ແລະ ພາກພື້ນ ທັງປະກອບສ່ວນເຂົ້າໃນການພັດທະນາເສດຖະກິດຂອງປະເທດເຮົາໄດ້ເປັນຢ່າງດີ. ຕ້ອງໄດ້ເອົາໃຈໃສ່ປັບປຸງ ແລະ ສ້າງນິຕິກໍາກ່ຽວກັບການສ້າງຕັ້ງ, ການເຄື່ອນໄຫວຂອງບັນດາທຸລະກິດໃນອຸດສະຫະກໍາການທ່ອງທ່ຽວໃຫ້ຄົບຊຸດ, ຍົກສູງຄຸນນະພາບການບໍລິການນໍາທ່ຽວໃຫ້ໄດ້ມາດຕະຖານ, ຮັບປະກັນໃນການຮັບສົ່ງ ແລະ ບໍລິການນໍາທ່ຽວຄົບວົງຈອນ ຫຼີກລ່ຽງການບໍລິການນໍາທ່ຽວທີ່ບໍ່ຖືກຕ້ອງ ທີ່ຈະສົງຜົນກະທົບດ້ານລົບຕໍ່ພາບພົດການທ່ອງທ່ຽວຂອງປະເທດເຮົາ. ໃນນັ້ນຈະຕ້ອງໄດ້ເອົາໃຈໃສ່ຈັດສັນບໍລິສັດທ່ອງທ່ຽວໃຫ້ຖືກຕ້ອງຕາມກົດໝາຍວ່າດ້ວຍການທ່ອງທ່ຽວຄື:ບໍລິສັດທ່ອງທ່ຽວລະຫວ່າງປະເທດ ເຮັດໜ້າທີ່ບໍລິການນໍານັກທ່ອງທ່ຽວເຂົ້າມາທ່ອງທ່ຽວພາຍໃນປະເທດ ຫຼື ນໍານັກທ່ອງທ່ຽວຈາກລາວອອກໄປທ່ຽວຕ່າງປະເທດ, ບໍລິສັດທ່ອງທ່ຽວພາຍໃນປະເທດ ເຮັດໜ້າທີ່ບໍລິການນໍາພານັກທ່ອງທ່ຽວຢູ່ພາຍໃນ ແລະ ບໍລິສັດທ່ອງທ່ຽວໃນພື້ນທີ່ສະເພາະໃດໜຶ່ງ ເຮັດໜ້າທີ່ບໍລິການນໍາພານັກທ່ອງທ່ຽວໃນສະຖານທີ່ໃດໝຶ່ງ ໄປພ້ອມກັບຈັດແບ່ງປະເພດພະນັກງານນໍາທ່ຽວໃຫ້ແທດເໝາະກັບສະພາບການຂະຫຍາຍຕົວຂອງທຸລະກິດທ່ອງທ່ຽວໃນປັດຈຸບັນ ຊຶ່ງມີຢູ່ສາມປະເພດຄື: ພະນັກງານນໍາທ່ຽວສັງກັດບໍລິສັດບໍລິສັດນໍາທ່ຽວ, ພະນັກງານນໍາທ່ຽວສັງກັດພະແນກ, ຫ້ອງການທ່ອງທ່ຽວແຂວງ ແລະ ພະນັກງານປະຈໍາຢູ່ແຫຼ່ງທ່ອງທ່ຽວ. ສືບຕໍ່ປັບປຸງກຸ່ມທຸລະກິດບໍລິການທ່ອງທ່ຽວຢູ່ແຂວງຕ່າງໆໃຫ້ເຂັ້ມແຂງ ມີຄວາມສາມາດເຕົ້າໂຮມບັນດາທຸລະກິດ, ທັງມີແຜນການເຄື່ອນໄຫວໂຄສະນາ-ສົ່ງເສີມການທ່ອງທ່ຽວພາຍໃນທ້ອງຖິ່ນຂອງຕົນ. ພັດທະນາວົງຈອນ ແລະ ລາຍການທ່ອງທ່ຽວທີ່ເໝາະສົມກັບຕະຫຼາດເປົ້າໝາຍ. ພາກລັດ ແລະ ພາກເອກະຊົນ ນັບທັງຂັ້ນສູງກາງ ແລະ ທ້ອງຖິ່ນ ຕ້ອງປະສານສົມທົບພັດທະນາວົງຈອນ ແລະ ລາຍການທ່ອງທ່ຽວໃຫ້ມີຄວາມຫຼາກຫຼາຍ.
ພັດທະນາຜະລິດຕະພັນໃໝ່ໃຫ້ເໝາະສົມກັບກຸ່ມນັກທ່ອງທ່ຽວເຊັ່ນ: ທ່ອງທ່ຽວປະຫວັດສາດ, ທ່ຽວຊົມຫັດຖະກໍາ, ທ່ອງທ່ຽວສຸຂະພາບ, ຍ່າງປ່າ ແລະ ອື່ນໆ. ປັບປຸງລະບຽບການມາດຕະຖານຄວາມປອດໄພສໍາລັບກິດຈະກໍາທ່ອງທ່ຽວທີ່ມີລັກສະນະພະຈົນໄພ ເຊັ່ນ: ທ່ຽວຖໍ້າ, ຊົມນໍ້າຕົກຕາດ, ປີນຜາ, ລ່ອງແກ້ງ, ເບິ່ງຊ້າງປ່າ... ໃຫ້ມີຄວາມປອດໄພ,ຍົກສູງການບໍລິການຂອງສະຖານທີ່ພັກແຮມ, ຮ້ານອາຫານ ແລະ ຮ້ານກິນດື່ມໃຫ້ໄດ້ມາດຕະຖານໃກ້ຄຽງໃນລະດັບພາກພື້ນ ແລະ ສາກົນ.
ທັງໝົດເຫຼົ່ານີ້, ກໍເພື່ອເຮັດໃຫ້ປະເທດລາວເຮົາເຂັ້ມແຂງດ້ານອຸດສາຫະກໍາການທ່ອງ
ທ່ຽວ, ເປັນຈຸດໝາຍຂອງນັກທ່ອງທ່ຽວ ເປັນທີ່ດຶ່ງດູດ ແລະ ຍ່ອມຮັບຂອງນັກທ່ອງທ່ຽວ ນໍາເອົາເງິນຕາເຂົ້າສູ່ປະເທດນັບມື້ນັບຫຼາຍຂຶ້ນ.
ຄໍາເຫັນ