ທະຫານເຂດ4 ສສ ຫວຽດນາມ ເຂົ້າອວຍພອນການນຳແຂວງຊຽງຂວາງ

ການໄປມາຫາສູ່ ລະຫ່ວາງແຂວງຊຽງຂວາງ ແລະ ກອງບັນຊາການທະຫານເຂດ4 ແມ່ນເປັນປົກກະຕິ ເພື່ອແລກປ່ຽນຂໍ້ມູນຂ່າວສານ, ຂະຫຍາຍສາຍພົວພັນ ຮ່ວມມື ໃຫ້ກ້ວາງຂວາງ ຮອບດ້ານ, ຂອບໃຈຢ່າງສູງທີ່ໄດ້ໃຫ້ການຊ່ວຍເຫຼືອ, ພັດທະນາທ້ອງຖິ່ນທີ່ຫ່າງໄກຊອກຫຼີກ ໂດຍສະເພາະແມ່ນ ບັນດາຈຸດສຸມ ເຮັດໃຫ້ການດຳລົງຊີວິດຂອງປະຊາຊົນດີຂຶ້ນ, ການພັດທະນາ ເສດຖະກິດ-ສັງຄົມດີຂຶ້ນເລື້ອຍໆ. ໂອກາດນີ້, ທ່ານໄດ້ກ່າວຄຳອວຍພອນອັນປະເສີດ ມາຍັງການນຳ, ປະຊາຊົນຊາວຫວຽດນາມ ໂດຍສະເພາະແມ່ນ ອ້າຍນ້ອງກອງບັນຊາການທະຫານເຂດ4 ເນື່ອງໃນໂອກາດສົ່ງທ້າຍປີເກົ່າ ແລະ ຕ້ອນຮັບປີໃໝ່ລາວ ທີ່ຈະໝູນວຽນມາຄົບຮອບອີກວາລະໜຶ່ງ ຈົ່ງມີແຕ່ຄວາມຜາສຸກ, ມີຜົນສຳເລັດທຸກໜ້າທີ່, ສືບຕໍ່ພັດທະນາກົມກອງ ໃຫ້ເຕີບໃຫຍ່ ເຂັ້ມແຂງ, ຈະເລີນຂຶ້ນເລື້ອຍໆ, ອວຍພອນໃຫ້ສາຍພົວພັນ ຄວາມສາມັກຄີພິເສດລາວ-ຫວຽດນາມຈົ່ງໝັ້ນຄົງທະນົງແກ່ນຂຶ້ນເລື້ອຍໆ.

ໂອກາດນີ້, ທ່ານ ພົນຈັດຕະວາ ຮ່ວາງ ຢຸຍ ຈ້ຽນ ໄດ້ກ່າວເຖິງຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ແຂວງຊຽງຂວາງ ເພື່ອເສີມສ້າງການພົວພັນ ຮ່ວມມືໃຫ້ກ້ວາງຂວາງ ເຂົ້າສູ່ລວງເລິກ ເສີມຂະຫຍາຍຄວາມສາມັກຄີພິເສດ ຫວຽດນາມ-ລາວ ໂດຍສະເພາະແມ່ນ ກອງບັນຊາການທະຫານເຂດ4 ກັບແຂວງຊຽງຂວາງ ໃຫ້ງອກງາມຂຶ້ນເລື້ອຍໆ. ນອກນີ້, ທ່ານຍັງໄດ້ກ່າວຄຳອວຍພອນ ອັນປະເສີດມາຍັງການນຳແຂວງ ຕະຫຼອດຮອດພະນັກງານ ທະຫານ, ຕຳຫຼວດ, ພໍ່ແມ່ປະຊາຊົນບັນດາເຜົ່າຊາວຊຽງຂວາງ ຈົ່ງມີແຕ່ຄວາມຜາສຸກ ຄວາມຈະເລີນ ປະສົບຜົນສຳເລັດໃນທຸກວຽກງານ ສືບຕໍ່ພັດທະນາສ້າງສາແຂວງຊຽງຂວາງໃຫ້ຈະເລີນກ້າວໜ້າ ອວຍພອນໃຫ້ສາຍພົວພັນພິເສດຫວຽດນາມ-ລາວຈົ່ງໝັ້ນຄົງທະນົງແກ່ນຊົ່ວກາລະນານ.

(ຂ່າວ: ບຸນມີ ແສງທຸມມີ)