 |
ຮ່ວມຖະແຫຼງຂ່າວໂດຍມີ ທ່ານ ແສງພອນ ພົນອາມາດ ຮອງປະທານ ແລະ ເລຂາທິການ ຄະນະກຳມະການ ໂອແລັມປິກແຫ່ງຊາດລາວ, ທ່ານ ສີຈັນ ຈິດຕະປັນຍາ ຫົວໜ້າກົມກິລາລະດັບສູງ ກະຊວງ ສສກ, ທ່ານ ສອນເພັດ ຈັນດານຸວົງ ຮອງອຳນວຍການ ສະຖາບັນກິລາ-ກາຍະກຳ, ຫົວໜ້າກຳມະການເຕັກນິກຈັດການແຂ່ງຂັນ, ທ່ານ ພະສິນ ປັນດີ ຜູ້ຈັດການໃຫຍ່ ບໍລິສັດ ລາວໂຄຄາ-ໂຄລາ ບອ໊ຕຕລິງ ຈຳກັດ, ທ່ານ ແຮັບປີ້ ສີສົມພອນ ຜູ້ອຳນວຍການ ບໍລິສັດ ຮຸ່ງອາລຸນ ການຄ້າເອເລັກໂຕນິກ ຈຳກັດ.
ການແຂ່ງຂັນຄັ້ງນີ້, ຖືວ່າເປັນຄັ້ງສຳຄັນທີ່ມີທີມເຂົ້າຮ່ວມເຖິງ 146 ທີມ ຈາກທົ່ວປະເທດ. ໂດຍແບ່ງການຄັດເລືອກເປັນ 3 ພາກໃຫຍ່ (ນະຄອນຫຼວງວຽງຈັນ, ພາກໃຕ້ ແລະ ພາກເໜືອ) ເພື່ອເລືອກເອົາ 8 ທີມຊາຍ ແລະ 4 ທີມຍິງ ເຂົ້າສູ່ຮອບຊີງຊະນະເລີດທົ່ວປະເທດ ຢູ່ທີ່ນະຄອນຫຼວງວຽງຈັນ ໃນທ້າຍເດືອນມີນາ 2026.
ການແຂ່ງຂັນຮອບຄັດເລືອກ 9 ຕົວເມືອງ ຂອງນະຄອນຫຼວງວຽງຈັນ ມີທັງໝົດ 123 ທີມ (ທີມຍິງ ແລະ ທີມຊາຍ) ນຳໃຊ້ 4 ສະໝາມໃນການແຂ່ງຂັນ (ສະໜາມກິລາລ້ານຊ້າງສະເຕດ້ຽມໜອງໄຮ, ສະໜາມກິລາ ສະຖາບັນກິລາ - ກາຍະກຳ, ສະໜາມກິລາປົກຄອງເມືອງສັງທອງ ແລະ ສະໜາມກິລາປົກຄອງເມືອງປາກງື່ມ) ເພື່ອຄັດເລືອກເອົາ 3 ທີມຊາຍ ແລະ 2 ທີມຍິງເຂົ້າສູ່ການແຂ່ງຂັນຮອບສຸດທົ່ວປະເທດ, ການແຂ່ງຂັນຮອບຄັດເລືອກ ພາກໃຕ້ຈະຈັດຂຶ້ນທີ່ ແຂວງສາລະວັນ ທັງໝົດ 11 ທີມ ລວມມີ 7 ທີມຊາຍ ແລະ 4 ທີມຍິງ ຊຶ່ງຄັດເລືອກເອົາ 2 ທີມຊາຍ ແລະ 1 ທີມຍິງເຂົ້າສູ່ຮອບການແຂ່ງຂັນທົ່ວປະເທດ ທີ່ນະຄອນຫຼວງວຽງຈັນ, ການແຂ່ງຂັນຮອບຄັດເລືອກ ພາກເໜືອຈະຈັດຂຶ້ນ ທີ່ແຂວງຫຼວງພະບາງ ທັງໝົດ 12 ທີມ ລວມມີ 8 ທີມຊາຍ ແລະ 4 ທີມຍິງ ຊຶ່ງຄັດເລືອກເອົາ 2 ທີມຊາຍ ແລະ 1 ທີມຍິງເຂົ້າສູ່ຮອບການແຂ່ງຂັນທົ່ວປະເທດ ທີ່ນະຄອນຫຼວງວຽງຈັນ ແລະ ພ້ອມໂຄຕ້າພິເສດທີມຊາຍອັນດັບ 3 ທີ່ດີທີ່ສຸດອີກ 1 ທີມ.ການແຂ່ງຂັນຈະເລີ່ມຂຶ້ນຢ່າງເປັນທາງການໃນວັນທີ 9 ກຸມພາ 2026 ແລະ ຈະໄປຕັດສິນແຊັມໃນຮອບຊີງຊະນະເລີດທົ່ວປະເທດ ທີ່ນະຄອນຫຼວງວຽງຈັນ ແຕ່ວັນທີ 23-31 ມີນາ 2026 ໂດຍມີລາງວັນລວມມູມຄ່າ 130,000,000 ກີບ, ລາຍລະອຽດ ຄື: ລາງວັນທີ 1: ຂັນໜຶ່ງໜ່ວຍ, ຫຼຽນລາງວັນ 27 ຫຼຽນ ພ້ອມເງິນສົດ 50,000,000 ກີບ, ມີຜະລິດຕະພັນອື່ນໆ 20,000,000 ກີບ ລວມມູນຄ່າທັງໝົດ 70,000,000 ກີບ, ລາງວັນທີ 2: ຫຼຽນລາງວັນ 27 ຫຼຽນ ພ້ອມເງິນສົດ 30,000,000 ກີບ, ມີຜະລິດຕະພັນອື່ນໆ 10,000,000 ກີບ ລວມມູນຄ່າທັງໝົດ 40,000,000 ກີບ, ລາງວັນທີ 3: ຫຼຽນລາງວັນ 27 ຫຼຽນ ພ້ອມເງິນສົດ 15,000,000 ກີບ, ມີຜະລິດຕະພັນອື່ນໆ 5,000,000 ກີບ ລວມມູນຄ່າທັງໝົດ 20,000,000 ກີບ. ການແຂ່ງຂັນ COPA COCA COLA LAOS 2026 ບໍ່ແມ່ນພຽງແຕ່ການແຂ່ງຂັນກິລາ, ແຕ່ຄືຄວາມມຸ່ງໝັ້ນຮ່ວມກັນຂອງພາກລັດ ແລະ ເອກະຊົນ ໃນການສ້າງອະນາຄົດທີ່ສົດໃສໃຫ້ແກ່ເຍົາວະຊົນລາວ ພາຍໃຕ້ຈິດວິນຍານແຫ່ງ "ນ້ຳໃຈນັກກິລາ" ຢ່າງແທ້ຈິງ.
ການແຂ່ງຂັນໃນຄັ້ງນີ້, ໄດ້ຮັບການສະໜັບສະໜູນຈາກ ບໍລິສັດ ລາວໂຄຄາ-ໂຄລາ ບ໊ອຕຕລິງ ຈຳກັດ, ຖືເປັນອົງກອນຕົວຢ່າງທີ່ມີຄວາມຮັບຜິດຊອບຕໍ່ສັງຄົມສູງ ແລະ ໄດ້ໃຫ້ຄວາມສຳຄັນຢ່າງສະເໝີຕົ້ນສະເໝີປາຍ ໃນການຮ່ວມສ້າງບຸກຄະລາກອນກິລາໃຫ້ແກ່ປະເທດຊາດ ແລະ ໄດ້ສະໜັບສະໜູນມາຍາວນານເຖິງ 10 ປີເຕັມ ໄດ້ສະທ້ອນໃຫ້ເຫັນເຖິງເຈດຈຳນົງອັນແຮງກ້າຂອງບໍລິສັດ ໃນການເປັນແຮງຍູ້ດັນ ໃຫ້ເຍົາວະຊົນລາວໄດ້ມີເວທີສະແດງຄວາມສາມາດ ເພື່ອພັດທະນາຕົນເອງໃຫ້ກາຍເປັນນັກກິລາອາຊີບທີ່ມີຄຸນນະພາບ.
(ຂ່າວ: ໂຄຄາ-ໂຄລາ)
ຄໍາເຫັນ