 |
ພິທີຖະແຫຼງຂ່າວການແຂ່ງຂັນເຕະບານໃນຄັ້ງນີ້ ຈັດຂຶ້ນ ໃນວັນທີ 14 ກໍລະກົດ ນີ້5 ທີ່ຫ້ອງປະຊຸມດອນຈັນພາເລດ, ໂດຍມີ ທ່ານ ພູວົງ ວົງຄຳຊາວ ຮອງເຈົ້າຄອງ ນະຄອນຫຼວງວຽງຈັນ (ນວ) ປະທານສະມາຄົມກິລາ-ກາຍຍະກຳ ນວ ທັງເປັນປະທານຈັດການແຂ່ງຂັນ, ທ່ານ ສົມພອນ ສູນດາລາ ຫົວໜ້າພະແນກສຶກສາທິການ ແລະ ກິລາ ນວ, ທ່ານ ຄຳຫວັນ ນັນທະວົງ ປະທານສະຫະພັນບານເຕະ ນວ ແລະ ທ່ານ ຈັນສະ ໝອນ ຜ່ອງຈັນທາ ຜູ້ອຳນວຍການຝ່າຍການຕະຫຼາດ ບໍລິສັດ ເບຍລາວ ຈຳກັດ ພ້ອມດ້ວຍບັນດາຜູ້ໃຫ້ການສະໜັບສະໜູນ, ຄະນະນຳ, ຄູຝຶກ, ນັກກິລາ ຕະຫຼອດຮອດສື່ມວນຊົນເຂົ້າຮ່ວມ.
ການແຂ່ງຂັນລາຍການນີ້ ຈະຈັດຂຶ້ນລະຫວ່າງວັນທີ 19 ກໍລະກົດ ຫາ 16 ສິງຫາ 2025 ທີ່ສະໜາມກິລາເຕະບານຫຍ້າທຽມ ລ້ານຊ້າງ ບ້ານໜອງໄຮ ເມືອງຫາດຊາຍຟອງ ນະຄອນຫຼວງວຽງຈັນ ຊຶ່ງມີ 13 ພາກສ່ວນເຂົ້າຮ່ວມຊີງໄຊ ແລະ ຖືກຈັດແບ່ງອອກເປັນ 3 ກຸ່ມ ແຕ່ລະກຸ່ມແຂ່ງຂັນພົບກັນໝົດ ຄັດເລືອກເອົາອັນດັບທີ 1-2 ຂອງແຕ່ລະກຸ່ມ ຜ່ານເຂົ້າຮອບ 8 ທີມສຸດທ້າຍ ແລະ ຄັດເລືອກເອົາທີມອັນດັບທີ 3 ທີ່ມີຄະແນນດີທີ່ສຸດອີກ 2 ທີມຈາກ 3 ກຸ່ມຕື່ມອີກເພື່ອໃຫ້ຄົບ 8 ທີມ.
ສຳລັບ ກຸ່ມ ເອ ປະກອບມີ: ເມືອງຫາດຊາຍຟອງ, ເມືອງນາຊາຍທອງ, ເມືອງໄຊເຊດຖາ ເອ, ເມືອງຈັນທະບູລີ ແລະ ເມືອງໄຊເຊດຖາ; ກຸ່ມ ບີ ປະກອບມີ: ເມືອງໄຊທານີ, ເອັດອີຊີ ຢູໄນເຕັດ ໄຊທານີ, ເມືອງປາກງື່ມ ແລະ ເມືອງສີໂຄດຕະບອງ; ກຸ່ມ ຊີ ປະກອບມີ: ເມືອງສີສັດຕະນາກ, ເມືອງຫາດ ຢູໄນເຕັດ, ເມືອງສັງທອງ ແລະ ເອັມເອັນ ໂລຈີສຕິກ.
 |
ລາຍການດັ່ງກ່າວ ທຸກ 13 ພາກສ່ວນທີ່ເຂົ້າຮ່ວມແຂ່ງຂັນ ແມ່ນໄດ້ຮັບການສະໜັບສະໜູນເຄື່ອງກິລາ ມູນຄ່າທີມລະ 5 ລ້ານກີບ ຊີງເງິນລາງວັນລວມ 100 ລ້ານກີບ.
ພ້ອມນັ້ນໃນພິທີ, ບໍລິສັດ ເບຍລາວ ຈຳກັດ ຍັງໄດ້ສະໜັບສະໜູນການແຂ່ງຂັນລາຍການດັ່ງກ່າວ ລວມມູນຄ່າ 600 ລ້ານກີບ ຕາງໜ້າມອບໂດຍ ທ່ານ ຈັນສະໝອນ ຜ່ອງຈັກທາ ຜູ້ອຳນວຍການຝ່າຍການຕະຫຼາດ ບໍລິສັດ ເບຍລາວ ຈຳກັດ ແລະ ຕາງໜ້າຮັບໂດຍ ທ່ານ ພູວົງ ວົງຄຳຊາວ ຮອງເຈົ້າຄອງ ນວ ທັງເປັນປະທານສະມາຄົມກິລາ-ກາຍຍະກຳ ນວ.
(ຂ່າວ-ພາບ: ຕຸໄລເພັດ)
ຄໍາເຫັນ