ຖະແຫຼງຜົນສຳເລັດໃນການພິຈາລະນາວຽກງານຂອງ ສານແລະ ອົງການໄອຍະການ

ຕອນແລງວັນທີ 9 ພະຈິກນີ້ ທີ່ສະພາແຫ່ງຊາດ, ທ່ານ ນາງ ສູນທອນ ໄຊຍະຈັກ ເລຂາທິການສູນກາງພັກຮອງປະທານສະພາແຫ່ງຊາດ ໄດ້ຖະແຫຼງຂ່າວກ່ຽວກັບຜົນສຳເລັດຂອງກອງປະຊຸມສະໄໝສາມັນ ເທື່ອທີ 6 ສະພາແຫ່ງຊາດ ຊຸດທີ IX ໃນການພິຈາລະນາວຽກງານຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ວ່າ:
    ໃນວັນທີ 8 ແລະ ວັນທີ 9 ພະຈິກ 2023 ນີ້, ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໄດ້ຮັບຟັງ ແລະ ພິຈາລະນາເນື້ອໃນສຳຄັນຕ່າງໆ ຄື:ບົດລາຍງານ ຂອງສານປະຊາຊົນສູງສຸດ ກ່ຽວກັບການຈັດຕັ້ງປະຕິບັດວຽກງານ ສານປະຊາຊົນສູງສຸດ ກາງສະໄໝ ແລະ ປະຕິບັດແຜນການ ປະຈໍາປີ 2023, ທິດທາງແຜນການທ້າຍສະໄໝ (2023-2025) ແລະ ແຜນປະຈໍາປີ 2024  ຊຶ່ງສະເໜີໂດຍທ່ານ ນາງ ວຽງທອງ ສີພັນດອນ, ປະທານສານປະຊາຊົນສູງສຸດ;ບົດລາຍງານ ຂອງຫົວໜ້າອົງການໄອຍະການປະຊາຊົນສູງສຸດ ກ່ຽວກັບການຈັດຕັ້ງປະຕິບັດວຽກງານຂອງອົງການໄອຍະການປະຊາຊົນສູງສຸດ ກາງສະໄໝ ແລະ ປະຕິບັດແຜນການ ປະຈໍາປີ 2023, ທິດທາງແຜນການທ້າຍສະໄໝ (2023-2025) ແລະ ແຜນປະຈໍາປີ 2024  ຊຶ່ງສະເໜີໂດຍ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ;ບົດປະກອບຄວາມເຫັນຂອງຄະນະປະຈຳສະພາແຫ່ງຊາດ ຕໍ່ສອງບົດລາຍງານດັ່ງກ່າວ ຊຶ່ງສະເໜີໂດຍທ່ານ ຄຳແພງ ວິລະພັນ ກຳມະການຄະນະປະຈຳສະພາແຫ່ງຊາດ, ປະທານກຳມາທິການຍຸຕິທຳ ສະພາແຫ່ງຊາດ.
    ເປັນເວລາ 1 ວັນເຄິ່ງ ທີ່ກອງປະຊຸມໄດ້ຮັບຟັງການລາຍງານ ກ່ຽວກັບ ການຈັດຕັ້ງປະຕິບັດແຜນການເຄື່ອນໄຫວວຽກງານ ກາງສະໄໝ 5 ປີ (2021-2025) ແລະ ທິດທາງແຜນການທ້າຍສະໄໝ ຮອດປີ 2025, ການຈັດຕັ້ງປະຕິບັດແຜນການ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງສານປະຊາຊົນສູງສຸດ, ອົງການໄອຍະການປະຊາຊົນສູງສຸດ ແລະ ການປະກອບຄໍາເຫັນ ຂອງຕາງໜ້າຄະນະປະຈໍາສະພາແຫ່ງຊາດ ຕໍ່ບົດລາຍງານ ຂອງສອງອົງການ.
    ຜ່ານການປະກອບຄໍາເຫັນ ຂອງບັນດາທ່ານສະມາຊິກສະພາແຫ່ງຊາດ ຈໍານວນ 30 ກວ່າທ່ານ, ເຫັນວ່າບັນດາສະມາຊິກສະພາແຫ່ງຊາດ ໄດ້ຍົກສູງຄວາມຮັບຜິດຊອບໃນການຄົ້ນຄວ້າຢ່າງກົງໄປກົງມາ ແລະ ມີຈຸດສຸມ ຕໍ່ບົດລາຍງານ ຂອງທັງ 2 ອົງການ.ບັນດາທ່ານ ສະມາຊິກສະພາແຫ່ງຊາດ ໄດ້ສະແດງຄວາມຊົມເຊີຍ ແລະ ເປັນເອກະພາບ ຕໍ່ບັນດາຜົນງານ, ຜົນສໍາເລັດດ້ານຕ່າງໆ ທີ່ທັງ 2 ອົງການຍາດມາໄດ້ ໃນໄລຍະຜ່ານມາ. ແຕ່ເພື່ອເຮັດໃຫ້ການຈັດຕັ້ງ ແລະ ການເຄື່ອນໄຫວວຽກງານຂອງ ສອງອົງການ ໄດ້ຮັບການຈັດຕັ້ງປະຕິບັດ ບັນລຸຕາມແຜນການ ແລະ ມີຜົນສໍາເລັດ ຕາມລະດັບຄາດໝາຍ, ບັນດາທ່ານສະມາຊິກສະພາແຫ່ງຊາດ ໄດ້ສະເໜີໃຫ້ ສອງອົງການ ເອົາໃຈໃສ່ຈັດຕັ້ງປະຕິບັດພາລະບົດບາດຂອງຕົນ ໃຫ້ດີຂຶ້ນຕື່ມດັ່ງນີ້:
    - ຕໍ່ກັບສານປະຊາຊົນສູງສຸດ: 1. ສືບຕໍ່ນຳພາ-ຊີ້ນຳ ຈັດຕັ້ງຜັນຂະຫຍາຍ 6 ຄາດໝາຍສູ້ຊົນ ແລະ 10 ແຜນງານຈຸດສຸມ ປີ 2024 ໂດຍມີມາດຕະການ, ວິທີການຈັດຕັ້ງປະຕິບັດ ໃຫ້ລະອຽດ,ຈະແຈ້ງ, ເຂັ້ມງວດ ເພື່ອປະຕິບັດບັນດາແຜນວຽກຈຸດສຸມ ໃຫ້ມີຜົນສໍາເລັດ ຕາມຄາດໝາຍທີ່ໄດ້ວາງໄວ້;2.ສືບຕໍ່ຄົ້ນຄວ້າ, ປັບປຸງກົງຈັກການຈັດຕັ້ງຂອງສານປະຊາຊົນແຕ່ລະຂັ້ນ ໃຫ້ເໝາະສົມຕາມຄວາມຮຽກຮ້ອງຕ້ອງການ; ຍົກລະດັບຄວາມຮູ້, ຄວາມສາມາດ ໃຫ້ແກ່ຜູ້ພິພາກສາ, ພະນັກງານສານ ໃຫ້ມີຄຸນທາດການເມືອງ, ຄຸນສົມບັດສິນທຳປະຕິວັດ, ຈັນຍາບັນ-ຈັນຍາທຳ ໜັກແໜ້ນ, ມີຄວາມຮູ້ຄວາມສາມາດທາງດ້ານວິຊາສະເພາະ ເພື່ອບໍລິຫານ, ແກ້ໄຂຄະດີ ໃຫ້ມີຄຸນນະພາບ; ສ້າງເງື່ອນໄຂໃຫ້ຜູ້ພິພາກສາ ໄດ້ຮັບການຕີລາຄາປະເມີນ ໃນຂອບເຂດທົ່ວປະເທດ ແລະ ເລືອກໄດ້ຜູ້ພິພາກສາດີ-ເກັ່ງ ໃຫ້ໄດ້ຫຼາຍກວ່າ 25% ຂອງຜູ້ພິພາກສາທັງໝົດ;3.ເອົາໃຈໃສ່ຄົ້ນຄວ້າ ສ້າງ, ປັບປຸງ ແລະ ປະເມີນຄືນ ບັນດານິຕິກໍາທີ່ນອນໃນຄວາມຮັບຜິດຊອບຂອງຕົນ ໂດຍສະເພາະແມ່ນບັນດານິຕິກໍາທີ່ພົວພັນກັບການດໍາເນີນຄະດີແພ່ງ ເພື່ອສ້າງຄວາມເປັນເອກກະພາບ ໃນການປະຕິບັດໜ້າທີ່ວຽກງານ ຂອງສານປະຊາຊົນແຕ່ລະຂັ້ນ;4.ເອົາໃຈໃສ່ວຽກງານຄຸ້ມຄອງ, ນຳພາ-ຊີ້ນຳ ແລະ ກວດກາ ສານປະຊາຊົນຂັ້ນລຸ່ມ ແນະນໍາ, ກວດກາຄວາມຖືກຕ້ອງ ແລະ ຄວາມເປັນເອກະພາບໃນການດຳເນີນຄະດີຂອງສານປະຊາຊົນແຕ່ລະຂັ້ນ, ຮັບປະກັນການດຳເນີນຄະດີຂອງສານປະຊາຊົນ ມີຄວາມຮອບດ້ານ, ຄົບຖ້ວນ, ພາວະວິໄສ, ຖືກຕ້ອງຕາມກົດໝາຍ ແລະ ຄວາມເປັນຈິງແຕ່ຫົວທີ ເພື່ອຫຼຸດຜ່ອນການຂໍອຸທອນ, ຂໍລົບລ້າງ ແລະ ຂໍຮື້ຟື້ນຄະດີຄືນໃໝ່ຫຼົບໄປຫຼົບມາຫຼາຍເທື່ອ ແລະ ສູ້ຊົນແກ້ໄຂຄະດີ ທີ່ເຂົ້າມາສານແຕ່ລະຂັ້ນ ໃຫ້ບັນລຸ 85% ຕາມຄາດໝາຍທີ່ວາງໄວ້;5.ຍູ້ແຮງກົນໄກການບໍລິຫານສານ ເພື່ອຮັບປະກັນເຮັດໃຫ້ປະຊາຊົນ ໄດ້ເຂົ້າເຖິງຂະບວນຍຸຕິທຳ ມີຄວາມວ່ອງໄວ ແລະ ໂປ່ງໃສ ຕາມກົດໝາຍ; ເອົາໃຈໃສ່ສ້າງເງື່ອນໄຂໃຫ້ໂຈດ, ຈຳເລີຍ, ບຸກຄົນທີສາມ ແລະ ທະນາຍຄວາມ ເຂົ້າຮ່ວມໃນການ ໂຕ້ແຍ້ງ, ໂຕ້ຖຽງ, ຊີ້ແຈງ ແລະ ອະທິບາຍຂໍ້ມູນຫຼັກຖານໃນທີ່ປະຊຸມສານ ແຕ່ຫົວທີ;6.ເອົາໃຈໃສ່ຄົ້ນຄວ້າ ສ້າງ ແລະ ປັບປຸງ ກົນໄກການປະສານສົມທົບ ລະຫວ່າງ ສານປະຊາຊົນ ກັບພາກສ່ວນທີ່ກ່ຽວຂ້ອງ ແນໃສ່ຍົກສູງຄຸນນະພາບການເຄື່ອນໄຫວວຽກງານການດໍາເນີນຄະດີໃຫ້ຖືກຕ້ອງຕາມພາລະບົດບາດ, ຂອບເຂດສິດ ແລະ ໜ້າທີ່ ຕາມກົດໝາຍໄດ້ກໍານົດໄວ້.
- ຕໍ່ກັບອົງການໄອຍະການປະຊາຊົນສູງສຸດ:1.ສືບຕໍ່ນຳພາ-ຊີ້ນຳ ຈັດຕັ້ງຜັນຂະຫຍາຍ 5 ຄາດໝາຍສູ້ຊົນ, 10 ວຽກຈຸດສຸມປີ 2024 ໃຫ້ເປັນແຜນວຽກ ແລະມີມາດຕະການລະອຽດໃນການຈັດຕັ້ງປະຕິບັດໃຫ້ສໍາເລັດຕາມຄາດໝາຍທີ່ໄດ້ວາງໄວ້;2.ສືບຕໍ່ຄົ້ນຄວ້າ ແລະ ຈັດຕັ້ງຜັນຂະຫຍາຍ ຜົນການປະເມີນການຈັດຕັ້ງປະຕິບັດກົດໝາຍວ່າດ້ວຍ ອົງການໄອຍະການປະຊາຊົນ ແລະ ກົດໝາຍວ່າດ້ວຍ ການດໍາເນີນຄະດີອາຍາ ເພື່ອກ້າວໄປເຖິງການປັບປຸງ ຫຼື ອອກນິຕິກໍາໃຕ້ກົດໝາຍ ໃຫ້ແທດເໝາະກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່;3.ເອົາໃຈໃສ່ປັບປຸງກົງຈັກການຈັດຕັ້ງ ຂອງອົງການໄອຍະການປະຊາຊົນແຕ່ລະຂັ້ນ ໃຫ້ເປັນລະບົບ ແລະ ເໝາະສົມ; ກໍ່ສ້າງພະນັກງານໄອຍະການ ທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ຈັນຍາບັນ-ຈັນຍາທຳ, ຄວາມຮູ້ຄວາມສາມາດ ໃຫ້ມີຄຸນນະພາບ ເພື່ອບັນຈຸ, ສັບຊ້ອນ ເຂົ້າໃສ່ກົງຈັກການຈັດຕັ້ງນັບແຕ່ສູນກາງລົງຮອດທ້ອງຖິ່ນເພື່ອຕອບສະໜອງ ຕາມຄວາມຮຽກຮ້ອງຕ້ອງການໜ້າທີ່ການເມືອງ ທີ່ໄດ້ຮັບມອບໝາຍ;4.ສຸມໃສ່ປັບປຸງກົນໄກ, ຮູບການ ແລະ ວິທີການ ໃນການປະຕິບັດພາລະບົດບາດ ຕິດຕາມກວດກາການປະຕິບັດກົດໝາຍ ວ່າດ້ວຍອົງການໄອຍະການປະຊາຊົນ ໃຫ້ມີຄວາມຖືກຕ້ອງ, ເຂັ້ມງວດກວ່າເກົ່າ ເປັນຕົ້ນ ການຕິດຕາມກວດກາການປະຕິບັດກົດໝາຍ ຂອງອົງການສືບສວນ-ສອບສວນ; ການສັ່ງຟ້ອງຜູ້ຖືກຫາຂຶ້ນສານ; ການຕິດຕາມກວດກາການປະຕິບັດຄໍາຕັດສິນຂອງສານ ແລະ ການປະຕິບັດກົດໝາຍໃນສະຖານທີ່ກັກຕົວ, ສະຖານທີ່ກັກຂັງ, ສູນດັດສ້າງ, ຄ້າຍດັດສ້າງ, ສຸມໃສ່ແກ້ໄຂຄວາມຫຍຸ້ງຍາກໃນວຽກງານດັ່ງກ່າວ;5.ສືບຕໍ່ຄົ້ນຄວ້າ ສ້າງ ແລະ ປັບປຸງ ກົນໄກການປະສານສົມທົບກັບພາກສ່ວນທີ່ກ່ຽວຂ້ອງ ໃນການເຄື່ອນໄຫວຕິດຕາມກວດກາການປະຕິບັດກົດໝາຍ ຂອງອົງການທີ່ກ່ຽວຂ້ອງ ແນໃສ່ຍົກສູງຄວາມຮັບຜິດຊອບການເມືອງ ຂອງແຕ່ລະພາກສ່ວນຕາມພາລະບົດບາດ, ສິດ ແລະ ໜ້າທີ່ຂອງຕົນ ເຮັດໃຫ້ສະຕິເຄົາລົບ, ປະຕິບັດລັດຖະທໍາມະນູນ ແລະ ກົດໝາຍ ໃນຖັນແຖວປະຊາຊົນໃຫ້ນັບມື້ດີຂຶ້ນ.
ພ້ອມນີ້, ກໍໄດ້ກ່າວຖະແຫຼງໃຫ້ຮູ້ວ່າ: ພາຍຫຼັງທີ່ມີການປະກອບຄໍາເຫັນ ຂອງບັນດາສະມາຊິກສະພາແຫ່ງຊາດແລ້ວ ບັນດາທ່ານ ປະທານສານປະຊາຊົນສູງສຸດ, ຫົວໜ້າອົງການໄອຍະການປະຊາຊົນສູງສຸດ, ລັດຖະມົນຕີກະຊວງຍຸຕິທໍາ ແລະ ຮອງລັດຖະມົນຕີກະຊວງປ້ອງກັນຄວາມສະຫງົບ ໄດ້ຂຶ້ນຊີ້ແຈງ ແລະ ຕອບຄໍາຊັກຖາມ ຂອງສະມາຊິກສະພາແຫ່ງຊາດ ຢ່າງກົງໄປກົງມາ ເພື່ອເຮັດໃຫ້ວຽກງານດັ່ງກ່າວ ສາມາດສ້າງການຫັນປ່ຽນທີ່ຕັ້ງໜ້າ ໃນຕໍ່ໜ້າ.(ຂ່າວ-ພາບ: ສຸກສະຫວັນ)