 |
ສະຫາຍ ນາງ ເພັດສະໝອນ ແກ້ວໂສພາ ກ່າວວ່າ: ໃນໄລຍະຜ່ານມາ, ກິດຈະກໍານ້ອງຢາກເປັນນັກ ວິທະຍາສາດ ໄດ້ຈັດຕັ້ງປະຕິບັດຢູ່ກະຊວງວິທະຍາສາດ ແລະ ເຕັກໂນໂລຊີໃນເມື່ອກ່ອນ ເພື່ອສ້າງຄວາມຮັບຮູ້, ຄວາມເຂົ້າໃຈ ແລະ ປູກຈິດສໍານຶກ ທາງດ້ານວຽກງານໃນຂະແໜງວິທະຍາສາດໃຫ້ນັກຮຽນ, ນັກສຶກສາ ສາມາດເຂົ້າເຖິງຂໍ້ມູນໄດ້ຢ່າງກວ້າງຂວາງ ດ້ວຍຮູບການລົງເຜີຍແຜ່ບັນດາໂຮງຮຽນທັງພາກລັດ ແລະ ເອກະຊົນ ຊຶ່ງເຫັນວ່າມີຜົນຕອບຮັບເປັນຢ່າງດີ, ພາຍຫຼັງມີການປັບປຸງກົງຈັກການຈັດຕັ້ງ ໂດຍໂຮມເອົາວຽກງານວິທະຍາສາດ ມາຂຶ້ນກັບກະຊວງ ສສກ ນັບທັງອົງການຈັດຕັ້ງຊາວໜຸ່ມ. ສະນັ້ນ, ເພື່ອເປັນການສືບຕໍ່ກິດຈະກໍາດັ່ງກ່າວ ແລະ ເຫັນໄດ້ເຖິງຄວາມສໍາຄັນທາງດ້ານວຽກງານວິທະຍາສາດ ທີ່ຕິດພັນກັບການສຶກສາຮໍ່າຮຽນ, ເສີມທັກສະຫົວຄິດປະດິດສ້າງ, ໃຫ້ຂໍ້ມູນໃໝ່ໆທີ່ມີຫຼັກວິທະຍາສາດ, ສ້າງຄວາມຮັບຮູ້ຄວາມເຂົ້າໃຈ ແລະ ຮັກໃນວຽກງານວິທະຍາສາດ ຂອງນັກຮຽນ, ນັກສຶກສາ ຊຶ່ງຈະເປັນກໍາລັງແຮງໃນອະນາຄົດຂອງປະເທດຊາດ. ນອກຈາກນັ້ນ, ຍັງໃຫ້ເຂົາເຈົ້າມີຄວາມກະຕືລືລົ້ນໃນການຍົກລະດັບຄວາມຮູ້, ຄວາມສາມາດ, ຊອກທຸກເງື່ອນໄຂ ເພື່ອໃຫ້ມີຄວາມຮັບຜິດຊອບໃນການພັດທະນາຕົນເອງ ໃຫ້ກາຍເປັນນັກວິທະຍາສາດໜຸ່ມນ້ອຍໃນສະເພາະໜ້າ ແລະ ຍາວນານ.
 |
ການຈັດກິດຈະກໍາດັ່ງກ່າວ, ເພື່ອປູກຈິດສໍານຶກໃຫ້ຊາວໜຸ່ມ ນັກຮຽນ, ນັກສຶກສາ ກ່ຽວກັບການເປັນນັກ ວິທະຍາສາດຢູ່ບັນດາໂຮງຮຽນມັດທະຍົມສຶກສາສົມບູນ ພາຍໃນ ນວ ໃຫ້ຄວາມຮູ້ພື້ນຖານທາງດ້ານວິທະຍາສາດ, ຈັດການແຂ່ງຂັນຖາມ-ຕອບ ກ່ຽວກັບວຽກງານວິທະຍາສາດ ແລະ ຈະໄດ້ສອບຖາມຄວາມຄິດເຫັນຈາກນັກຮຽນ ກ່ຽວກັບການຢາກເປັນນັກວິທະຍາສາດໃນອະນາຄົດ ຊຶ່ງກິດຈະກໍາຄັ້ງນີ້ ຈະໄດ້ດໍາເນີນຢູ່ບັນດາໂຮງຮຽນ 5 ແຫ່ງ ປະກອບມີ: ໂຮງຮຽນມັດທະຍົມສຶກສາສົມບູນ ພອນສະຫວັນແຫ່ງຊາດ; ໂຮງຮຽນມັດທະຍົມສຶກສາສົມບູນ ປາດຖະໜາ; ໂຮງຮຽນມັດທະຍົມສຶກສາສົມບູນວຽງຈັນ; ໂຮງຮຽນມັດທະຍົມສຶກສາສົມບູນ ຕານມີໄຊ ແລະ ໂຮງຮຽນມັດທະຍົມສຶກສາສົມບູນ ເພຍວັດ.
 |
ການຖາມ-ຕອບວິທະຍາສາດຄັ້ງນີ້, ມີນັກຮຽນເຂົ້າຮ່ວມແຂ່ງຂັນທັງໝົດ 8 ທີມ, ທີມລະ 3 ຄົນ ນັບແຕ່ຊັ້ນ ມ1-ມ7. ຜ່ານການແຂ່ງຂັນ ທີ 1 ແມ່ນທີມ ມ5 ໄດ້ຮັບເງິນ 1,000,000 ກີບ, ພ້ອມຫຼຽນລາງວັນ ແລະ ໃບຍ້ອງຍໍ; ທີ 2 ທີມ ມ6 ໄດ້ຮັບເງິນຈໍານວນ 700,000 ກີບ ພ້ອມຫຼຽນ ແລະ ໃບຍ້ອງຍໍ ແລະ ທີ 3 ທີມ ມ7 ໄດ້ຮັບເງິນຈໍານວນ 500,000 ກີບ ພ້ອມຫຼຽນລາງວັນ ແລະ ໃບຍ້ອງຍໍ.
 |
ຂ່າວ-ພາບ: ບົວລະພາ
ຄໍາເຫັນ