ທ່ານ ບຸນທອງ ຈິດມະນີ ເນັ້ນ 8 ບັນຫາເພື່ອເຮັດໃຫ້ວຽກງານກຳມະບານມີການຫັນປ່ຽນໃໝ່ຢ່າງຕັ້ງໜ້າ

ໃນໂອກາດເຂົ້າຮ່ວມກອງປະຊຸມຄົບຄະນະກາງສະໄໝຂອງຄະນະບໍລິຫານງານສູນກາງສະຫະພັນກຳມະບານລາວ (ສກລ) ສະໄໝທີ VIII,ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດແຫ່ງ ສປປ ລາວ ໄດ້ໃຫ້ກຽດໂອ້ລົມຕໍ່ກອງປະຊຸມດັ່ງກ່າວຊຶ່ງໄດ້ຈັດຂຶ້ນໃນວັນທີ 21ທັນວານີ້ທີ່ສູນການຮ່ວມມືສາກົນ ແລະ ການຝຶກອົບຮົມລາວ-ຍີ່ປຸ່ນ ພາຍໃຕ້ການເປັນປະທານຂອງທ່ານ ເລັດ ໄຊຍະພອນ ປະທານສູນກາງສະຫະພັນກຳມະບານລາວ, ມີຄະນະບໍລິຫານງານ ສກລ, ຫົວໜ້າກົມ, ຮອງກົມ, ປະທານສະຫະພັນກຳມະບານແຂວງອ້ອມຂ້າງເຂົ້າຮ່ວມ.
ໃນໂອກາດນີ້, ທ່ານ ບຸນທອງ ຈິດມະນີໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ ສກລ ຍາດມາໄດ້ໃນໄລຍະຜ່ານມາ. ພ້ອມເນັ້ນໜັກ 8 ບັນຫາເພື່ອເຮັດໃຫ້ວຽກງານກຳມະບານມີການຫັນປ່ຽນໃໝ່ຢ່າງຕັ້ງໜ້າ ເຂັ້ມແຂງ ໜັກແໜ້ນດັ່ງນີ້: 1.ເພີ່ມທະວີວຽກງານສຶກສາອົບຮົມການເມືອງ-ແນວຄິດໃຫ້ສະມາຊິກກຳມະບານ, ກຳມະກອນ ແລະ ຜູ້ອອກແຮງງານອື່ນໆ, ກຳແໜ້ນເຊື່ອມຊຶມຕໍ່ແນວທາງ, ແຜນນະໂຍບາຍ, ກົດໝາຍ, ລະບຽບການຂອງລັດ, ຮັບຮູ້ສິດ ແລະ ພັນທະຂອງຕົນເອງ, ຍົກລະດັບຄວາມຮູ້-ຄວາມສາມາດທາງດ້ານເຕັກໂນໂລຊີ, ມີລະບຽບວິໄນຂອງການອອກແຮງງານ; ວຽກອັນນີ້ແມ່ນເປັນທັງຂໍ້ແຂ່ງຂັນ ທັງເປັນພາລະບົດບາດຕົ້ນຕໍຂອງການຈັດຕັ້ງກໍາມະບານເຮົາ, ແຕ່ການໂຄສະນາສຶກສາອົບຮົມໃນເງື່ອນໄຂ ແລະ ສະພາບການໃໝ່ຕ້ອງເຮັດໃຫ້ມີຫຼາຍຮູບຫຼາຍສີ, ຫຼາກຫຼາຍວິທີ, ກວ້າງຂວາງ, ເລິກເຊິ່ງ ແລະ ປັບປຸງບັນດາເນື້ອໃນການໂຄສະນາສຶກສາອົບຮົມໃຫ້ແທດເໝາະກັບແຕ່ລະກຸ່ມເປົ້າໝາຍ;2. ເອົາໃຈໃສ່ຂະຫຍາຍການຈັດຕັ້ງ ແລະ ສະມາຊິກກໍາມະບານໃຫ້ເປັນລະບົບທີ່ເຂັ້ມແຂງແທ້ແຕ່ສູນກາງລົງຮອດຮາກຖານກໍາມະບານແຕ່ລະຂັ້ນ, ໃນນີ້ໃຫ້ເອົາໃຈໃສ່ວຽກກໍາມະບານຢູ່ຫົວໜ່ວຍແຮງງານພາກວິສາຫະກິດທັງຂອງລັດ ແລະ ຂອງເອກະຊົນໃຫ້ກວ້າງຂວາງຕາມຄາດໝາຍທີ່ກຳນົດໄວ້ ແລະ ມີຄວາມໝັ້ນຄົງເຂັ້ມແຂງ; ຊຸກຍູ້ທຸກໆການຈັດຕັ້ງທັງພາກລັດ ແລະ ເອກະຊົນໃຫ້ຄວາມຮ່ວມມືແກ່ສະຫະພັນກຳມະບານແຕ່ລະຂັ້ນ ໃນການຂະຫຍາຍການຈັດຕັ້ງ ແລະ ສະມາຊິກກຳມະບານເພື່ອຮັບປະກັນໃນການປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ ທັງຮັບປະກັນການປະຕິບັດກົດໝາຍ ກໍຄືລະບຽບວິໄນການອອກແຮງງານໃຫ້ຖືກຕ້ອງ ແລະ ມີປະສິດທິພາບດີ; 3. ເປັນເຈົ້າການໃນການປົກປ້ອງສິດ ແລະ ຜົນປະໂຫຍດອັນຊອບທໍາຂອງສະມາຊິກກຳມະບານ, ກຳມະກອນ ແລະ ຜູ້ອອກແຮງງານອື່ນໆ ໂດຍມີການປະສານສົມທົບຢ່າງສະໜິດແໜ້ນກັບພາກສ່ວນທີ່ກ່ຽວຂ້ອງໂດຍສະເພາະກັບຄະນະກຳມະການແຮງງານແຫ່ງຊາດ, ຄະນະກຳມະການແຮງງານຂັ້ນແຂວງ(ກະຊວງແຮງງານ ແລະ ສະຫວັດດີການສັງຄົມ, ສະຫະພັນກຳມະບານລາວ ແລະ ສະພາການຄ້າ ແລະ ອຸດສາຫະກຳແຫ່ງຊາດ) ໂດຍສະເພາະຊຸກຍູ້ການຈັດຕັ້ງປະຕິບັດຄ່າແຮງງານຂັ້ນຕໍ່າທີ່ລັດຖະບານປະກາດໃຊ້, ຕິດຕາມເຂົ້າຮ່ວມການແກ້ໄຂຂໍ້ຂັດແຍ່ງດ້ານແຮງງານ, ຊຸກຍູ້, ສົ່ງເສີມໃຫ້ຜູ້ໃຊ້ແຮງງານ ແລະ ຜູ້ອອກແຮງງານເຮັດສັນຍາແຮງງານລວມໝູ່, ບຸກຄົນ, ເຂົ້າເປັນສະມາຊິກອົງການປະກັນສັງຄົມ, ວຽກງານຄວາມປອດໄພ ແລະ ສຸຂະພາບແຮງງານ, ການເຂົ້າເຖິງການປົກປ້ອງທາງສັງຄົມ ແລະ ໂຄສະນາເຜີຍແຜ່ການໄປອອກແຮງງານທີ່ຖືກກົດໝາຍທັງຢູ່ພາຍໃນ ແລະ ຕ່າງປະເທດ ເພື່ອປ້ອງກັນບໍ່ໃຫ້ຕົກເປັນເຫຍື່ອຂອງການຄ້າມະນຸດ, ການເຄື່ອນຍ້າຍແຮງງານຊະຊາຍທັງເປັນການຊ່ວຍໜູນຜູ້ປະກອບການພາຍໃນແກ້ໄຂບັນຫາການຂາດແຄນກຳລັງແຮງງານທີ່ພວມເປັນບັນຫາເລັ່ງທວງໜຶ່ງໃນປັດຈຸບັນ;4. ເອົາໃຈໃສ່ບໍາລຸງ, ກໍ່ສ້າງພະນັກງານກໍາມະບານອາຊີບ, ເຄິ່ງອາຊີບ ທັງຢູ່ສູນກາງ ແລະ ທ້ອງຖິ່ນໃຫ້ມີການຫັນປ່ຽນຢ່າງຕັ້ງໜ້າ ແລະ ເລິກເຊິ່ງ, ກ່ອນອື່ນຕ້ອງເລີ່ມຈາກການຂຶ້ນແຜນກຳນົດພະນັກງານໃຫ້ຖືກຕ້ອງສອດຄ່ອງກັບພາລະບົດບາດ, ສິດ, ໜ້າທີ່ ແລະ ຄວາມຮັບຜິດຊອບຂອງການຈັດຕັ້ງກຳມະບານແຕ່ລະຂັ້ນ; ປັບປຸງການຈັດຕັ້ງກຳມະບານແຕ່ລະຂັ້ນຕິດພັນກັບການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງກຳມະບານ, ແບ່ງຂັ້ນຄຸ້ມຄອງວຽກງານກຳມະບານໃຫ້ຈະແຈ້ງຊັດເຈນ ເຄື່ອນໄຫວຕາມພາລະບົດບາດ, ສິດ, ໜ້າທີ່; ຊຸກຍູ້ໃຫ້ຄະນະນຳສະຫະພັນກຳມະບານແຕ່ລະຂັ້ນນຳພາ-ຊີ້ນຳປະຕິບັດກົດລະບຽບ ແລະ ກົດໝາຍກຳມະບານໃຫ້ຖືກຕ້ອງ. ໃນນີ້ໃຫ້ເອົາໃຈໃສ່ຕໍ່ການດຳເນີນຊີວິດການເມືອງໃຫ້ເປັນປົກກະຕິຕໍ່ເນື່ອງ ແລະ ມີເນື້ອໃນເລິກເຊິ່ງແທດກັບຕົວຈິງ ທັງໝົດທີ່ກ່າວມານີ້ເພື່ອສ້າງຄວາມເຂັ້ມແຂງໃຫ້ແກ່ການຈັດຕັ້ງກຳມະບານ; 5. ເປັນເຈົ້າການຈັດຕັ້ງປະຕິບັດ, ສະຫຼຸບປະເມີນຜົນເນື້ອໃນຂໍ້ແຂ່ງຂັນ 5 ເປັນເຈົ້າຂອງສະຫະພັນກຳມະບານລາວແຕ່ລະຂັ້ນ ໂດຍຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ, ປະຕິບັດວຽກງານວິຊາສະເພາະເພື່ອຊອກໃຫ້ເຫັນກົມກອງ ແລະ ບຸກຄົນດີເດັ່ນໃນຂະບວນການ; ຊຸກຍູ້ໃຫ້ສະຫະພັນກຳມະບານແຕ່ລະຂັ້ນ, ຫົວໜ່ວຍແຮງງານຕ່າງໆຈັດຕັ້ງຂະບວນການໃນໂອກາດວັນສຳຄັນຕ່າງໆຂອງຊາດ, ຂອງພັກ ແລະ ກຳມະບານໃຫ້ມີເນື້ອໃນເລິກເຊິ່ງ ແລະ ເປັນຂະບວນການທີ່ຟົດຟື້ນ;6. ຍົກສູງບົດບາດ ແລະ ຂີດຄວາມສາມາດຂອງອົງການກໍາມະບານລາວໃນເງື່ອນໄຂໃໝ່, ການເຕົ້າໂຮມກ້ອນກໍາລັງຊາວຜູ້ອອກແຮງງານເຂົ້າຮ່ວມໃນການປະຕິບັດແນວທາງນະໂຍບາຍຂອງພັກແຕ່ລະໄລຍະ, ເປັນຕົ້ນແມ່ນການປະກອບສ່ວນເຂົ້າໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ບັນຫາຂາດແຄນເງິນຕາຕ່າງປະເທດ, ບັນຫາຄ່າຄອງຊີບສູງ ແລະ ບັນຫາຫຍໍ້ທໍ້ອື່ນໆຕິດພັນກັບການຄົ້ນຄວ້າທ່າແຮງໃນການສ້າງແຫຼ່ງລາຍຮັບມາພັດທະນາວຽກງານກຳມະບານ ເພື່ອກ້າວໄປສູ່ການກຸ້ມຕົນເອງໃນການບໍລິຫານວຽກງານ;7. ເພີ່ມທະວີການຕິດຕາມ, ກວດກາ ແລະ ຊຸກຍູ້ວຽກງານກວດກາຂອງສະຫະພັນກໍາມະບານແຕ່ລະຂັ້ນຕາມທັດສະນະຂອງພັກທີ່ວ່າ“ ມີການນໍາພາຕ້ອງມີການຕິດຕາມກວດກາ; ບໍ່ກວດກາກໍບໍ່ມີການນຳພາ ” ເປັນຕົ້ນແມ່ນການປະຕິບັດຫຼັກການ, ແບບແຜນການນໍາພາ, ແບບແຜນວິທີເຮັດວຽກຂອງຄະນະນຳສະຫະພັນກຳມະບານແຕ່ລະຂັ້ນ ແລະ ສະມາຊິກກໍາມະບານໃຫ້ໄປຕາມກົດໝາຍວ່າດ້ວຍກຳມະບານລາວ ແລະ ກົດລະບຽບຂອງສະຫະພັນກຳມະບານລາວ; ເອົາໃຈໃສ່ເກັບກຳຄຳຄິດ, ຄຳເຫັນຂອງສະມາຊິກກຳມະບານ, ກໍາມະກອນ ແລະ ຜູ້ອອກແຮງງານ, ຫາງສຽງຂອງສັງຄົມ ເພື່ອເປັນຂໍ້ມູນນຳສະເໜີໃຫ້ພາກສ່ວນທີ່ກ່ຽວຂ້ອງຄົ້ນຄວ້າ ແລະ ແກ້ໄຂໃຫ້ທັນເວລາ; ຕິດຕາມ, ກວດກາການນຳໃຊ້ງົບປະມານ, ຊັບສິນຂອງລັດ, ເງິນບຳລຸງ ແລະ ເງິນກອງທຶນຂອງກຳມະບານໃຫ້ມີຄວາມໂປ່ງໃສ; ສະກັດກັ້ນ ແລະ ຕ້ານການສໍ້ຫຼາດບັງຫຼວງໃນຄະນະນຳ ແລະ ສະມາຊິກກຳມະບານ;8. ສືບຕໍ່ເພີ່ມທະວີການພົວພັນ-ຮ່ວມມືກັບກໍາມະບານເພື່ອນມິດຍຸດທະສາດ, ປະເທດໃກ້ຄຽງ, ເພື່ອນມິດສາກົນ, ອົງການຈັດຕັ້ງສາກົນ ເພື່ອຜັນຂະຫຍາຍຕາມແນວທາງການຕ່າງປະເທດຂອງພັກ ເພື່ອຍາດແຍ່ງເອົາທຶນຮອນ, ບົດຮຽນ,ເຕັກໂນໂລຊີທີ່ທັນສະໄໝ ກໍຄືບົດຮຽນໃນການເຕົ້າໂຮມກ້ອນກໍາລັງມະຫາຊົນເຂົ້າໃນການຈັດຕັ້ງກໍາມະບານ ແລະ ເຂົ້າໃນການພັດທະນາວຽກງານກຳມະບານໃຫ້ມີການຫັນປ່ຽນໃໝ່ທີ່ຕັ້ງໜ້າ. ພ້ອມດຽວກັນນັ້ນຕ້ອງສ້າງເງື່ອນໄຂໃຫ້ສະຫະພັນກຳມະບານກະຊວງ, ອົງການ, ແຂວງ ແລະ ນະຄອນຫຼວງວຽງຈັນ ເພີ່ມທະວີການພົວພັນຮ່ວມມືຕ່າງປະເທດ ຕາມພາລະບົດບາດ, ຂອບເຂດ ແລະ ຄວາມຮັບຜິດຊອບຂອງຕົນ.ຮຽກຮ້ອງມາຍັງຄະນະບໍລິຫານງານ ສກລກໍຄືຄະນະນຳກຳມະບານແຕ່ລະຂັ້ນ ເຊີດຊູຄວາມຮັບຜິດຊອບໃນການປະຕິບັດໜ້າທີ່ການເມືອງຂອງຕົນພັດທະນາວຽກງານກຳມະບານໃຫ້ມີຄວາມໜັກແໜ້ນເຂັ້ມແຂງຍິ່ງຂຶ້ນກວ່າເກົ່າ.
ຂ່າວ-ພາບ: ພູວັນ+ບຸນຕອມ