ທ່ານ ບຸນທອງ ຈິດມະນີ ເນັ້ນໃຫ້ແມ່ຍິງເອົາໃຈໃສ່ຫຼາຍບັນຫາສໍາຄັນ

ໃນໂອກາດເຂົ້າຮ່ວມກອງປະຊຸມຄົບຄະນະບໍລິຫານງານ ສູນກາງສະຫະພັນແມ່ຍິງລາວ (ສສຍລ) ຄັ້ງທີ 3 ສະໄໝທີ VIII ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດແຫ່ງ ສປປ ລາວ ໄດ້ໃຫ້ກຽດໂອ້ລົມຕໍ່ກອງປະຊຸມດັ່ງກ່າວ ຊຶ່ງໄດ້ຈັດຂຶ້ນໃນວັນທີ 6 ທັນວານີ້, ທີ່ສູນຝຶກອົບຮົມແມ່ຍິງ ໂດຍການເປັນປະທານຂອງທ່ານນາງ ອາລີ ວົງໜໍ່ບຸນທຳ ກຳມະການສູນກາງພັກ ປະທານຄະນະບໍລິຫານງານ ສສຍລ, ມີປະທານ-ຮອງປະທານສະຫະພັນແມ່ຍິງຈາກສູນກາງ-ແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໂອກາດນີ້, ທ່ານ ບຸນທອງ ຈິດມະນີ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ. ພ້ອມເນັ້ນໃຫ້ແມ່ຍິງທຸກຂັ້ນເອົາໃຈໃສ່ຫຼາຍບັນຫາສໍາຄັນ ໂດຍສະເພາະສືບຕໍ່ເພີ່ມທະວີວຽກງານສຶກສາອົບຮົມການເມືອງ-ແນວຄິດ ຕ້ອງຖືເປັນໜ້າທີ່ສໍາຄັນຕົ້ນຕໍອັນດັບໜຶ່ງ ຖືເປັນວຽກງານຍຸດທະສາດທີ່ຕ້ອງເຮັດຢ່າງເນື່ອງນິດລຽນຕິດ ແລະ ຍາວນານດ້ວຍຫຼາຍວິທີການທີ່ແຂງແຮງກວ່າເກົ່າ ແນໃສ່ປຸກລະດົມແນວຄິດແມ່ຍິງຢ່າງກວ້າງຂວາງເລິກເຊິ່ງໃຫ້ມີຄວາມຕື່ນຕົວປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ; ສະມາຊິກແມ່ຍິງລາວທຸກຄົນ ຕ້ອງສູ້ຊົນບຸກບືນຝຶກຝົນຫຼໍ່ຫຼອມຕົນເອງຮອບດ້ານ ເປັນຕົ້ນແມ່ນດ້ານຄວາມຮູ້-ຄວາມສາມາດ, ດ້ານວິຊາສະເພາະ, ທິດສະດີການເມືອງ ແລະ ພາສາຕ່າງປະເທດ, ມີຄວາມສະດຸ້ງໄວ, ກ້າຄິດ, ກ້າເຮັດ ແລະ ກ້າຮັບຜິດຊອບ; ຕ້ອງຕີຖອຍ-ແກ້ໄຂແນວຄິດຄອງເດີມ, ເອື່ອຍອີງ ແລະ ປະລະຄວາມເຊື່ອຖືຮີດຄອງປະເພນີອັນຫຼ້າຫຼັງງົມງວາຍ ທີ່ເປັນການກົດໜ່ວງການພັດທະນາຊີວິດການເປັນຢູ່ຂອງເອື້ອຍນ້ອງແມ່ຍິງລາວ; ເອົາໃຈໃສ່ປັບປຸງການຈັດຕັ້ງຂອງສະຫະພັນແມ່ຍິງແຕ່ສູນກາງລົງຮອດຮາກຖານໃຫ້ໜັກແໜ້ນເຂັ້ມແຂງ ເປັນຕົ້ນວຽກງານປັບປຸງການຈັດຕັ້ງໃຫ້ມີຄວາມໜັກແໜ້ນເຂັ້ມແຂງ ແມ່ນຄວາມຮຽກຮ້ອງຕ້ອງການອັນຈໍາເປັນ ເພື່ອຮັບປະກັນໃຫ້ແກ່ການຈັດຕັ້ງນໍາພາປະຕິບັດໜ້າທີ່ການເມືອງໃຫ້ໄດ້ຮັບໝາກຜົນຢ່າງເປັນຮູບປະທໍາໃນແຕ່ລະໄລຍະ. ສະນັ້ນຄະນະສະຫະພັນແມ່ຍິງລາວແຕ່ລະຂັ້ນ ຕ້ອງພ້ອມກັນກວດກາຄືນການຈັດຕັ້ງຢູ່ຂັ້ນໃດ, ບ່ອນໃດ, ຂອດໃດທີ່ຍັງອ່ອນ, ຍັງເປັນພຽງຮູບຮ່າງ-ບໍ່ໄປບໍ່ມາ, ບໍ່ຮູ້ເຮັດວຽກ, ຕ້ອງສຸມໃສ່ປັບປຸງແກ້ໄຂໃຫ້ໄດ້ ພ້ອມກັບການປັບປຸງຂອດການຈັດຕັ້ງ ແລະ ພະນັກງານ ຕ້ອງເອົາໃຈໃສ່ປັບປຸງ-ແນະນໍາແບບແຜນການເຄື່ອນໄຫວຂອງອົງການຈັດຕັ້ງສະຫະ ພັນແມ່ຍິງຢູ່ແຕ່ລະຂັ້ນ ເປັນຕົ້ນຢູ່ຂັ້ນຮາກຖານໃຫ້ຮູ້ປະຕິບັດໜ້າທີ່ຕາມພາລະບົດບາດ ແລະ ສິດໜ້າທີ່ຂອງຕົນ. ພ້ອມກັນນັ້ນຕ້ອງປັບປຸງແບບແຜນນໍາພາ ແລະ ວິທີເຮັດວຽກໃຫ້ຖືກຕ້ອງແທດຕົວຈິງກັບຮາກຖານ, ການເຮັດວຽກມີແຜນການ, ແຜນງານ, ໂຄງການລະອຽດ, ມີການຊຸກຍູ້, ຕິດຕາມ, ກວດກາ, ປະເມີນຜົນ, ຕີລາຄາສະຫຼຸບຖອນຖອນບົດຮຽນໃນແຕ່ລະໄລຍະ, ຮູ້ນໍາພາເສີມຂະຫຍາຍດ້ານຕັ້ງໜ້າ, ດັດແປງແກ້ໄຂດ້ານອ່ອນ-ຂໍ້ຄົງຄ້າງຢ່າງທັນການ. ດັ່ງນັ້ນ, ຄະນະບໍລິຫານງານສະຫະພັນແມ່ຍິງແຕ່ລະຂັ້ນ ຕ້ອງເອົາໃຈໃສ່ນໍາພາ-ຊີ້ນໍາໃຫ້ແທດເຖິງແທ້ໆ; ສືບຕໍ່ເອົາ ໃຈໃສ່ປັບປຸງຫັນການເຄື່ອນໄຫວຂອງອົງການຈັດຕັ້ງແມ່ຍິງຢູ່ຂັ້ນສູນກາງ, ແຂວງ, ເມືອງລົງສູ່ຮາກຖານ ແລະ ອື່ນໆ; ສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ໃຫ້ເຂົ້າສູ່ລວງເລິກ, ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານໃນການນໍາພາຂອງຄະນະສະຫະພັນແມ່ຍິງແຕ່ລະຂັ້ນຕາມເນື້ອໃຈຈິດໃຈຂອງມະຕິ 05/ຄບສພ; ກ່ອນອື່ນໝົດຕ້ອງປ່ຽນແປງໃໝ່ຕົນເອງໃນວິທີເຮັດວຽກ, ວິທີປຸກລະດົມຂົນຂວາຍຊວນເຊື່ອແມ່ຍິງບັນດາເຜົ່າ, ປ່ຽນ ແປງໃໝ່ເນື້ອໃນ ແລະ ແບບແຜນວິທີເຄື່ອນໄຫວໃຫ້ແທດເໝາະກັບຕົວຈິງຢູ່ແຕ່ລະຮາກຖານຂອງຕົນ, ມີຫຼາຍຮູບຫຼາຍສີ ແລະ ມີປະສິດທິຜົນດີ, ສ້າງໄດ້ຄວາມເຊື່ອໝັ້ນ ແລະ ເຫັນແຈ້ງຕໍ່ສິດ ແລະ ຜົນປະໂຫຍດໃນອົງການຈັດຕັ້ງແມ່ຍິງໃຫ້ຮູ້ສຶກຕິດພັນກັບອົງການຈັດຕັ້ງຂອງຕົນ; ຄະນະບໍລິຫານງານ ແລະ ຄະນະສະຫະພັນແມ່ຍິງແຕ່ລະຂັ້ນຕ້ອງເພີ່ມທະວີຍົກສູງຄວາມຮູ້-ຄວາມສາມາດຂອງຕົນໃຫ້ທຽບທັນກັບໜ້າທີ່ການເມືອງໃນໄລຍະໃໝ່ ກໍຄືໃນສະພາບການປັດຈຸບັນ. ໃນສະພາບທີ່ພົບກັບຄວາມຫຍຸ້ງຍາກທາງດ້ານເສດຖະກິດຄືແນວນີ້ ຮຽກຮ້ອງເຖິງເອື້ອຍນ້ອງແມ່ຍິງລາວບັນດາເຜົ່າ ຕ້ອງສືບຕໍ່ເອົາໃຈໃສ່ປະຕິບັດພາລະບົດບາດ ເປັນຕົວແທນແຫ່ງການປົກປ້ອງສິດຜົນປະໂຫຍດຂອງແມ່ຍິງໃນການພັດທະນາ ແລະ ສົ່ງເສີມຄວາມກ້າວໜ້າຂອງແມ່ຍິງ ໂດຍນໍາພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂັ້ນຂອງຕົນໃນທ້າຍສະໄໝ, ສຸມໃສ່ຈັດຕັ້ງປະຕິບັດແຜນພັດທະນາແມ່ຍິງແຫ່ງຊາດ ຕິດພັນກັບການປະຕິບັດສອງວາລະແຫ່ງຊາດ ໂດຍສະເພາະການແກ້ໄຂຄວາມຫຍຸ້ງຍາກທາງດ້ານເສດຖະກິດ, ປຸກລະດົມແມ່ຍິງເຂົ້າຮ່ວມໃນການປະຕິບັດແນວທາງ, ແຜນພັດທະນາເສດຖະກິດ-ສັງຄົມ ເຮັດໃຫ້ການຈັດຕັ້ງປະຕິບັດຄາດໝາຍສູ້ຊົນຂອງບັນດາໂຄງການພັດທະນາໃຫ້ບັນລຸຜົນສໍາເລັດ. ໃນນັ້ນເລີ່ມແຕ່ປີ 2024 ນີ້ເປັນຕົ້ນໄປ ຕ້ອງພ້ອມກັນຄົ້ນຄວ້າກະກຽມສ້າງເງື່ອນໄຂຕ່າງໆໃຫ້ແກ່ການດໍາເນີນກອງປະຊຸມໃຫຍ່ 3 ຂັ້ນຂອງສະຫະພັນແມ່ຍິງໃຫ້ໄປຕາມແຜນການທີ່ໄດ້ກໍານົດໄວ້; ສໍາລັບການກະກຽມ ແລະ ດໍາເນີນກອງປະຊຸມໃຫຍ່ຂອງສະຫະພັນແມ່ຍິງແຕ່ລະຂັ້ນ ແມ່ນບັນຫາເນື້ອໃນຂອງກອງປະຊຸມ ແລະ ໂຄງປະກອບບຸກຄະລາກອນທີ່ຕ້ອງສືບຕໍ່ເອົາໃຈໃສ່ນໍາພາຈັດຕັ້ງປະຕິບັດເນື້ອໃນຄໍາຂັວນ ແລະ ຂໍ້ແຂ່ງຂັນ 3 ດີຂອງສະຫະພັນແມ່ຍິງລາວ ກໍຄືການສ້າງຄອບຄົວ ແລະ ບ້ານແມ່ຍິງ 3 ດີຕິດພັນກັບການສ້າງບ້ານພັດທະນາຕາມທິດ 3 ສ້າງເຂົ້າສູ່ລວງເລິກ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາໃຫ້ບັນລຸຕາມແຜນການທີ່ວາງໄວ້; ປຸກລະດົມສະມາຊິກສະຫະພັນແມ່ຍິງ ແລະ ແມ່ຍິງລາວບັນດາເຜົ່າເອົາໃຈໃສ່ເປັນເຈົ້າການຕ້ານປະກົດການຫຍໍ້ທໍ້ໃນສັງຄົມກໍຄືຖັນແຖວແມ່ຍິງໃຫ້ຫຼຸດລົງເທື່ອລະກ້າວ ຊຸກຍູ້ສົ່ງເສີມໃຫ້ແມ່ຍິງລາວບັນດາເຜົ່າໄດ້ທໍາມາຫາກິນ ແລະ ດໍາລົງຊີວິດຢ່າງເປັນປົກກະຕິໃນເງື່ອນໄຂໃໝ່, ໂຄສະນາປຸກລະດົມຂົນຂວາຍຊຸກຍູ້ສົ່ງເສີມໃຫ້ເຂົາ ເຈົ້າໄດ້ເຂົ້າຮ່ວມໃນການສ້າງເສດຖະກິດຄອບຄົວ, ຊອກຫາແຫຼ່ງລາຍຮັບດ້ວຍການຜະລິດເປັນສິນຄ້າ ແລະ ການບໍລິການ ເພື່ອປະກອບສ່ວນພັດທະນາເສດຖະກິດ-ສັງຄົມ ໂດຍເລີ່ມຈາກການນໍາໃຊ້ທ່າແຮງບົ່ມຊ້ອນທີ່ເປັນສີໄມ້ລາຍມີອັນປານີດຂອງແມ່ຍິງລາວບັນດາເຜົ່າ ເປັນຕົ້ນຫັດຖະກໍາແຜ່ນ, ຕໍ່າຫູກທໍໄໝ, ຫັດຖະກໍາຜ້າຝ້າຍ ແລະ ອື່ນໆທີ່ເປັນມູນເຊື້ອພ້ອມທັງປະສານສົມທົບກັບພາກສ່ວນກ່ຽວຂ້ອງໃນການຊຸກຍູ້ວຽກງານໂຄສະນາສຸຂະສຶກສາ ແລະ ການຮັກສາສຸຂະພາບຂອງແມ່ ແລະ ເດັກໄປຄຽງຄູ່ກັບສ້າງເງື່ອນໄຂໃຫ້ແມ່ຍິງໄດ້ເຂົ້າເຖິງການບໍລິການດ້ານສາທາລະນະສຸກ, ມີໂພຊະນາການທີ່ດີ ເພື່ອເຮັດໃຫ້ອັດຕາສ່ວນການຕາຍຂອງແມ່ ແລະ ເດັກຫຼຸດລົງ ຮັບປະກັນໃຫ້ປະຊາຊົນກໍຄືແມ່ຍິງບັນດາເຜົ່າ ແລະ ເດັກມີສຸຂະພາບແຂງແຮງ, ສົມບູນມີອາຍຸຍືນ; ສ້າງສະຖາບັນຄອບຄົວໃຫ້ມີຄວາມເຂັ້ມແຂງ, ໜັກແໜ້ນ, ມີຄວາມຜາສຸກ. ໃນນັ້ນຕ້ອງສືບຕໍ່ພົວພັນຮ່ວມມືກັບແມ່ຍິງປະເທດເພື່ອນມິດຍຸດທະສາດ ແລະ ອົງການ ຈັດຕັ້ງສາກົນຢ່າງມີການເລືອກເຟັ້ນ. ພ້ອມນັ້ນຈົ່ງສືບຕໍ່ເພີ່ມທະວຽກງານຕິດຕາມກວດກາຢູ່ພາຍໃນຄະນະບໍລິຫານງານສະຫະພັນແມ່ຍິງແຕ່ລະຂັ້ນ ແລະ ທົ່ວສະມາຊິກສະຫະພັນແມ່ຍິງລາວໃຫ້ເປັນປົກກະຕິ, ທົ່ວເຖິງເພື່ອເສີມຂະ ຫຍາຍດ້ານຕ່າງໆໃຫ້ດີຂຶ້ນເລື້ອຍໆ. 
ຂ່າວ-ພາບ: ວັນເພັງ + ພັດ ລໍວັນໄຊ