ຕໍ່ມາທ່ານ ໂດໂນ ທຣໍາ ໄດ້ປະກາດສົ່ງຈົດໝາຍທີ່ຄ້າຍຄືກັນເຖິງຜູ້ນຳຂອງອີກ 12 ປະເທດຄື: ມາເລເຊຍ, ກາຊັກສະຖານ, ອາຟຣິກາໃຕ້, ມຽນມາ, ລາວ, ຕູນິເຊຍ, ອິນໂດເນເຊຍ, ບັງກະລາເທດ, ເຊີເບຍ, ບອສເນຍ ແລະ ເຮີເຊໂກວິນາ, ກຳປູເຈຍ ແລະ ໄທ, ໂດຍປະກາດວ່າຈະເກັບພາສີໃນອັດຕາ 25% ເຖິງ 40%, ເລີ່ມແຕ່ເດືອນສິງຫາເປັນຕົ້ນໄປ.
ອັດຕາພາສີສໍາລັບມາເລເຊຍ, ກາຊັກສະຖານ ແລະ ຕູນິເຊຍ ຈະຢູ່ທີ່ 25%, ໃນຂະນະທີ່ອາຟຣິກາໃຕ້ ແລະ ບອສເນຍ ແລະ ເຮີເຊໂກວີນາ ຈະເກັບໃນອັດຕາ 30%. ອິນໂດເນເຊຍຈະປະເຊີນກັບອັດຕາພາສີ 32%, ບັງກະລາເທດ ແລະ ເຊີເບຍ 35%, ກໍາປູເຈຍ ແລະ ໄທ 36%, ລາວ ແລະ ມຽນມາ ຈະຖືກເກັບພາສີສູງເຖິງ 40%.
ໃນຈົດໝາຍທີ່ມີເນື້ອໃນເກືອບຄືກັນທັງໝົດນີ້, ທ່ານ ທຣໍາ ໄດ້ຮຽກຮ້ອງໃຫ້ບັນດາຜູ້ນຳຂອງບັນດາປະເທດເຫຼົ່ານີ້ເຂົ້າໃຈວ່າ ອັດຕາພາສີດັ່ງກ່າວຍັງຖືວ່າຕ່ຳກວ່າເມື່ອທຽບກັບໂຕເລກທີ່ຈຳເປັນໃນການລຶບລ້າງຄວາມສະເໝີພາບດ້ານດຸ່ນການຄ້າກັບ ສະຫະລັດ ອາເມລິກາ, ພ້ອມທັງເຕືອນວ່າ ຖ້າປະເທດເຫຼົ່ານີ້ຂຶ້ນພາສີເພື່ອຕອບໂຕ້ ສະຫະລັດ ອາເມຣິກາຈະປັບຂຶ້ນພາສີໃນອັດຕາເທົ່າກັນ. ຢ່າງໃດກໍຕາມ, ທ່ານ ທຣໍາ ກ່າວວ່າ: ຈະບໍ່ມີການເກັບພາສີຖ້າປະເທດເຫຼົ່ານີ້ ຫຼື ບໍລິສັດຂອງປະເທດດັ່ງກ່າວຕັດສິນໃຈກໍ່ສ້າງ ຫຼື ຜະລິດສິນຄ້າໃນສະຫະລັດ ອາເມຣິກາ.
ໃນຕອນບ່າຍວັນ 7 ກໍລະກົດ ຜ່ານມາ, ທ່ານນາງ ແຄໂຣໄລ ເລວິດ ໂຄສົກທຳນຽບຂາວ ກ່າວວ່າ: ທ່ານ ທຣໍາ ວາງແຜນທີ່ຈະອອກຄຳສັ່ງບໍລິຫານ ເພື່ອຂະຫຍາຍເວລາ “ອັດຕາພາສີຕອບໂຕ້” ຈາກວັນທີ 9 ກໍລະກົດ ເປັນວັນທີ 1 ສິງຫາ.
ທັງນີ້, ໃນວັນທີ 2 ກໍລະກົດນີ້, ທ່ານ ທຣໍາ ກ່າວວ່າ, ສະຫະລັດ ອາເມລິກາ ໄດ້ບັນລຸຂໍ້ຕົກລົງການຄ້າກັບຫວຽດນາມ ຊຶ່ງລວມເຖິງການເກັບພາສີສິນຄ້າສົ່ງອອກຂອງຫວຽດນາມ ໄປຍັງ ສະຫະລັດ ອາເມຣິກາ 20%.
ຄໍາເຫັນ