ທ່ານ ສີຈິ້ນຜິງ ເນັ້ນໜັກວ່າ: ສອງປະເທດຈີນ ແລະ ສປປ ເກົາຫຼີ ລ້ວນແຕ່ແມ່ນປະເທດສັງຄົມນິຍົມທີ່ນຳພາໂດຍພັກກອມມູນິດ. ມິດຕະພາບອັນເປັນມູນເຊື້ອລະຫວ່າງຈີນ ແລະ ສປປ ເກົາຫຼີ ມີແຫຼ່ງກຳເນີດມາຈາກອຸດົມການ, ຄວາມເຊື່ອໝັ້ນ ແລະ ເປົ້າໝາຍສູ້ຊົນຮ່ວມກັນຂອງສອງຝ່າຍ.
ທ່ານ ສີຈິ້ນຜິງ ຊີ້ອອກວ່າ: ໂດຍຜະເຊີນໜ້າກັບການປ່ຽນແປງໃນຮອບຮ້ອຍປີຜ່ານມາຂອງໂລກ, ສອງຝ່າຍຕ້ອງກຳເອົາໂອກາດໃນທ່າອຽງໃຫຍ່ແຫ່ງການພັດທະນາປະຫວັດສາດຂອງມວນມະນຸດ ເພື່ອບຸກເບີກອະນາຄົດທີ່ດີງາມກວ່າເກົ່າຂອງພາລະກິດສັງຄົມນິຍົມສອງປະເທດ ກໍຄືສັນຕິພາບ ແລະ ການພັດທະນາຂອງພາກພື້ນ.
ທ່ານ ສີຈິ້ນຜິງ ໄດ້ສະເໜີ 4 ຂໍ້ ກ່ຽວກັບການຂະຫຍາຍການພົວພັນລະຫວ່າງຈີນ ແລະ ສປປ ເກົາຫຼີ ຄື: ໜຶ່ງ, ຢຶດໝັ້ນຖືການໄປມາຫາສູ່ກັນລະຫວ່າງການນຳຂັ້ນສູງ ເປັນການຊີ້ນຳ-ນຳພາ, ສ້າງພື້ນຖານຂອງການໄວ້ເນື້ອເຊື່ອໃຈກັນທາງການເມືອງໃຫ້ໝັ້ນຄົງຍິ່ງຂຶ້ນ. ສອງ, ຢຶດໝັ້ນຖືການສ້າງຄວາມສຸກໃຫ້ແກ່ປະຊາຊົນເປັນເປົ້າໝາຍ, ຍົກສູງລະດັບການຮ່ວມມືທີ່ຕິດແທດຕົວຈິງ. ສາມ, ຢຶດໝັ້ນຖືການສືບທອດມິດຕະພາບເປັນກຳລັງແຮງ, ເຊື່ອມສານຈິດໃຈຂອງປະຊາຊົນໃຫ້ສະໜິດແໜ້ນຍິ່ງຂຶ້ນ. ສີ່, ຢຶດໝັ້ນທັດສະນະທີ່ຍຸຕິທຳ ແລະ ເປັນທຳ, ເຮັດໃຫ້ການປະສານງານດ້ານຍຸດທະສາດມີເນື້ອໃນອຸດົມສົມບູນກວ່າເກົ່າ.
ທ່ານ ກິມເຈິງອຸນ ກ່າວວ່າ: ຂອບໃຈທ່ານ ສີຈິ້ນຜິງ ທີ່ສະເໜີຂໍ້ສະເໜີອັນສຳຄັນ ກ່ຽວກັບການຂະຫຍາຍການພົວພັນລະຫວ່າງ ສປປ ເກົາຫຼີ ແລະ ຈີນໃນຍຸກໃໝ່, ສປປ ເກົາຫຼີ ຈະຮ່ວມກັບຈີນ, ທຳຄວາມພະຍາຍາມຢ່າງສຸດຂີດ ເພື່ອຊຸກຍູ້ການແລກປ່ຽນ ແລະ ການຮ່ວມມືໃນຂົງເຂດທີ່ກວ້າງຂວາງ ເຊັ່ນ: ເສດຖະກິດການຄ້າ, ພື້ນຖານໂຄງລ່າງ, ວິທະຍາສາດເຕັກໂນໂລຊີ, ການສຶກສາ ແລະ ວັດທະນະທຳເປັນຕົ້ນລະຫວ່າງສອງປະເທດ ໃຫ້ໄດ້ຮັບການພັດທະນາໃໝ່.
ທ່ານ ກິມເຈິງອຸນ ກ່າວຕື່ມວ່າ: ຊຸມປີມໍ່ໆມານີ້, ປະຊາຄົມໂລກກຳລັງເກີດການປ່ຽນແປງອັນໃຫຍ່ຫຼວງແບບບໍ່ເຄີຍມີມາກ່ອນ, ສປປ ເກົາຫຼີ ຈະເດັດດ່ຽວສະໜັບສະໜູນນະໂຍບາຍ ແລະ ຫຼັກໝັ້ນຂອງຈີນ ທີ່ປົກປັກຮັກສາຜົນປະໂຫຍດແກນກາງ. ສປປ ເກົາຫຼີ ຈະຖືການຂະຫຍາຍການພົວພັນລະຫວ່າງ ສປປ ເກົາຫຼີ ກັບ ຈີນ ເປັນພາລະກິດຍຸດທະສາດອັນດັບໜຶ່ງທີ່ສຳຄັນທີ່ສຸດຂອງລັດຄືທີ່ປະຕິບັດຜ່ານມາ, ຈະພະຍາຍາມສຸດຂີດ ເພື່ອສ້າງການພົວພັນ ສປປ ເກົາຫຼີ-ຈີນ ໃຫ້ເປັນແບບຢ່າງຂອງການພົວພັນລະຫວ່າງປະເທດ, ພ້ອມກັນປະກອບສ່ວນເຂົ້າໃນສັນຕິພາບ ແລະ ຄວາມຈະເລີນຮຸ່ງເຮືອງຂອງພາກພື້ນ ກໍຄືຂອງໂລກ.
ຄໍາເຫັນ