ທ່ານ ສີສະຫວາດ ພອນນະໄຊ ຄູລາວໄດ້ຮັບລາງວັນຊະນະເລີດຄູຕົວແບບສອນດີສອນເດັ່ນ

ທ່ານ ສີສະຫວາດ ພອນນະໄຊ ກ່າວໃຫ້ຮູ້ອີກວ່າ: ຍ້ອນປະສົບການຜ່ານມາໄດ້ກາຍເປັນແຮງບັນດານໃຈໃຫ້ຂ້າພະເຈົ້າທຸ່ມເທການຄົ້ນຄວ້າ ແລະ ພັດທະນາຕົນເອງ ຈົນສາມາດຍາດໄດ້ລາງວັນຊະນະເລີດທີ 1 ໃນຄັ້ງນີ້, ຖືເປັນລາງວັນອັນລໍ້າຄ່າທີ່ສຸດໃນຊີວິດຂອງຂ້າພະເຈົ້າໃນຖານະເປັນຄູລາວຄົນໜຶ່ງ. ນອກຈາກນີ້ສິ່ງທີ່ຂ້າພະເຈົ້າພູມໃຈ, ດີໃຈທີ່ສຸດ ແລະ ບໍ່ນຶກບໍ່ຝັນເວລາເຂົາປະກາດຜູ້ຊະນະເລີດໄດ້ເລີຍ ເພາະວ່າຄູ-ອາຈານທີ່ເປັນຕົວແທນຈາກແຕ່ລະປະເທດມີຄວາມຮູ້ຄວາມສາມາດ ແລະ ມີຄວາມເປັນມືອາຊີບດີ ແຕ່ເມື່ອໄດ້ຍິນອ່ານຊື່ຂ້າພະເຈົ້າຕໍ່ດ້ວຍຄໍາເວົ້າວ່າແມ່ນຄູ-ອາຈານມາຈາກສາທາລະນະລັດ ປະຊາທິປະໄຕ ປະຊາຊົນລາວ ມະຫາວິທະຍາໄລແຫ່ງຊາດ ສະຖາບັນຂົງຈື ໃນເວລານັ້ນນໍ້າຕາຂ້າພະເຈົ້າຈົນໄຫຼອອກ, ຂ້າພະເຈົ້າຮູ້ສຶກດີໃຈທີ່ສຸດທີ່ໄດ້ເປັນນ໋ອດເປັນຕະປູນ້ອຍໆອັນໜຶ່ງໃນການສ້າງຊື່ສຽງການສຶກສາ ໃຫ້ແກ່ປະເທດຊາດອັນເປັນຜືນແຜ່ນດິນແມ່ຂອງຂ້າພະເຈົ້າ. ຕອນຂ້າພະເຈົ້າຂຶ້ນຮັບລາງວັນຂ້າພະເຈົ້າໄດ້ເວົ້າກັບຕົນເອງວ່າ ນີ້ບໍໍຄວາມຮູ້ສຶກສາພາກພູມໃຈເວລາເຂົາເອີ່ຍຊື່ຕົນເອງ ແລະ ປະເທດຕົນເອງພ້ອມສຽງຕົບມືຍິນດີດັງກ້ອງໄປທົ່ວຫ້ອງແຂ່ງຂັນ, ຂະນະນັ້ນມີຄວາມຊາບຊຶ້ງດີໃຈຈົນປາກບໍ່ອອກ. ນີ້ແມ່ນຂອງຂວັນອັນລໍ້າຄ່າທີ່ສຸດໃນອາຊີບຂ້າພະເຈົ້າ ໂດຍສະເພາະໃນວັນຄູແຫ່ງຊາດທີ່ໃກ້ຈະມາເຖິງນີ້. ລາງວັນນີ້ບໍ່ແມ່ນຂອງຂ້າພະເຈົ້າຜູ້ດຽວ ແຕ່ເປັນຂອງຄູ-ອາຈານ ແລະ ນັກຮຽນທຸກຄົນທີ່ມີສ່ວນຮ່ວມໃນການຫຼໍ່ຫຼອມ ແລະ ສົ່ງເສີມໃຫ້ຂ້າພະເຈົ້າເຕີບໂຕ. ມັນເປັນຫຼັກຖານຢືນຢັນວ່າຄວາມທຸ່ມເທ, ການອຸທິດຕົນ ແລະ ຄວາມຮັກໃນອາຊີບຄູ ສາມາດນໍາພາໃຫ້ເຮົາບັນລຸຄວາມສໍາເລັດໃນລະດັບສາກົນໄດ້. ໃນອະນາຄົດຕໍ່ໜ້າຈະສືບຕໍ່ພັດທະນາຕົນເອງ ແລະ ຄົ້ນຄວ້າການສິດສອນຢ່າງຕໍ່ເນື່ອງ ເພື່ອບໍ່ໃຫ້ລາງວັນເປັນພຽງກຽດຕິຍົດຊົ່ວຄາວ ແຕ່ເປັນແຮງບັນດານໃຈໃນການເດີນໜ້າອາຊີບຄູໃນໄລຍະຍາວ.

ແນ່ນອນລາງວັນນີ້ມັນແມ່ນກຽດສັກສີ ແຕ່ບໍ່ແມ່ນຂອງຂ້າພະເຈົ້າຄົນດຽວເທົ່ານັ້ນ, ມັນແມ່ນການພັກດັນຊຸກຍູ້ຊ່ວຍເຫຼືອຂອງຄູເພື່ອນຮ່ວມງານທຸກຄົນ ແມ່ນການໃຫ້ໂອກາດຂອງການຈັດຕັ້ງ, ມັນແມ່ນລາງວັນຂອງໝົດທຸກຄົນ ໂດຍສະເພາະຄູຄືພວກເຮົາ. ອາຊີບຄູຄືພວກເຮົາການໄດ້ຮັບໃບຍ້ອງຍໍ, ໄດ້ລາງວັນຕ່າງໆ ຖືວ່າແມ່ນກຽດແມ່ນສັກສີ ແມ່ນຄວາມພາກພູມໃຈທີ່ສຸດຂອງຕົນເອງ ແລະ ຄອບຄົວ ໂດຍສະເພາະລາງວັນໃນລະດັບສາກົນແລ້ວ ມັນບໍ່ພຽງແຕ່ແມ່ນກຽດສັກສີຂອງຂ້າພະເຈົ້າເທົ່ານັ້ນ ມັນຍັງສະແດງໃຫ້ສາກົນເຫັນວ່າການສຶກສາ, ການຮຽນການສອນຂອງ ສປປ ລາວ ພວກເຮົາກໍບໍ່ໄດ້ດ້ອຍກວ່າປະເທດອື່ນທີ່ພັດທະນາແລ້ວ.

ເຫດຜົນໜຶ່ງທີ່ສໍາຄັນເຮັດໃຫ້ຂ້າພະເຈົ້າ ແລະ ທີມງານໄດ້ລາງວັນ ຍ້ອນການວາງແຜນທີ່ຖືກຕ້ອງຂອງຄະນະນໍາ ໂດຍສະເພາະໄດ້ໃຫ້ພວກເຮົາເດີນທາງຮອດປະເທດແຂ່ງຂັນກ່ອນ 2 ວັນ ເພື່ອໃຫ້ມີເວລາເຂົ້າສໍາຫຼວດສະຖານທີ່ແຂ່ງຂັນ, ກະກຽມບົດຮຽນສໍາລັບການແຂ່ງຂັນ ແລະ ໄດ້ມີໂອກາດຊ້ອມຢູ່ເວທີຫຼາຍກວ່າທີມອື່ນ. ແນ່ນອນປາສະຈາກບໍ່ໄດ້ແມ່ນການກະກຽມຂອງທີມງານພວກເຮົາ ໂດຍສະເພາະໄດ້ມີຊ່ຽວຊານອາຈານຈີນສະຖາບັນຂົງຈື ໄດ້ແນະນໍາເຕັກນິກການສິດສອນພາສາຈີນ, ໃຫ້ຄໍາຄິດເຫັນກ່ອນເດີນທາງເພື່ອໃຫ້ເປັນບ່ອນອີງໃນການຄົ້ນຄວ້າວິທີການສິດສອນທີ່ເໝາະສົມສໍາລັບຜູ້ໃຫຍ່ ແລະ ຜູ້ຮຽນໃນທຸກລະດັບ. ພວກເຮົາໄດ້ນໍາຫຼັກການການຮຽນການສອນທີ່ດີແບບດັ້ງເດີມມາປະສົມປະສານກັບ AI ແລະ ສື່ທີ່ທັນສະໄໝໃຫ້ບົດຮຽນມ່ວນ ມີຄວາມໜ້າສົນໃຈ ຈື່ໄດ້ງ່າຍ, ຮຽນມ່ວນໄດ້ຄວາມຮູ້ເໝືອນກັບເລົ່ານິທານໃຫ້ນັກສຶກສາຟັງ ໂດຍຄ່ອຍໆນໍາພານັກສຶກສາເຂົ້າໃນເລື່ອງ ແລ້ວດໍາເນີນເລື່ອງເຮັດໃຫ້ນັກສຶກສາເຂົ້າມາໃນແວດລ້ອມການຮຽນພວກເຮົາໂດຍບໍ່ຮູ້ສຶກຕົວ ແລະ ໄດ້ມີສ່ວນຮ່ວມໃນການສອນຢ່າງກະຕືລືລົ້ນ ຈົນສາມາດເລົ່າຈົບນິທານ ໂດຍເຮັດໃຫ້ນັກຮຽນມີຄວາມອາໄລອາວອນຢາກຮຽນນໍາອີກ. ຊຶ່ງທັກສະເຫຼົ່ານີ້ບວກກັບປະສົບການທີ່ເຮົາໄດ້ສິດສອນມາຫຼາຍປີ ຈຶ່ງສາມາດເຮັດໃຫ້ຕົນເອງມີຄວາມພ້ອມໃນການແຂ່ງຂັນ 100% ແລະ ສາມາດຍາດໄດ້ລາງວັນອັນດັບ 1. ລາງວັນນີ້ແມ່ນຂອງຄູອາຈານ ແລະ ເພື່ອນຮ່ວມງານໝົດທຸກຄົນແທ້ໆ.

ໃນອະນາຄົດຖ້າມີໂອກາດຖ່າຍທອດປະສົບການທັກສະການສິດສອນແມ່ນຂ້າພະເຈົ້າຍິນດີທີ່ຈະແລກປ່ຽນທີ່ສຸດ, ຜົນສໍາເລັດຂອງຄູ ຄວາມພາກພູມໃຈຂອງຄູບໍ່ແມ່ນວ່າຕົນເອງໄດ້ຮຽນສູງ ໄດ້ເປັນສາສະດາຈານ ໄດ້ຮຽນຮອດປະລິນຍາເອກເທົ່ານັ້ນ, ແຕ່ແມ່ນການເຫັນນັກຮຽນນັກສຶກສາຕົນເອງໄດ້ດີມີຄວາມຮູ້ຄວາມສາມາດ ມີອະນາ ຄົດທີ່ດີ, ອາຊີບຄູແມ່ນອາຊີບທີ່ວ່າ ເຫັນນັກສຶກສາໄດ້ດີກວ່າຕົນເອງແລ້ວຮູ້ສຶກພາກພູມໃຈ. ສະນັ້ນ, ຖ້ານັກສຶກສາຈະໄດ້ດີມີຄວາມຮູ້ຄວາມສາມາດ ມັນຮຽກຮ້ອງຕ້ອງການຕ້ອງມີຄູດີ ຄູເກັ່ງກ່ອນ, ເພາະຄູເປັນຜູ້ເຕີມເຕັມສີສັນໃສ່ເຈ້ຍຂາວຂອງນ້ອງນັກຮຽນ. ຂ້າພະເຈົ້າຍິນດີທີ່ຈະແບ່ງປັນປະສົບການ ແລະ ແລກປ່ຽນບົດຮຽນນໍາບັນດາໂຮງ ຮຽນທີ່ຕ້ອງການໃຫ້ຂ້າພະເຈົ້າໄປແລກປ່ຽນນໍາ, ບໍ່ວ່າຈະເປັນການກະກຽມບົດສອນກ່ອນຂຶ້ນຫ້ອງສອນ, ການກໍາຈິດຕະສາດຂອງນັກຮຽນ, ນັກສຶກສາແຕ່ລະຄົນ. ເພາະເຮົາເຊື່ອວ່າລູກກະແຈດອກໜຶ່ງຈະບໍ່ສາມາດໄຂແມ່ກຸນແຈໄດ້ທຸກໜ່ວຍ. ສະນັ້ນ, ນັກຮຽນ, ນັກສຶກສາມີຄວາມແຕກຕ່າງກັນ ນອກຈາກອັນລວມແລ້ວ, ເຮົາກໍຕ້ອງມີວິທີການເຂົ້າຫານັກສຶກສາ ຫຼືສອນເຂົາແບບແຕກຕ່າງກັນ ຊຶ່ງບົດຮຽນນີ້ຖືວ່າສໍາຄັນຫຼາຍ ແລະ ເປັນກຸນແຈສໍາຄັນໃນການສ້າງສາຍສໍາພັນທີ່ດີກັບນັກຮຽນ, ນັກສຶກສາ.

ອາຊີບຄູແມ່ນອາຊີບທີ່ຕ້ອງເສຍສະຫຼະຕົນເອງ, ອາຊີບຄູແມ່ນຕະກຽງທີ່ໃຕ້ໃນຫົວໃຈຂອງນັກຮຽນ, ນັກສຶກສາ. ສະນັ້ນ, ຫວັງຢ່າງຍິ່ງວ່າຄູສອນຮຸ້ນໃໝ່ອັນດັບທີ 1 ແມ່ນຕ້ອງມັກ-ຮັກໃນອາຊີບຄູ, ເຄົາລົບໃນອາຊີບຄູ, ເມື່ອມີຄວາມມັກ-ຮັກແລ້ວມັນຈຶ່ງຈະເກີດແຮງພັກດັນໃຫ້ຕົນເອງຢາກພັດທະນາຕົນເອງ ການພັດທະນາຕົນເອງກໍເພື່ອຈະນໍາເອົາຄວາມຮູ້ໄປພັດທະນານ້ອງນັກຮຽນ-ນັກສຶກສາ, ໂດຍສະເພາະໃນຍຸກປັດຈຸບັນສື່ອອນລາຍ ແລະແຫຼ່ງຂໍ້ມູນຂ່າວສານແມ່ນເຂົ້າໄດ້ງ່າຍ ແລະ ເຮັດໃຫ້ນ້ອງນັກຮຽນນັກສຶກສາຫຼົງທາງ. ສະນັ້ນ, ຄູມີບົດບາດໃນການແນະນໍາພວກເຂົາ, ບອກເຂົາສິ່ງທີ່ຖືກ ແລະ ຜິດໃນໂລກໂຊຊຽວ. ຈະເຮັດແນວນັ້ນໄດ້ມັນຮຽກຮ້ອງໃຫ້ຄູຮຸ້ນໃໝ່ຕ້ອງຢ່າຢຸດພັດທະນາຕົນເອງ ບໍ່ວ່າຈະເປັນຄວາມຮູ້ ທັກສະ ຫຼື ຄຸນສົມບັດສິນທໍາປະຕິວັດ. ຄູທີ່ດີບໍ່ພຽງແຕ່ເປັນການສອນທີ່ດີເທົ່ານັ້ນ, ແຕ່ຍັງເປັນແຮງບັນດານໃຈນັກຮຽນໃຫ້ມີຄວາມຝັນ ແລະ ຄວາມຫວັງອີກດ້ວຍ. ດັ່ງຄໍາວ່າຮຽນແລ້ວ ຮຽນອີກ ຮຽນເລື້ອຍໆໄປ ເປີດໃຈຮັບເອົາວິທີການ ແລະ ສິ່ງໃໝ່ໆພັດທະນາຄວາມສາມາດຂອງທ່ານເພື່ອໃຫ້ທັນກັບໂລກຍຸກໃໝ່ທີ່ມີການປ່ຽນແປງຕະຫຼອດເວລາ.

ເນື່ອງໃນໂອກາດວັນຄູແຫ່ງຊາດ ຄົບຮອບ 31 ປີນີ້, ຂ້າພະເຈົ້າຂໍອວຍໄຊໃຫ້ພອນແດ່ຜູ້ນໍາພັກ-ລັດ, ພະນັກ ງານ, ທະຫານ, ຕໍາຫຼວດ ຕະຫຼອດຮອດພໍ່ຄ້າຊາວຂາຍ ໂດຍສະເພາະແມ່ນຄູລາວທົ່ວປະເທດ ຈົ່ງມີສຸຂະພາບເຂັ້ມແຂງປາສະຈາກໂລກໄພ ມີຄວາມຜາສຸກໃນຄອບຄົວ ແລະ ຊີວິດສ່ວນຕົວ, ສືບຕໍ່ປະຕິບັດໜ້າທີ່ອັນຊົງກຽດຊ່ວຍສ້າງໃຫ້ຄົນຮຸ່ນໃໝ່ກາຍເປັນຊັບສິນອັນລ້ຳຄ່າຂອງປະເທດຊາດ.

7 ຕຸລາ ວັນຄູແຫ່ງຊາດໝັ້ນຍືນ !