ທ່ານ ສອນໄຊ ສີພັນດອນ ໄດ້​ຮັບ​ການ​ເລືອກ​ຕັ້ງ ເປັນນາຍົກລັດຖະມົນຕີ ອີກ​ໜຶ່ງ​ສະ​ໄໝ

ໂອກາດນີ້, ທ່ານ ສອນໄຊ ສີພັນດອນ ໄດ້ຂຶ້ນກ່າວອຳລາໜ້າທີ່ ໂດຍໄດ້ຍົກໃຫ້ເຫັນຜົນສຳເລັດໃນການຈັດຕັ້ງປະຕິບັດໜ້າທີ່ວຽກງານຕະຫຼອດໄລຍະ 5 ປີຜ່ານມາ (ສະໄໝ) ຊຶ່ງທ່ານ ສອນໄຊ ສີພັນດອນ ໄດ້ເລີ່ມມາຮັບໜ້າທີ່ ເປັນນາຍົກລັດຖະມົນຕີ, ເປັນຫົວໜ້າຄະນະລັດຖະບານ ຊຸດທີ IX ນັບແຕ່ ວັນທີ 30 ທັນວາ 2022 ເປັນຕົ້ນມາ ໂດຍໄດ້ສືບຕໍ່ນໍາພາ-ຊີ້ນໍາ ສະມາຊິກລັດຖະບານ ຊຸດທີ IX ສຸມເຫື່ອແຮງ, ສະຕິປັນຍາ ແລະ ຄວາມສາມາດຂອງຕົນ ເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX, ປະຕິບັດວາລະແຫ່ງຊາດ ແລະ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ແກ້ໄຂບັນຫາຢາເສບຕິດ ແລະ ບັນຫາເຄັ່ງຮ້ອນໃນສັງຄົມ, ຊຶ່ງສາມາດຍາດໄດ້ຜົນສໍາເລັດອັນພົ້ນເດັ່ນຫຼາຍດ້ານ ເປັນຕົ້ນ ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງ, ລວມຍອດຜະລິດຕະພັນພາຍໃນ (GDP) ຂະຫຍາຍຕົວສະເລ່ຍໃນລະດັບ 4,24% (ຄາດໝາຍແມ່ນ 4% ຂຶ້ນໄປ), ການເກັບລາຍຮັບເຂົ້າງົບປະມານໄດ້ເກີນແຜນ 5 ປີຕິດຕໍ່ກັນ ເຮັດໃຫ້ສາມາດມີງົບປະມານ ມາຊຳລະໜີ້ສິນຫຼາຍຂຶ້ນ ຈຶ່ງເຮັດໃຫ້ລະດັບໜີ້ສິນຫຼຸດລົງ ຈາກ 112% ຂອງ GDP ໃນປີ 2022 ມາເປັນປະມານ 88% ຂອງ GDP ໃນປີ 2025 ແລະ ມີງົບປະມານເພີ່ມເງິນເດືອນ-ເງິນອຸດໜູນໃຫ້ ພະນັກງານ, ທະຫານ-ຕຳຫຼວດ ໄດ້ເພີ່ມຂຶ້ນ ແລະ ອື່ນໆ.

ພ້ອມນີ້, ທ່ານ ສອນໄຊ ສີພັນດອນ ຍັງໄດ້ຂຶ້ນກ່າວຮັບໜ້າທີ່ ໂດຍໄດ້ສະແດງຄວາມພາກພູມໃຈເປັນຢ່າງຍິ່ງ ແລະ ສະແດງຄວາມຮູ້ບຸນຄຸນຕໍ່ສະມາຊິກສະພາແຫ່ງຊາດ ຊຸດທີ X ທີ່ໄດ້ໃຫ້ຄວາມເຊື່ອໝັ້ນ, ໄວ້ວາງໃຈ ແລະ ລົງຄະແນນສຽງ ຮັບຮອງເອົາການແຕ່ງຕັ້ງໃຫ້ດຳລົງຕຳແໜ່ງເປັນນາຍົກລັດ ຖະມົນຕີ ຕາມການສະເໜີຂອງທ່ານປະທານປະເທດ. ພ້ອມທັງໃຫ້ຄຳໝັ້ນສັນຍາ ແລະ ປະຕິຍານຕົນວ່າ ຈະເຊີດຊູມານະຈິດປະຕິວັດບຸກໃຫ້ສູງກວ່າເວລາໃດໝົດ ເພື່ອຮ່ວມກັບສະມາຊິກລັດຖະບານ ຊຸດທີ X ປະຕິບັດໜ້າທີ່ຂອງຕົນໃຫ້ດີ ດ້ວຍຄວາມຮັບຜິດຊອບການເມືອງທີ່ສູງ ພາຍໃຕ້ລັດຖະທຳມະນູນ ແລະ ກົດໝາຍ ຂອງ ສປປ ລາວ ແລະ ພ້ອມທີ່ຈະອຸທິດທຸກເຫື່ອແຮງ, ສະຕິປັນຍາ ແລະ ຄວາມຮູ້, ຄວາມສາມາດຂອງຕົນ ເຂົ້າໃນການປະຕິບັດໜ້າທີ່ດ້ວຍຄວາມບໍລິສຸດໃຈ ເພື່ອຮ່ວມກັບຄະນະນໍາຂອງພັກ ແລະ ລັດ ທັງສູນກາງ ແລະ ທ້ອງຖິ່ນ ເຮັດສຳເລັດໜ້າທີ່ ທີ່ປະຊາຊົນມອບໝາຍໃຫ້ ໂດຍຍຶດຖືຄະຕິທີ່ວ່າ: "ຜົນປະໂຫຍດຂອງຊາດ ແລະ ຜົນປະໂຫຍດຂອງປະຊາຊົນຕ້ອງມາກ່ອນສິ່ງອື່ນໃດ” ແລະ ຖືເອົາ: “ປະຊາຊົນເປັນກົກ ແລະ ອີງໃສ່ສິດ, ຜົນປະໂຫຍດ ທີ່ຖືກຕ້ອງຕາມກົດໝາຍ ແລະ ຄວາມມຸ່ງມາດປາຖະໜາອັນຊອບທຳຂອງປະຊາຊົນ”.

ຫຼັງຈາກນັ້ນ ທ່ານ ສອນໄຊ ສີພັນດອນ ໄດ້ຂຶ້ນສະເໜີໂຄງປະກອບກົງຈັກລັດຖະບານ, ສະເໜີແຕ່ງຕັ້ງ ທ່ານ ຮອງນາຍົກລັດຖະມົນຕີ ແລະ ສະມາຊິກລັດຖະບານ ຊຸດທີ X ຊຶ່ງປະກອບມີ 13 ກະຊວງ ແລະ 2 ອົງການທຽບເທົ່າກະຊວງ ຄື:

1). ກະຊວງປ້ອງກັນປະເທດ,

2). ກະຊວງປ້ອງກັນຄວາມສະຫງົບ,

3). ກະຊວງການຕ່າງປະເທດ,

4). ກະຊວງຍຸຕິທຳ,

5). ກະຊວງສາທາລະນະສຸກ,

6). ກະຊວງສຶກສາທິການ ແລະ ກິລາ,

7). ກະຊວງວັດທະນະທໍາ ແລະ ການທ່ອງທ່ຽວ,

8). ກະຊວງແຮງງານ ແລະ ສະຫວັດດີການສັງຄົມ,

9). ກະຊວງການເງິນ,

10). ກະຊວງກະສິກຳ ແລະ ສິ່ງແວດລ້ອມ,

11). ກະຊວງອຸດສາຫະກຳ ແລະ ການຄ້າ,

12). ກະຊວງໂຍທາທິການ ແລະ ຂົນສົ່ງ,

13). ກະຊວງເຕັກໂນໂລຊີ ແລະ ການສື່ສານ,

14). ຫ້ອງວ່າການສໍານັກງານນາຍົກລັດຖະມົນຕີ,

15). ທະນາຄານແຫ່ງ ສປປ ລາວ.

ສຳລັບຄະນະລັດຖະບານ ຊຸດທີ X ມີທັງໝົດ 17 ທ່ານ ລວມທັງ ນາຍົກລັດຖະມົນຕີ, ຊຶ່ງມີລາຍຊື່ ແລະ ຕຳແໜ່ງ ຮັບຜິດຊອບ ດັ່ງນີ້:

1. ທ່ານ ສະເຫຼີມໄຊ ກົມມະສິດ ເປັນຮອງນາຍົກລັດຖະມົນຕີ, ຜູ້ປະຈຳການ,

2. ທ່ານ ຄໍາພັນ ພົມມະທັດ ເປັນຮອງນາຍົກລັດຖະມົນຕີ, ທັງເປັນລັດຖະມົນຕີກະຊວງຍຸຕິທຳ,

3. ທ່ານ ທອງສະລິດ ມັງໜໍ່ເມກ ເປັນຮອງນາຍົກລັດຖະມົນຕີ, ທັງເປັນລັດຖະມົນຕີກະຊວງສຶກສາທິການ ແລະ ກິລາ,

4. ທ່ານ ພົນເອກ ຄໍາລຽງ ອຸທະໄກສອນ ເປັນຮອງນາຍົກລັດຖະມົນຕີ, ທັງເປັນລັດຖະມົນຕີກະຊວງ ປ້ອງກັນປະເທດ,

5. ທ່ານ ສັນຕິພາບ ພົມວິຫານ ເປັນຮອງນາຍົກລັດຖະມົນຕີ, ທັງເປັນລັດຖະມົນຕີກະຊວງການເງິນ,

6. ທ່ານ ທອງສະຫວັນ ພົມວິຫານ ເປັນຮອງນາຍົກລັດຖະມົນຕີ, ທັງເປັນລັດຖະມົນຕີກະຊວງການ ຕ່າງປະເທດ,

7. ທ່ານ ນາງ ບຸນຄໍາ ວໍລະຈິດ ເປັນຜູ້ວ່າການທະນາຄານແຫ່ງ ສປປ ລາວ,

8. ທ່ານ ພົນໂທ ວັນທອງ ກອງມະນີ ເປັນລັດຖະມົນຕີກະຊວງປ້ອງກັນຄວາມສະຫງົບ,

9. ທ່ານ ບົວຄົງ ນາມມະວົງ ເປັນລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ,

10. ທ່ານ ນາງ ໃບຄໍາ ຂັດທິຍະ ເປັນລັດຖະມົນຕີກະຊວງສາທາລະນະສຸກ,

11. ທ່ານ ນາງ ສວນສະຫວັນ ວິຍະເກດ ເປັນລັດຖະມົນຕີກະຊວງວັດທະນະທຳ ແລະ ການທ່ອງທ່ຽວ,

12. ທ່ານ ໂພໄຊ ໄຊຍະສອນ ເປັນລັດຖະມົນຕີກະຊວງແຮງງານ ແລະ ສະຫວັດດີການສັງຄົມ,

13. ທ່ານ ເຫຼັກໄຫຼ ສີລິໄລ ເປັນລັດຖະມົນຕີກະຊວງໂຍທາທິການ ແລະ ຂົນສົ່ງ,

14. ທ່ານ ມະໄລທອງ ກົມມະສິດ ເປັນລັດຖະມົນຕີກະຊວງອຸດສາຫະກຳ ແລະ ການຄ້າ,

15. ທ່ານ ລິນຄໍາ ດວງສະຫວັນ ເປັນລັດຖະມົນຕີກະຊວງກະສິກຳ ແລະ ສິ່ງແວດລ້ອມ,

16. ທ່ານ ສັນຕິສຸກ ສິມມາລາວົງ ເປັນລັດຖະມົນຕີກະຊວງເຕັກໂນໂລຊີ ແລະ ການສື່ສານ.

(ຂ່າວ: ແສງຈັນ)