ທ່ານ ທອງລຸນ ສີສຸລິດ ໄດ້ຮັບເລືອກຕັ້ງເປັນ ປະທານປະເທດ ອີກວາລະໜຶ່ງ

ທ່ານ ທອງລຸນ ສີສຸລິດ ປະທານ ປະເທດ ແຫ່ງ ສປປ ລາວ ໄດ້ ກ່າວລາຍງານການ ຈັດຕັ້ງປະຕິປບັດໜ້າທີ່ຕະຫຼອດໄລຍະ 5 ປີທີ່ຜ່ານມາ ແລະ ກ່າວອຳລາໜ້າທີ່ການເປັນປະທານປະເທດ.

ຈາກນັ້ນ, ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ຊຸດທີ X ຕາງໜ້າຄະນະປະຈຳສະພາແຫ່ງຊາດໄດ້ ອ່ານໜັງສືສະເໜີມາດຖານເງື່ອນໄຂ ແລະ ເປົ້າໝາຍເລືອກຕັ້ງປະທານປະເທດ ແຫ່ງ ສປປ ລາວ.

ກອງປະຊຸມຄັ້ງປະຖົມມະລຶກ ຂອງ ສະພາແຫ່ງຊາດ ຊຸດທີ X ໄດ້ເປັນເອກ ກະສັນເລືອກເອົາ ທ່ານ ທອງລຸນ ສີສຸລິດ ເປັນປະທານປະເທດ ແຫ່ງ ສປປ ລາວ ອີກວາລະໜຶ່ງ ດ້ວຍຄະແນນສຽງເຫັນດີ 99.41%.

ທ່ານ ທອງລຸນ ສີສຸລິດ ກ່າວວ່າ: ຂ້າພະເຈົ້າມີຄວາມພາກພູມໃຈເປັນຢ່າງຍິ່ງ ແລະ ເປັນກຽດອັນສູງສົ່ງທີ່ກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ X ໄດ້ເລືອກຕັ້ງໃຫ້ຂ້າພະເຈົ້າສືບຕໍ່ດຳລົງຕຳແໜ່ງ ເປັນປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ອີກວາລະໜຶ່ງ.

ທ່ານ ທອງລຸນ ສີສູລິດ ກ່າວອີກວ່າ: ຂ້າພະເຈົ້າຂໍຮັບເອົາໜ້າທີ່ອັນສູງສົ່ງ ແລະ ມີກຽດນີ້ ດ້ວຍຄວາມພາກພູມໃຈ ແລະ ຈະປະຕິບັດໜ້າທີ່ພາຍໃຕ້ຮົ່ມທຸງຊາດອັນສັກກາລະບູຊາ ແລະ ສັກສິດນີ້ ດ້ວຍຊີວິດ. ຂ້າພະເຈົ້າ ຂໍໃຫ້ຄຳໝັ້ນສັນຍາ ຕໍ່ສະພາແຫ່ງຊາດທີ່ຊົງກຽດແຫ່ງນີ້ ແລະ ຕໍ່ປະຊາຊົນລາວທັງຊາດວ່າ: ຈະປະຕິບັດໜ້າທີ່ຂອງຕົນໃນພາລະກິດ ທີ່ຖືກມອບໝາຍນີ້ ດ້ວຍຄວາມຈົງຮັກ ພັກດີ, ຊື່ສັດ, ບໍລິສຸດ ຕໍ່ປະເທດຊາດ ແລະ ຕໍ່ປະຊາຊົນລາວບັນດາເຜົ່າ; ຈະເດັດດ່ຽວເຄົາລົບ ແລະ ປະຕິບັດ ລັດຖະທຳມະນູນ ແລະ ກົດໝາຍ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງເຂັ້ມງວດ; ຈະອຸທິດສະຕິປັນຍາ ແລະ ເຫື່ອແຮງ ເທົ່າທີ່ຕົນມີຢູ່ ຮ່ວມກັບ ບັນດາສະຫາຍ ການນໍາ ພັກ-ລັດ ແລະ ຈະເຮັດທຸກສິ່ງ ທຸກຢ່າງເພື່ອຊີ້ນໍາ-ນໍາພາການຈັດຕັ້ງ ປະຕິບັດມະຕິກອງປະຊຸມໃຫຍ່ ຄັ້ງທີ XII ຂອງພັກປະຊາຊົນປະຕິວັດລາວ ເພື່ອ: ຮັບປະກັນໃຫ້ປະເທດຊາດ ມີສະຖຽນລະພາບດ້ານການເມືອງ ຢ່າງໜັກແໜ້ນ, ສັງຄົມມີຄວາມສະຫງົບປອດໄພ; ສູ້ຊົນເຮັດໃຫ້ເສດຖະກິດ-ສັງຄົມ ໄດ້ຮັບການພັດທະນາຕາມແນວທາງສ້າງຄວາມເປັນເຈົ້າປະເທດຊາດ ຢ່າງບໍ່ຢຸດຢັ້ງ, ຕັ້ງໜ້າສ້າງເສດຖະກິດ ເອກະລາດ ເປັນເຈົ້າຕົນເອງ ຢ່າງແຂງແຮງສືບຕໍ່ໄປ; ຈະຮ່ວມກັບທຸກພາກສ່ວນສຸມໃສ່ພັດທະນາຊົນນະບົດ ແລະ ແກ້ໄຂ ຄວາມທຸກຍາກຂອງປະຊາຊົນ, ແນໃສ່ຍົກລະດັບຄຸນນະພາບຊີວິດ ຂອງປະຊາຊົນລາວບັນດາເຜົ່າ ໃຫ້ນັບມື້ນັບດີຂຶ້ນ ເປັນກ້າວໆ; ຕັ້ງໜ້າ ແກ້ໄຂສິ່ງຫຍໍ້ທໍ້ຕ່າງໆ ທີ່ເກີດຂຶ້ນ ແລະ ກໍາລັງຈະເກີດຂຶ້ນໃນສັງຄົມ ໃຫ້ຕົກໄປເປັນກ້າວໆ; ສືບຕໍ່ບູລະນະລະບອບປະຊາທິປະໄຕ ປະຊາຊົນ ໃຫ້ໜັກແໜ້ນ, ເຂັ້ມແຂງ ເພື່ອສ້າງບັນດາບາດກ້າວເດີນ ກ້າວຂຶ້ນສູ່ຈຸດໝາຍ ທີ່ກອງປະຊຸມໃຫຍ່ ຄັ້ງທີ XII ຂອງພັກ ໄດ້ກຳນົດໄວ້.

ຈະຍຶດໝັ້ນ ແລະ ປະຕິບັດນະໂຍບາຍ ການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ, ປະກອບສ່ວນເຂົ້າໃນການເສີມສ້າງສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາ ຢູ່ໃນພາກພື້ນ ແລະ ໃນໂລກ.

ຈາກນັ້ນ ກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ X ໄດ້ເລືອກຕັ້ງເອົາ ທ່ານ ນາງ ວຽງທອງ ສີພັນດອນ ເປັນຮອງປະທານປະເທດ ດ້ວຍຄະແນນສຽງສ່ວນຫຼາຍ.

(ຂ່າວ-ພາບ:ສຳນານ)