ທ່ານ ທອງລຸນ ສີສຸລິດ ຮ່ວມປ່ອນບັດເລືອກຕັ້ງ ສສຊ ແລະ ສສຂ

ໂດຍສະເພາະໜ່ວຍປ່ອນບັດເລືອກຕັ້ງບ້ານທ່າພະລານໄຊ ເມືອງສີສັດຕະນາກ ນະຄອນຫຼວງວຽງຈັນ, ໂດຍມີ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະທານປະເທດແຫ່ງ ສປປ ລາວ, ພ້ອມດ້ວຍຜູ້ມີສິດເລືອກຕັ້ງ ໄດ້ໄປໃຊ້ສິດປ່ອນບັດເລືອກເອົາ ສສຊ ຊຸດທີ X ແລະ ສສຂ ຊຸດທີ V ຢ່າງເປັນຂະບວນຟົດຟື້ນ ຊຶ່ງໜ່ວຍປ່ອນບັດເລືອກຕັ້ງບ້ານທ່າພະລານໄຊ ມີພົນລະເມືອງທັງໝົດ 1,770 ຄົນ ຍິງ 937 ຄົນ ໃນນັ້ນ ຜູ້ມີສິດເລືອກຕັ້ງທັງໝົດ 1,331 ຄົນ ຍິງ 768 ຄົນ

ການປ່ອນບັດເລືອກຕັ້ງເອົາສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ ຊຸດທີ V, ເປັນເຫດການປະຫວັດສາດທີ່ມີຄວາມໝາຍສຳຄັນທີ່ສຸດໃນຊີວິດການເມືອງຂອງປະຊາຊົນລາວບັນດາເຜົ່າທົ່ວທັງຊາດ ລວມທັງພົນລະເມືອງລາວທີ່ດຳລົງຊີວິດ ແລະ ປະຕິບັດໜ້າທີ່ວຽກງານ ຢູ່ຕ່າງປະເທດ ຊຶ່ງເປັນຂີດ ໝາຍສຳຄັນຍິ່ງອີກຄັ້ງໜຶ່ງໃນການເສີມຂະຫຍາຍ ແລະ ປະຕິບັດສິດປະຊາທິປະໄຕ ຂອງປະຊາຊົນລາວບັນດາເຜົ່າໃນຖານະເປັນເຈົ້າຂອງອຳນາດລັດຂອງ ສາທາລະນະລັດ ປະຊາທິປະໄຕ ປະຊາຊົນລາວ.
(ຂ່າວ-ພາບ: ສຳນານ)