 |
ທ່ານ ຕຸດາວັນ ໜໍ່ເມືອງເສດ ກໍາມະການປະຈໍາພັກກະຊວງ ຫົວໜ້າກົມຈັດຕັ້ງ ແລະ ພະນັກງານ ກະຊວງສຶກສາທິການ ແລະ ກິລາ ໄດ້ໃຫ້ຮູ້ວ່າ: ຈຸດປະສົງໃນການເຕົ້າໂຮມກັນໃນມື້ນີ້ ແມ່ນເພື່ອຮັບຟັງການບັນຍາຍບົດຮຽນທີ່ສໍາຄັນຍິ່ງຕໍ່ຊີວິດ ແລະ ໜ້າທີ່ການເມືອງ ຂອງການນໍາຂັ້ນສູງຂອງປະເທດ ແລະ ການນຳສູງສຸດຂອງກະຊວງສຶກສາທິການ ແລະ ກິລາ ໃນການຈັດຕັ້ງປະຕິບັດໜ້າທີ່ການເມືອງ, ຕິດພັນກັບການຝຶກຝົນຫຼໍ່ຫຼອມຄຸນທາດການເມືອງ, ຄຸນສົມບັດສິນທຳປະຕິວັດ, ແບບແຜນວິທີເຮັດວຽກ-ນໍາພາ, ກຳແໜ້ນແນວທາງການເມືອງ ແລະ ອຸດົມການ ຂອງພັກ ພິເສດແມ່ນວຽກງານສຶກສາ, ວິທະຍາສາດ ແລະ ການກິລາ.
ຈາກນັ້ນ, ທ່່ານ ສົມສີ ໄຊຍະລາດ ຫົວໜ້າຫ້ອງຊຸດຮຽນທິດສະດີການເມືອງ-ການປົກຄອງຂັ້ນຕົ້ນ ຍັງໄດ້ລາຍງານໃຫ້ຮູ້ເຖິງສະພາບລວມ ການຈັດຕັ້ງການຮຽນການສອນ, ກິດຈະກຳການເຄື່ອນໄຫວ ໃນໄລຍະຜ່ານມາ ພ້ອມທັງຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍ ລວມທັງຂໍ້ສະເໜີຈຳນວນໜຶ່ງໃນການຈັດຕັ້ງການຮຽນການສອນ.
ໃນໂອກາດນີ້, ທ່ານ ທອງສະລິດ ມັງໜໍ່ເມກ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບຈັດຕັ້ງການຮຽນ-ການສອນທິດສະດີການເມືອງຂັ້ນຕົ້ນ ລະບົບ 3 ເດືອນ ຊຸດທີ III ຂອງກະຊວງສຶກສາທິການ ແລະ ກິລາ ທຸກພາກສ່ວນເຮັດໃຫ້ການຮຽນການສອນຊຸດນີ້ດຳເນີນໄປດ້ວຍດີ ພ້ອມຊົມເຊີຍນັກສຶກສາທັງ 63 ສະຫາຍ ທີ່ໄດ້ສຸມຈິດສຸມໃຈໃສ່ໃນການສຶກສາຮ່ຳຮຽນ ຈົນມີຜົນສຳລັດຕາມລະດັບຄາດໝາຍ. ຫຼັງຈາກນັ້ນ, ທ່ານ ທອງສະລິດ ມັງໜໍ່ເມກ ໄດ້ນໍາສະເໜີກ່ຽວກັບບົດບາດຄວາມສໍາຄັນຂອງການສຶກສາ, ການຄົ້ນຄວ້າວິທະຍາສາດ ແລະ ການກິລາ ໃນໄລຍະໃໝ່ ໂດຍເນັ້ນໃຫ້ເຫັນເຖິງຄວາມສໍານຶກ, ຄວາມສໍາຄັນ, ຈຸດພິເສດຂອງການສຶກສາໃນໄລຍະໃໝ່; ຄວາມສໍານຶກກ່ຽວກັບວິທະຍາສາດ, ສາຍກ່ຽວພັນວິທະຍາສາດ ກັບການສຶກສາ ແລະ ທິດທາງການພັດທະນາການສຶກສາ, ການຄົ້ນຄວ້າວິທະຍາສາດ ແລະ ການກິລາ ຂອງພັກເຮົາໃນຊຸມປີຕໍ່ໜ້າ ເພື່ອໃຫ້ນັກສຶກສາທິດສະດີການເມືອງຊຸດນີ້ ເຂົ້າໃຈເລິກເຊິ່ງ ແລະ ກຳໄດ້ເນື້ອໃນ ແລ້ວນຳໄປໝູນໃຊ້ເຂົ້າໃນການປະຕິບັດວຽກງານຕົວຈິງ ໃຫ້ເກີດດອກອອກຜົນສູງສຸດ.
ຂ່າວ-ພາບ: ການຈະນາ ວົງປັນຍາ
ຄໍາເຫັນ