 |
ກອງປະຊຸມລັດຖະມົນຕີຕ່າງປະເທດອາຊຽນບວກສາມ (ສປ ຈີນ, ຍີ່ປຸ່ນ ແລະ ສ ເກົາຫຼີ) ຄັ້ງທີ 27 ໄດ້ທົບການຮ່ວມມືພາຍໃຕ້ຂອບອາຊຽນບວກສາມໃນໄລຍະຜ່ານມາ ໂດຍສະເພາະແມ່ນຄວາມຄືບໜ້າໃນການຈັດຕັ້ງປະຕິບັດແຜນວຽກການຮ່ວມມືອາຊຽນບວກສາມ ສໍາລັບໄລຍະ 2023-2027. ພ້ອມນີ້, ກອງປະຊຸມ ໄດ້ເຫັນດີໃຫ້ສືບຕໍ່ຮັດແໜ້ນການຮ່ວມມືດ້ານເສດຖະກິດ, ຄວາມໝັ້ນຄົງດ້ານສະບຽງອາຫານ ແລະ ພະລັງງານ ໃນທ່າມກາງຄວາມບໍ່ແນ່ນອນຂອງພູມສາດການເມືອງ ແລະ ພູມສາດເສດຖະກິດທົ່ວໂລກ, ຮັດແໜ້ນການຮ່ວມມືເພື່ອແກ້ໄຂບັນຫາອາຊະຍາກຳຂ້າມຊາດ ເປັນຕົ້ນແມ່ນການຫຼອກລວງທາງອອນລາຍ, ການຟອກເງິນ ແລະ ອື່ນໆ. ກອງປະຊຸມຍັງໄດ້ສະແດງຄວາມຍິນດີຕໍ່ການຮັບຮອງແຜນງານການຮ່ວມມືດ້ານການທ່ອງທ່ຽວອາຊຽນບວກສາມ 2026-2030 ເພື່ອສົ່ງເສີມການໄປມາຫາສູ່ລະຫວ່າງປະຊາຊົນໃນພາກພື້ນ ແລະ ໄດ້ປຶກສາຫາລືເພື່ອກະກຽມໃຫ້ແກ່ກອງປະຊຸມສຸດຍອດອາຊຽນ ບວກສາມ ຄັ້ງທີ 29 ໃນເດືອນພະຈິກ 2026.
 |
ກອງປະຊຸມລັດຖະມົນຕີຕ່າງປະເທດເວທີພາກພື້ນອາຊຽນ ຄັ້ງທີ 33 ໄດ້ທົບທວນຄືນບັນດາກິດຈະກໍາທີ່ໄດ້ຈັດຕັ້ງປະຕິບັດໃນຂອບກອງປະຊຸມເວທີພາກພື້ນອາຊຽນ ໃນສົກປີຜ່ານມາ ແລະ ໄດ້ເຫັນດີຮັບຮອງເອົາບັນດາກິດຈະກຳ ສຳລັບສົກປີ 2026-2027. ພ້ອມນີ້, ໄດ້ຮັບຮອງເອົາປຶ້ມວິໄສທັດຄວາມໝັ້ນຄົງເວທີພາກພື້ນອາຊຽນ ປະຈຳປີ 2026. ກອງປະຊຸມໄດ້ປຶກສາຫາລືກ່ຽວກັບທິດທາງການຮ່ວມມືໃນຕໍ່ໜ້າ ແລະ ເຫັນດີຮັບຮອງເອົາແຜນປະຕິບັດງານມະນິລາ 2026-2036 ຊຶ່ງຈະເປັນເອກະສານທີ່ສຳຄັນໃນການຮ່ວມມືໃນຂອບກອງປະຊຸມເວທີພາກພື້ນອາຊຽນ ໃນ 10 ປີຕໍ່ໜ້າ. ນອກນັ້ນ, ບັນດາປະເທດສະມາຊິກເວທີພາກພື້ນອາຊຽນ ໄດ້ແລກປ່ຽນຄວາມຄິດເຫັນ ກ່ຽວກັບບັນຫາທີ່ພົ້ນເດັ່ນໃນພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເປັນຕົ້ນສະພາບການໃນຕາເວັນອອກກາງທີ່ໄດ້ສົ່ງຜົນກະທົບຕໍ່ເສດຖະກິດ, ຄວາມໝັ້ນຄົງດ້ານພະລັງງານຂອງພາກພື້ນ ແລະ ໃນໂລກ, ການຕ້ານອາຊະຍາກຳຂ້າມຊາດ ໂດຍສະເພາະການຫຼອກລວງທາງອອນລາຍ, ການປ່ຽນແປງດິນຟ້າອາກາດ, ແລະ ອື່ນໆ. ກອງປະຊຸມ ຍັງໄດ້ຮັບຮອງເອົາ ອັງກິດ ເຂົ້າເປັນສະມາຊິກໃໝ່ ອັນດັບທີ 28 ຂອງເວທີພາກພື້ນອາຊຽນ.
 |
ກອງປະຊຸມລັດຖະມົນຕີຕ່າງປະເທດຂອງກອງປະຊຸມສຸດຍອດອາຊີຕາເວັນອອກ (ອີເອເອັສ) ຄັ້ງທີ 16 ໄດ້ປຶກສາຫາລື ແລະ ທົບທວນຄືນ ຄວາມຄືບໜ້າການຈັດຕັ້ງປະຕິບັດບັນດາກິດຈະກໍາພາຍໃຕ້ ແຜນປະຕິບັດງານ ອີເອເອັສ ສົກປີ 2024-2028. ກອງປະຊຸມ ເຫັນດີສືບຕໍ່ເພີ່ມທະວີການຮ່ວມມືໃນຂົງເຂດການຕ້ານອາຊະຍາກໍາຂ້າມຊາດ, ການເຊື່ອມຈອດ ແລະ ການຫັນປ່ຽນ ສູ່ພະລັງງານສະອາດ, ສາທາລະນະສຸກ, ການຟື້ນຟູໄພພິບັດ ແລະ ການພັດທະນາຊັບພະຍາກອນມະນຸດ ແລະ ການສ້າງຄວາມອາດສາມາດດ້ານດີຈີຕອນ ແລະ ການສຶກສາລະດັບສູງ. ພ້ອມນີ້, ກອງປະຊຸມ ໄດ້ປຶກສາຫາລື ເພື່ອກະກຽມໃຫ້ແກ່ກອງປະຊຸມສຸດຍອດ ອີເອເອັສ ຄັ້ງທີ 21 ທີ່ຈະຈັດຂຶ້ນໃນເດືອນພະຈິກ 2026, ລວມທັງການສະເໜີບັນດາເອກະສານຜົນກອງປະຊຸມສຸດຍອດດັ່ງກ່າວ.
 |
(ຂ່າວ: ກຕທ)
ຄໍາເຫັນ