ທ່ານດາລີວັນພູສະຫວັນມີຄໍາເຫັນຕໍ່ຮ່າງກົດໝາຍວ່າດ້ວຍການບິນພົນລະເຮືອນ

ທ່ານດາລີວັນພູສະຫວັນໄດ້ມີຄໍາເຫັນໂດຍພື້ນຖານສ່ວນໃຫຍ່ແມ່ນເຫັນດີເປັນເອກະພາບຕໍ່ຮ່າງກົດໝາຍອີງຕາມຄໍາຖາມເຈາະຈີ້ມຂ້າພະເຈົ້າຂໍມີບາງຄໍາເຫັນປະກອບເຊັ່ນ: ໃນມາດຕາ 68 ເຂດຫ້າມບິນຊຶ່ງໃນຮ່າງກົດໝາຍໄດ້ຂຽນວ່າເຂດຫ້າມບິນປະກອບດ້ວຍເຂດເກີອດຫ້າມ, ເຂດຈໍາກັດການບິນແລະເຂດອັນຕະລາຍສັງເກດເຫັນວ່າເຂດເກີອດຫ້າມເບິ່ງຫົວຂໍ້ກັບເນື້ອໃນຍັງບໍ່ທັນສອດຄ່ອງກົມກຽວເຂັ້ມງວດເທົ່າທີ່ຄວນ. ສະເໜີພິຈາລະນາເຂດເກີອດຫ້າມຄວນເປັນເຂດຫວງຫ້າມເດັດຂາດແລະອາດຈະຂຽນໃສ່ວ່າເຂດຫວງຫ້າມເດັດຂາດແມ່ນເຂດນ່ານຟ້າບໍລິເວນທີ່ຖືກກໍານົດໄວ້້ເປັນທາງການຫ້າມບໍ່ໃຫ້ເຮືອບິນບິນຜ່ານເດັດຂາດ; ຕໍ່ມາດຕາ 79 ການຊອກຄົ້ນແລະກູ້ໄພເຮືອບິນສະເໜີປັບປຸງບາງເນື້ອໃນກ່ຽວກັບການຊອກຄົ້ນແລະກູ້ໄພກັບການສືບສວນອຸບັດເຫດທາງການບິນຄວນແຍກເປັນແຕ່ລະຄະນະແຕ່ມີເປົ້າໝາຍດຽວກັນຍ້ອນວ່າການຄົ້ນຫາແລະກູ້ໄພກັບການສືບສວນ-ສອບສວນເຄື່ອງບິນຕົກມີຄວາມແຕກຕ່າງກັນໃນດ້ານການດໍາເນີນງານແລະໄລຍະເວລາຂອງການປະຕິບັດງານຄ່າໃຊ້ຈ່າຍກໍແຕກຕ່າງກັນເມື່ອມີອຸບັດເຫດເກີດຂຶ້ນການຊອກຄົ້ນແລະກູ້ໄພແມ່ນເປັນວຽກທໍາອິດທີ່ຮີບດ່ວນທີ່ຕ້ອງໄດ້ເຮັດກ່ອນເພື່ອສາມາດເຂົ້າເຖິງພື້ນທີ່ເກີດເຫດຢ່າງວ່ອງໄວທັນການຈາກນັ້ນ, ຈຶ່ງແມ່ນຂະບວນການຂັ້ນຕອນສືບສວນ-ສອບສວນຊຶ່ງການສືບສວນ-ສອບສວນຫຼາຍກໍລະນີຕ້ອງໄດ້ລໍຖ້າຊ່ຽວຊານຈາກຕ່າງປະເທດເຂົ້າມາພ້ອມນັ້ນກໍຕ້ອງໄດ້ສົ່ງຂໍ້ມູນໄປວິເຄາະວິໄຈຢູ່ຕ່າງປະເທດແລະບັນຫາອື່ນໆຊຶ່ງອາດຈະຕ້ອງໃຊ້ເວລາຫຼາຍເດືອນທັງນີ້ເພື່ອບໍ່ໃຫ້ຄະນະຊອກຄົ້ນກູ້ໄພລໍຖ້າຄະນະສືບສວນ-ສອບສວນອຸບັດເຫດແຕ່ກໍຕ້ອງມີກົນໄກປະສານງານກັນແຕ່ຫົວທີ. ສຳລັບມາດຕາ 85 ເງິນແຮສໍາລັບວຽກສືບສວນ-ສອບສວນເຫດຕິດຄັດອຸບັດເຫດທາງການບິນເພື່ອຮັບປະກັນໃຫ້ການຊອກຄົ້ນແລະກູ້ໄພອຸບັດເຫດທາງການບິນສາມາດປະຕິບັດໄດ້ທ່ວງທັນເຫດການລັດວິສາຫະກິດ, ກົມກອງ, ຂະແໜງທີ່ກ່ຽວຂ້ອງຕ້ອງມີເງິນແຮສໍາຮອງຂອງອົງກອນຕົນເປັນຫຼັກ. ຖ້າຈະລໍຖ້າການແບ່ງງົບປະມານຈາກພາກລັດການຊ່ວຍເຫຼືອສະໜັບສະໜູນການປະກອບສ່ວນຈາກບຸກຄົນນິຕິບຸກຄົນແລະການຈັດຕັ້ງພາຍໃນແລະຕ່າງປະເທດຕາມເນື້ອໃນມາດຕາ 85 ອາດຈະເຮັດໃຫ້ການສືບສວນ-ສອບສວນບໍ່ທັນກັບສະພາບ,ເຖິງແນວໃດກໍຕາມສໍາລັບງົບປະມານທີ່ຈະເພີ່ມຕື່ມຈາກພາກລັດອາດຈະໃຊ້ໃນກໍລະນີອຸບັດເຫດຂະໜາດໃຫຍ່ຫຼືການສືບສວນ-ສອບສວນທີ່ມີຄ່າໃຊ້ຈ່າຍເກີນກວ່າເງິນແຮທີ່ມີ; ຕໍ່ມາດຕາ 55 ການວາງແຜນພັດທະນາແລະການກໍ່ສ້າງສະໜາມບິນໃຫ້ລະບຸແຈ້ງຕື່ມການຄົ້ນຄວ້າສ້າງແຜນພັດທະນາສະໜາມບິນຢູ່ພາຍໃນປະເທດລວມເຖິງສະໜາມບິນນອກອາຄານສະຖານທີ່ສິ່ງອໍານວຍຄວາມສະດວກດ້ານການບໍລິການລະບົບຄວາມປອດໄພການຫັນເປັນດີຈີຕອນການນໍາໃຊ້ເຕັກໂນໂລຊີໃໝ່ໂດຍສະເພາະການຕິດຕັ້ງເຄື່ອງຊ່ວຍນໍາເຮືອບິນສາມາດຂຶ້ນ-ລົງສະໜາມບິນໃນເວລາກາງຄືນບາງສະໜາມບິນລວມທັງການພັດທະນາບຸກຄະລາກອນແລະອື່ນໆກໍເຫັນວ່າຍັງບໍ່ທັນກໍານົດໄວ້ຢູ່ໃນຮ່າງກົດໝາຍສະບັບນີ້ພ້ອມນີ້ຢູ່ໃນຮ່າງກົດໝາຍຍັງບໍ່ທັນສັງເກດເຫັນການຄຸ້ມຄອງນັກບິນໂດຍສະເພາະນັກບິນທີ່ລັດວິສາຫະກິດຫຼືວ່າລັດເປັນຜູ້ສ້າງຊຶ່ງໄດ້ນໍາໃຊ້ງົບປະມານເປັນໄລຍະເວລາຫຼາຍສົມຄວນໃນກໍລະນີນັກບິນເຫຼົ່ານັ້ນຫາກໄປຮັບໃຊ້ຫຼືເຄື່ອນໄຫວຢູ່ສາຍການບິນອື່ນທັງພາຍໃນແລະຕ່າງປະເທດບັນຫານີ້ຈະມີວິທີການແລະມາດຕະການຄືແນວໃດແລະຄວນຈັດເຂົ້າໃນໝວດມາດຕາໃດ.ນອກຈາກນັ້ນ,ສັງເກດເຫັນວ່າຮ່າງກົດໝາຍສະບັບດັ່ງກ່າວນີ້ມີຫຼາຍໝວດຫຼາຍມາດຕາຊຶ່ງມີເຖິງ 189 ມາດຕາ 54 ໜ້າຖ້າສົມທຽບໃສ່ບັນດາກົດໝາຍທີ່ໄດ້ນໍາເຂົ້າມາສະເໜີໃນກອງປະຊຸມຄັ້ງນີ້ເຫັນວ່າມີຫຼາຍກວ່າໝູ່.ສະນັ້ນ,ສະເໜີເບິ່ງຄືນເອົາບາງໝວດບາງມາດຕາທີ່ຄ້າຍຄືກັນໂຮມເຂົ້າກັນຊັບຊ້ອນເນື້ອໃນໃຫ້ມີລັກສະນະສັງລວມກະທັດຮັດເຂົ້າໃຈງ່າຍແຕ່ໃຫ້ໄດ້ຄວາມໝາຍຄົບຖ້ວນສົມບູນ.ຂ່າວ-ພາບ: ຍຸພິນທອງ+ບຸນອູ້ມ