ອີງຕາມຂໍ້ມູນຈາກກຸ່ມບໍລິສັດທາງລົດໄຟຈີນສາຂາຄຸນໝິງໃຫ້ຮູ້ວ່າ: ມາຮອດວັນທີ 17 ທັນວາ ຜ່ານມາ, ທາງລົດໄຟແຂວງຢູນນານຂົນສົ່ງຜູ້ໂດຍສານໄດ້ທັງໝົດ 90,03 ລ້ານເທື່ອຄົນໃນປີນີ້ ແລະ ໄດ້ຫຼາຍກວ່າ 90 ລ້ານຄົນເປັນຄັ້ງທຳອິດ. ມາຮອດປັດຈຸບັນ, ທາງລົດໄຟລາວ-ຈີນ ໄດ້ຂົນສົ່ງຜູ້ໂດຍສານເພີ່ມຂຶ້ນ 90,9% ເມື່ອທຽບໃສ່ໄລຍະດຽວກັນຂອງປີຜ່ານມາ, ຂົນສົ່ງຜູ້ໂດຍສານຂ້າມຊາດໄດ້ 1 ແສນກວ່າຄົນຈາກ 72 ປະເທດ ແລະ ເຂດແຄ້ວນ, ຈຳນວນຂົນສົ່ງຜູ້ໂດຍສານຕໍ່ເດືອນຢູ່ຕາມທາງລົດໄຟຕອນພາຍໃນປະເທດຈີນໄດ້ 6 ແສນກວ່າເທື່ອຄົນຕໍ່ເດືອນໃນໄລຍະເລີ່ມຕົ້ນ ເພີ່ມຂຶ້ນເປັນ 1,51 ລ້ານເທື່ອຄົນຖືເປັນລະດັບສູງສຸດ.
ນັບແຕ່ຕົ້ນປີເປັນຕົ້ນມາ, ການກໍ່ສ້າງ ແລະ ການດຳເນີນງານຂອງທາງລົດໄຟແຂວງຢູນນານໄດ້ມີຄວາມຄືບໜ້າຢ່າງຕໍ່ເນື່ອງ. ວັນທີ 13 ເມສາ ຜ່ານມາ, ທາງລົດໄຟລາວ-ຈີນໄດ້ເປີດຂະບວນລົດໄຟໂດຍສານສາກົນຈາກສະຖານີຄຸນໝິງໃຕ້ຫາສະຖານີວຽງຈັນ, ການເດີນທາງອອກຈາກນະຄອນຄຸນໝິງແຕ່ເຊົ້າຈະສາມາດເດີນທາງໄປເຖິງນະຄອນຫຼວງວຽງຈັນໃນຕອນແລງ. ນັບແຕ່ວັນທີ 25 ກໍລະກົດ ເປັນຕົ້ນມາ, ທາງລົດໄຟລາວ-ຈີນ ໄດ້ປະຕິບັດແຜນທີ່ແລ່ນລົດສະບັບໃໝ່ ແລະ ປະສິດທິພາບໃນການແຈ້ງດ່ານໄດ້ຮັບການປັບປຸງໃຫ້ສູງຂຶ້ນຕື່ມອີກ. ວັນທີ 26 ພະຈິກຜ່ານມາ, ໄດ້ເປີດນຳໃຊ້ທາງລົດໄຟຢູນນານ-ຊີຈ້າງຕອນນະຄອນລີ້ຈ່ຽງ-ນະຄອນຊາງກຣີລາ. ນັບມາຮອດປັດຈຸບັນນີ້, ແຂວງຢູນນານມີ 14 ນະຄອນ ຫຼື ກິ່ງແຂວງ ໄດ້ເປີດນຳໃຊ້ທາງລົດໄຟຄວາມໄວສູງແລ້ວ, ໄລຍະທາງຂອງທາງລົດໄຟຄວາມໄວສູງມີຫຼາຍກວ່າ 5.000 ກິໂລແມັດ.
ແຫຼ່ງຂ່າວ: ໜັງສືພິມລາຍວັນຢູນນານ, ພາບໂດຍ: Yang Zixuan
ຄໍາເຫັນ