 |
ໃນໂອກາດດັ່ງກ່າວ, ທ່ານ ອານຸພາບ ວົງໜໍ່ແກ້ວ ໄດ້ສະແດງຄວາມຍິນດີຕ້ອນຮັບອັນອົບອຸ່ນຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງທ່ານ ນາງ ກາຊຸໂກະ ອີຊິກາກິ, ອັນເປັນການຢັ້ງຢືນເຖິງຄວາມເອົາໃຈໃສ່ ແລະ ການໃຫ້ຄວາມສຳຄັນ ຕໍ່ກັບການຮ່ວມມືລະຫວ່າງ ສປປ ລາວ ແລະ ອົງການ ສປຊ ດ້ານເຄຫາສະຖານ ຕະຫຼອດມາ. ທ່ານຮອງລັດຖະມົນຕີກະຊວງການຕ່າງປະເທດໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ສະແດງຄວາມຂອບໃຈຢ່າງຈິງໃຈ ແລະ ຕີລາຄາສູງຕໍ່ການຮ່ວມມືກັບອົງການ ສປຊ ດ້ານເຄຫາສະຖານທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນຂົງເຂດວຽກງານວ່າດ້ວຍການພັດທະນາຕົວເມືອງ, ການປັບຕົວກັບການປ່ຽນແປງສະພາບດິນຟ້າອາກາດ ແລະ ການເຂົ້າເຖິງການບໍລິການພື້ນຖານໂຄງລ່າງ ຊຶ່ງມີຄວາມຈໍາເປັນທີ່ຕ້ອງໄດ້ສ້າງຂີດຄວາມສາມາດຜ່ານຂະແໜງການຕ່າງໆ ທັງໃນຂັ້ນສູນກາງ, ຂັ້ນແຂວງ ແລະ ຂັ້ນເມືອງໃນການຈັດຕັ້ງປະຕິບັດບັນດາແຜນງານການຮ່ວມມື ລະຫວ່າງລັດຖະບານ ແຫ່ງ ສປປ ລາວ ແລະ ອົງການ ສປຊ ດ້ານເຄຫາສະຖານໃນສົກປີ 2022-2026 ທີ່ໄດ້ຈັດປະຕິບັດສໍາເລັດ ແລະ ໄດ້ມອບ-ຮັບໂຄງການລະບົບນໍ້າປະປາໃຫ້ເມືອງໄຊພູທອງ ແລະ ເມືອງພີນ ແຂວງສະຫວັນນະເຂດ ພາຍໃຕ້ໂຄງການ ການສ້າງຄວາມເຂັ້ມແຂງເພື່ອຫຼຸດຜ່ອນຜົນກະທົບໄພພິບັດໃນບັນດາຕົວເມືອງນ້ອຍທີ່ມີຄວາມສ່ຽງໃນ ສປປ ລາວ ຊຶ່ງມີມູນຄ່າ 5.5 ລ້ານໂດລາ.
ພ້ອມດຽວກັນນັ້ນ, ອົງການ ສປຊ ດ້ານເຄຫາສະຖານ ກໍຍັງຈະສືບຕໍ່ຈັດຕັ້ງປະຕິບັດໂຄງການເພີ່ມທະວີຄວາມສາມາດໃນການປັບຕົວ ແລະ ການສ້າງທີ່ຢູ່ອາໄສທີ່ທົນທານໃຫ້ຊຸມຊົນທີ່ມີຄວາມບອບບາງ ຢູ່ບັນດາແຂວງເປົ້າໝາຍຂອງ ສປປ ລາວ ໃນສົກປີ 2026-2029 ຊຶ່ງແຜນຍຸດທະສາດດັ່ງກ່າວນີ້ລ້ວນແລ້ວແຕ່ເປັນບຸລິມະສິດແຫ່ງຊາດ ແລະ ສອດຄ່ອງກັບເປົ້າໝາຍການພັດທະນາແບບຍືນຍົງຂອງ ສປປ ລາວ, ດ້ວຍຍຸດທະສາດການພັດທະນາຕົວເມືອງແຫ່ງຊາດ ແລະ ຍຸດທະສາດການເຕີບໂຕສີຂຽວ ເພື່ອຄວາມທົນທານຕໍ່ການປ່ຽນແປງສະພາບດິນຟ້າອາກາດ ແລະ ການປັງປຸງການເຂົ້າເຖິງການບໍລິການພື້ນຖານຂອງ ສປປ ລາວ.
ໃນໂອກາດນີ້, ທ່ານ ນາງ ກາຊຸໂກະ ອີຊິກາກິ ກໍໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ແລະ ສະແດງຄວາມຊົມເຊີຍຕໍ່ຜົນສຳເລັດອັນຈົບງາມໃນການຈັດຕັ້ງປະຕິບັດໂຄງການລະຫວ່າງ ລັດຖະບານ ແຫ່ງ ສປປ ລາວ ແລະ ອົງການ ສປຊ ດ້ານເຄຫາສະຖານ ໃນການສ້າງຄວາມເຂັ້ມແຂງເພື່ອຫຼຸດຜ່ອນຜົນກະທົບໄພພິບັດໃນບັນດາຕົວເມືອງນ້ອຍທີ່ມີຄວາມສ່ຽງໃນ ສປປ ລາວ. ນອກນັ້ນ, ທ່ານ ນາງ ກາຊຸໂກະ ອີຊິກາກິ ກໍໄດ້ໃຫ້ຄຳໝາຍໝັ້ນທີ່ຈະສືບຕໍ່ສະໜັບສະໜູນຊ່ວຍເຫຼືອ ບັນດາໂຄງການທີ່ຈະສືບຕໍ່ຈັດຕັ້ງປະຕິບັດຢູ່ໃນແຂວງເປົ້າໝາຍຂອງ ສປປ ລາວ ຢ່າງເຕັມສ່ວນໃນຂົງເຂດວຽກງານການພັດທະນາຕົວເມືອງ, ການປັບຕົວກັບການປ່ຽນແປງສະພາບດິນຟ້າອາກາດ ແລະ ການເຂົ້າເຖິງການບໍລິການພື້ນຖານໂຄງລ່າງຂອງ ສປປ ລາວ ໃຫ້ນັບມື້ນັບດີຂຶ້ນເທື່ອລະກ້າວ.
ຂ່າວ: ກະຊວງການຕ່າງປະເທດ
ຄໍາເຫັນ