ການເດີນທາງຄັ້ງນີ້, ນຳໂດຍທ່ານ ບຸນມີ ຫຼ່ຽມໄຊຍະຈັກ ປະທານສະຫະພັນບານເຕະຄົນພິການຕາແຫ່ງຊາດລາວ, ຮອງປະທານສະຫະພັນບານເຕະ ນະຄອນຫຼວງວຽງຈັນ ທັງເປັນປະທານກິດຕິມະສັກຂອງສະໂມສອນ ເບສະຫວັນ ເອັບຊີ ຊຶ່ງໄດ້ຮ່ວມເດີນທາງໄປຕິດຕາມ ແລະ ໃຫ້ກຳລັງໃຈນັກກິລາຢ່າງໃກ້ຊິດ. ສະແດງໃຫ້ເຫັນເຖິງຄວາມເອົາໃຈໃສ່ ຕໍ່ການພັດທະນາບານເຕະຮາກຖານ (Grassroots Football) ໃນ ສປປ ລາວ.
ສຳລັບການແຂ່ງຂັນ COPA NAKA 2026 – U10 ຈະຈັດຂຶ້ນໃນລະຫວ່າງວັນທີ 4–5 ກໍລະກົດ 2026 ນີ້, ທີ່ສະໜາມ Alpine Football Camp Training ແຂວງຊຽງໃໝ່ ປະເທດໄທ. ໂດຍມີທີມເຂົ້າຮ່ວມທັງໝົດຈາກ 14 ປະເທດ ທົ່ວພາກພື້ນອາຊີ ປະກອບດ້ວຍ ຍີ່ປຸ່ນ, ສ.ເກົາຫຼີ, ຈີນ, ໄທ, ມາເລເຊຍ, ຫວຽດນາມ, ອິນໂດເນເຊຍ, ອິນເດຍ, ຟີລິບປິນ, ສິງກະໂປ, ສປປ ລາວ, ເມົາດິບ, ມົງໂກລີ ແລະ ມຽນມາ.
ການເຂົ້າຮ່ວມແຂ່ງຂັນຄັ້ງນີ້, ຖືເປັນໂອກາດອັນດີເລີດຂອງທັບນັກເຕະຮຸ່ນເຍົາວະຊົນ ເບສະຫວັນ ເອັບຊີ ທີ່ຈະໄດ້ເກັບກ່ຽວປະສົບການຈິງ, ພັດທະນາທັກສະ ແລະ ຮຽນຮູ້ມາດຕະຖານການຫຼິ້ນໃນລະດັບສາກົນ ພ້ອມທັງເປັນການເຜີຍແຜ່ຊື່ສຽງ ແລະ ຄວາມກ້າວໜ້າຂອງວົງການບານເຕະເຍົາວະຊົນລາວ ໃຫ້ເປັນທີ່ຮູ້ຈັກໃນເວທີສາກົນຫຼາຍຂຶ້ນ.
ຂໍເຊີນຊວນພີ່ນ້ອງແຟນບານຊາວລາວທຸກທ່ານ ຮ່ວມສົ່ງແຮງໃຈ ແລະ ສົ່ງແຮງເຊຍໃຫ້ທັບນັກກິລາ ເບສະຫວັນ ເອັບຊີ U10 ໃຫ້ສາມາດສ້າງຜົນງານໄດ້ຢ່າງໂດດເດັ່ນ ແລະ ນຳເອົາຄວາມພາກພູມໃຈກັບມາຝາກພໍ່ແມ່ປະຊາຊົນລາວທຸກຄົນ.
ແຫຼ່ງຂໍ້ມູນ ແລະ ພາບຈາກ: ເພສ Facebook: Bay sanvanh FC
ຄໍາເຫັນ