ທ່ຽວຊົມ ຂະນົບທຳນຽມ ຮີດຄອງປະເພນີ ບຸນອອກພັນສາປະວໍລະນາ ທີ່ວັດສີເມືອງ

ໂດຍ: ຍຸພິນທອງ
ວັດສີເມືອງ ກໍເປັນວັດເກົ່າແກ່ທີ່ສໍາຄັນ ຕັ້ງຢູ່ບ້ານສີເມືອງ ເມືອງສີສັດຕະນາກ ນະຄອນຫຼວງວຽງຈັນ,  ທີ່ຊາວພຸດໃຫ້ຄວາມເຫຼື້ອມໃສສັດທາ ສັກກາລະບູຊາ ແລະ ເປັນສະຖານທີ່ໃຫ້ຄວາມສົນໃຈຂອງບັນດານັກທ່ອງທ່ຽວພາຍໃນ ແລະ ຕ່າງປະເທດ, ເນື່ອງໃນໂອກາດງານບຸນອອກພັນສາປະວໍລະນາ ປະຈໍາປີ 2023 ຊຶ່ງປີນີ້ ຖືກກັບວັນທີ 29 ເດືອນຕຸລາ 2023 ກົງກັບມື້ຂຶ້ນ 15ຄ່ຳ ເດືອນ11ລາວ ພສ 2566. ພະອາຈານ ພົງ ມາດມະນີວົງ ຄະນະປົກຄອງວັດສີເມືອງ ໄດ້ໃຫ້ສໍາພາດທາງໂທລະສັບ ຕໍ່ນັກຂ່າວໜັງສືພິມປະຊາຊົນ ໂດຍພະສົງທີ່ວັດສີເມືອງໄດ້ຮູ້ເຖິງຄວາມເປັນມາຂອງການບູຊາໂຄມໄຟ ແລະ ການຈັດກິດຈະກໍາທາງສາສະໜາພາຍໃນວັດທີ່ຕິດພັນກັບງານບຸນອອກພັນສາປະວໍລະນາ ວ່າ: 
ສໍາລັບພິທີທາງສາສະໜາໃນມື້ອອກພັນສາ ແມ່ນເລີ່ມແຕ່ເວລາ 4:00 ໂມງ ເຕົ້າໂຮມອອກຕົນຍາດໂຍມຈາກໃກ້ ແລະ ໄກ; 5:00 ເລີ່ມໃສ່ບາດເທໂວໃຫ້ແດ່ຄະນະສົງໝູ່ໃຫຍ່ຈໍານວນ 50 ອົງ;  7:30 ໂມງ ມີພິທີຕັກບາດຖວາຍພັດຕາຫານແກ່ພະສົງສາມະເນນ ຟັງພະທໍາມະເທສະນາ ຕາມຮີດຄອງປະເພນີ; 18:00 ເຕົ້າໂຮມອອກຕົນຍາດໂຍມ ໄຫວ້ພະສູດມົນແປ ແລະ ເວລາ19:00 ມີພິທີວຽນທຽນອອ້ມ ພັດທະສິມມາສາມຮອບ. ຫຼັງຈາກນັ້ນໄຕ້ໂຄມໄຟຈຳນວນ 999 ດວງເພື່ອຖວາຍເປັນພຸດທະບູຊາ ທຳມະບູຊາ ສັງຄະບູຊາ. ການສ້າງໂຄມໄຟສາມາດເຮັດໄດ້ບໍ່ຈຳກັດຈຳນວນອີງຕາມເງື່ອນໄຂຄວາມສະດວກຂອງແຕ່ລະວັດ. ບາງບ່ອນຢູ່ໃກ້ແມ່ນ້ຳກໍເຮັດເຮືອໄຟແລ້ວນຳໄປໄຫຼນ້ຳ ຖືວ່າການບູຊາປະທີບນ້ຳມັນ ນັ້ນມີອານິສົງຫຼາຍ ຕົວຢ່າງເຊັ່ນ: ພະອານຸຣຸດທະເຖຣະ ເປັນພະສາວົກທີ່ໄດ້ຍົກຍ້ອງວ່າເປັນພະອໍຣະຫັນຜູ້ມີຕາທິບ ເບິ່ງກ້ວາງເຫັນໄກໄດ້ ເພາະອານິສົງຖວາຍປະທີບໃນເມື່ອກ່ອນ ຈິ່ງນິຍົມເຮັດປະທີບບູຊາກັນມາຮອດປັດຈຸບັນ.
    ພະອາຈານ ພົງ ມາດມະນີວົງ ໃຫ້ຮູ້ເຖິງຈຸດປະສົງການບູຊາໂຄມໄຟມື້ອອກພັນສາປະວາລະນາ ເພື່ອເປັນການສະແດງອອກເຊິ່ງຄວາມກະຕັນຍູຕໍ່ຜູ້ມີພະຄຸນ ເຊັ່ນ: ຕຳນານແມ່ກາເຜືອກ ເພື່ອລະນຶກເຖິງບຸນຄຸນແມ່ທີ່ໃຫ້ກຳເນິດເກິດມາ ເຮົາຈິ່ງນິຍົມຝັ້ນຝ້າຍຕີນກາ ຈູດບູຊາແມ່ກາເຜືອກ ແລະຮອຍພະບາດ. ມີເລື່ອງເລົ່າກັນມາວ່າ ເມື່ອຄັ້ງດຶກດຳບັນຍັງມີພະຍາກາເຜືອກ ສອງຜົວເມຍ ເຮັດຮັງຢູ່ເທິງຕົ້ນໄມ້ໃນປ່າຫິມະພານ ແຄມຝັ່ງແມ່ນ້ຳ ຢູ່ມາມື້ໜຶ່ງພະຍາກາເຜືອກສອງຜົວເມຍ ໄດ້ອອກໄປຫາອາຫານ ຂະນະນັ້ນໄດ້ເກິດລົມພະຍຸມາພັດຮັງກາ ເຮັດໃຫ້ໄຂ່ກາຕົກກະແຈກກະຈາຍໄຫຼໄປຕາມແມ່ນ້ຳ ເມື່ອລົມພາຍຸສະຫງົບລົງ ແມ່ກາໄດ້ກັບມາຫາຮັງກໍຮູ້ວ່າຮັງ ແລະໄຂ່ໄດ້ໄຫຼນ້ຳໄປໝົດແລ້ວ ດ້ວຍຄວາມອາໄລຮັກລູກແມ່ກາໄດ້ຂາດໃຈຕາຍແລ້ວໄປເກິດເປັນພຣົມ ຢູ່ໃນພຣົມມະໂລກ ມີນາມວ່າທ້າວພະກາພຣົມ ສ່ວນໄຂ່ກາທັງ 5 ໄຫຼໄປຕາມກະແສນນໍ້ານັ້ນ ໜ່ວຍທີ 1 ແມ່ໄກ່ໄດ້ເອົາໄປຟັກ; ໜ່ວຍທີ 2 ແມ່ນາກເອົາໄປຟັກ; ໜ່ວຍທີ 3 ແມ່ເຕົ່າເອົາໄປຟັກ;ໜ່ວຍທີ່ 4 ແມ່ງົວເອົາໄປຟັກ ແລະ ໜ່ວຍທີ 5 ແມ່ຣາຊາສີ(ສິງຫ໌) ເອົາໄປຟັກ ເມື່ອໄຂ່ທັງ 5 ເບາະອອກມາ ກໍເປັນຄົນທັງໝົດ ເມື່ອໃຫຍ່ຂຶ້ນມາຕ່າງຄົນກໍເຫັນໂທດຂອງການຄອງເຮືອນ ແລະເຫັນອານິສົງຂອງການອອກບວດເປັນລືສີຈະເຣີນຍານ ສະມາບັດຢູ່ປ່າຫິມະພານ ວັນໜຶ່ງລືສີທັງຫ້າໄດ້ພົບກັນແລະໄດ້ຖາມໄຖ່ຊື່ສຽງຮຽງນາມຂອງກັນແລະກັນ ກໍຮູ້ວ່າຕ່າງຄົນຕ່າງມີແມ່ລ້ຽງທັງໝົດ; ດັ່ງນັ້ັນ ຈຶ່ງໄດ້ຈຸດໄຕ້ປະທີບບູຊາລະນຶກເຖິງແມ່ກາ; ແລະເພື່ອເປັນການຕ້ອນຮັບລະນຶກເຖິງວັນແຫ່ງການສະເດັດກັບມາຂອງພະພຸດທະເຈົ້າທີ່ໄປເທດໂຜດມານດາ ແລະ ຈຳພັນສາໃນສະຫວັນຊັ້ນດາວະດຶງ ໃນມື້ ຂຶ້ນ 15 ຄໍ່າເດືອນ 11 ຊາວບ້ານຈຶ່ງນິຍົມຈູດປະທີບໂຄມໄຟ ບູຊາຂັ້ນໄດແກ້ວເພື່ອຕ້ອນຮັບ ແລະ ບູຊາພະພຸດທະເຈົ້າ ຕອນສະເດັດລົງມາ ເອີ້ນວ່າ ຕັກບາດເທໂວ ເປັນວັນທີ ເປີດໂລກທັງ 3 ໃຫ້ເຫັນກັນຄື: ເທວະໂລກ ມະນຸດສະໂລກ ແລະ ສັດນະຣົກ ສາມາດແນມເຫັນກັນໄດ້ທັງສາມ ແລະ ເພື່ອບູຊາຮອຍພະພຸດທະບາດ ທີ່ເປັນສັນຍາລັກແຫ່ງຄວາມສະຫງົບ ຄວາມສາມັກຄີ ຈຶ່ງນິຍົມໄຫຼປະທີບໂຄມໄຟບູຊາ ແລະບູຊາແມ່ຄົງຄາ ເພື່ອເຄົາລົບແລະຮູ້ບຸນຄຸນຕໍ່ແມ່ນໍ້າ.
ເຖິງວ່າການບູຊາໃນວັນດັ່ງກ່າວນັ້ນຈະມີສາຍເຫດແຕກຕ່າງກັນຫຼາຍປະການກໍຕາມ ແຕ່ຈຸດໝາຍກໍຄື ການບູຊາພະຣັດຕະນະໄຕຣ ທີ່ຊາວພຸດລາວບັນດາເຜົ່າມີຄວາມເຫຼື້ອມໃສສັດທາ ແລະນຳເອົາຫຼັກທໍາ ຄຳສອນມາປະຕິບັດໃຫ້ເກິດຜົນດີໃນຊີວິດປະຈຳວັນ ນອກຈາກນີ້ຍັງສະແດງອອກເຊິ່ງຄວາມກະຕັນຍູ ຮູ້ບຸນຄຸນຕໍ່ຜູ້ມີພະຄຸນ ເຊັ່ນ: ແມ່ ພໍ່ ຄູບາອາຈານ ແລະທໍາມະຊາດທີ່ໃຫ້ຊີວິດ ມີແມ່ນ້ຳເປັນຕົ້ນ. ດັ່ງນັ້ນໃນມື້ບຸນອອກພັນສາປະວໍຣະນາ ຈຶ່ງມີການປະດັບປະດາເອ້ຍ້ອງດ້ວຍໂຄມໄຟເພື່ອຄວາມສວຍສົດງົດງາມ, ເພື່ອໃຫ້ບັນຍາກາດພາຍໃນງານບຸນມີຄວາມຟົດຟື້ນເບີກບານມ່ວນຊື່ນ, ເປັນປັດໃຈສະ ເໜ່ດຶງດູດນັກທ່ອງພາຍໃນ ແລະ ຕ່າງປະເທດ  ໃຫ້ຢາກເຂົ້າມາທ່ຽວຊົມບັນຍາກາດ ພາຍໃນງານ, ເຂົ້າມາທ່ຽວຊົມ ຂະນົບທຳນຽມ ຮີດຄອງປະເພນີ ແລະ ວັດທະນະທຳອັນດີງາມຂອງຊາດລາວເຮົາ.ພ້ອມດຽວກັນນັ້ນກໍຍັງເປັນການອະນຸລັກຮັກສາ ຮີດຄອງປະເພນີອັນດີງາມນີ້ໄວ້ຄຽງຄູ່ກັບຄົນລາວຕະຫຼອດໄປ.
ໂອກາດນີ້ ອາຕະມາພາບເຊີນຊວນຍາດໂຍມ ປະຊາຊົນ ຕະຫຼອດເຖິງນັກທ່ອງທ່ຽວພາຍໃນແລະຕ່າງປະເທດມາທ່ຽວຊົມບັນຍາກາດໃນງານບຸນອອກພັນສາປະວໍຣະນາທີ່ວັດສີເມືອງ ພ້ອມດຽວກັນນັ້ນ ຮຽກຮ້ອງຝາກເຖິງຍາດໂຍມທັງຫຼາຍຈົ່ງພ້ອມພຽງກັນຫຼິ້ນບຸນອອກພັນສາດ້ວຍຄວາມມ່ວນຊື່ນໃຫ້ໄດ້ທັງຄວາມຮັກແພງສາມັກຄີ, ການອະນຸລັກວັດທະນະທໍາ ແລະໃຫ້ຫຼິ້ນບຸນຢ່າງມີສະຕິໂດຍສະເພາະການສັນຈອນໄປມາຢ່າງມີສະຕິ, ການດື່ມກິນກໍຂໍໃຫ້ຢູ່ໃນຄວາມພໍເໝາະພໍດີ ແລະຂໍໃຫ້ອານິສົງແຫ່ງການສ້າງບຸນດັ່ງກ່າວຈົ່ງປົກປ້ອງຄຸ້ມຄອງຍາດໂຍມໃຫ້ມີແຕ່ຄວາມສຸກຄວາມຈະເລີນທຸກຖ້ວນໜ້າເທີ້ນ.