ທຸລະຄົມເຊື່ອມຊຶມເອກະສານກຽມດຳເນີນກອງປະຊຸມໃຫຍ່ ແລະທາບທາມບຸກຄະລາກອນ

ໃນຕອນເຊົ້າວັນທີ 4 ມັງກອນ 2023 ນີ້, ຄະນະປັບປຸງກົງຈັກການຈັດຕັ້ງຂອງເມືອງທຸລະຄົມ ແຂວງວຽງຈັນ ໄດ້ເປີດກອງປະຊຸມຂຶ້ນຢູ່ທີ່ສະໂມສອນ ເມືອງທຸລະຄົມ ແຂວງວຽງຈັນ, ໂດຍການເຂົ້າຮ່ວມເປັນປະທານຂອງ ສະຫາຍ ບຸນເລີດ ສີຫາປັນຍາ ຮອງເລຂາພັກເມືອງ, ປະທານຄະນະກວດກາພັກເມືອງ, ມີເລຂາໜ່ວຍພັກ, ຄະນະໜ່ວຍພັກ, ສະມາຊິກພັກຂອງ 9 ໜ່ວຍພັກອ້ອມຂ້າງເມືອງເຂົ້າຮ່ວມ.
    ຈຸດປະສົງຂອງກອງປະຊຸມຄັ້ງນີ້ ເພື່ອໃຫ້ບັນດາໜ່ວຍພັກຫ້າງຫາກະກຽມ ແລະ ເປີດກອງປະຊຸມໃຫຍ່ໜ່ວຍພັກຂອງຕົນ ພ້ອມກັບດໍາເນີນການທາບທາມບຸກຄະລາກອນເຂົ້າຮັບສະໝັກເປັນຄະນະໜ່ວຍພັກ, ຊຶ່ງສະຫາຍ ບຸນເລີດ ສີຫາປັນຍາໄດ້ເປັນຜູ້ນໍາສະເໜີຜ່ານເອກະສານກ່ຽວຂ້ອງ ເປັນຕົ້ນ: ຄໍາສັ່ງຂອງຄະນະປະຈໍາພັກແຂວງວຽງຈັນ ສະບັບເລກທີ 019/ຄປພ.ວຈ ລົງວັນທີ 22 ກັນຍາ 2023 ແລະ ຄໍາແນະນໍາຂອງຄະນະປະຈໍາພັກເມືອງທຸລະຄົມ ເລກທີ 436/ຄປພ.ທຄ ລົງວັນທີ 27 ພະຈິກ 2023 ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ. 
ສະຫາຍ ເຢ່ຍວື່ ຈົ່ງເນັ່ງ ຫົວໜ້າຄະນະຈັດຕັ້ງເມືອງ ໄດ້ຂຶ້ນຜ່ານເອກະສານມາດຖານ, ເງື່ອນໄຂຂອງຜູ້ຮັບສະໝັກເປັນຄະນະໜ່ວຍພັກ, ຈາກນັ້ນ ຄະນະຮັບຜິດຊອບໄດ້ນໍາພາການປ່ອນບັດທາບທາມ ຕາມລະບຽບກໍານົດໄວ້.
ຂ່າວ: ເມືອງທຸລະຄົມ