 |
ໃນໂອກາດນີ້, ສະຫາຍ ຫງວຽນມິງເຕິມ ໄດ້ສະແດງຄວາມຊົມເຊີຍຢ່າງຈິງໃຈທີ່ການສະເໜີແຕ່ງຕັ້ງສະຫາຍ ທອງສະຫວັນ ພົມວິຫານ ເປັນຮອງນາຍົກລັດຖະມົນຕີ ແລະ ລັດຖະມົນຕີກະຊວງການຕ່າງປະເທດແຫ່ງ ສປປ ລາວ ໄດ້ຖືກຮັບຮອງເອົາໂດຍກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີ X ໃນຕອນເຊົ້າຂອງວັນທີ 23 ນີ້. ພ້ອມດຽວກັນນີ້, ສະຫາຍເອກອັກຄະລັດຖະທູດກໍໄດ້ນໍາເອົາໂທລະເລກຊົມເຊີຍຂອງບັນດາສະຫາຍການນໍາຂັ້ນສູງຂອງ ສສ ຫວຽດນາມເຖິງບັນດາສະຫາຍການນໍາຂັ້ນສູງຂອງ ສປປ ລາວ ມາມອບໃຫ້ສະຫາຍ ທອງສະຫວັນ ພົມວິຫານ ອີກດ້ວຍ.
ໃນໂອກາດດຽວກັນນີ້, ສະຫາຍ ທອງສະຫວັນ ພົມວິຫານ ກໍໄດ້ສະແດງຄວາມຂອບໃຈຢ່າງຈິງໃຈມາຍັງສະຫາຍ ຫງວຽນມິງເຕິມ ພ້ອມດ້ວຍບັນດາພະນັກງານສະຖານທູດທີ່ມາສະແດງຄວາມຊົມເຊີຍ ແລະ ອວຍພອນດ້ວຍຕົນເອງກໍຄືການນໍາເອົາໂທລະເລກອວຍພອນຂອງບັນດາສະຫາຍການນໍາພັກ-ລັດຫວຽດນາມ ເຖິງບັນດາສະຫາຍການນໍາພັກ-ລັດລາວ, ສິ່ງເຫຼົ່ານີ້ເປັນການສະແດງໃຫ້ເຫັນເຖິງສາຍພົວພັນມິດຕະພາບພິເສດອັນສະໜິດສະໜົມລະຫວ່າງສອງຊາດເວົ້າລວມ, ເວົ້າສະເພາະແມ່ນຄວາມສາມັກຄີລະຫວ່າງສອງກະຊວງການຕ່າງປະເທດລາວ-ຫວຽດນາມ ກໍຄືສະຖານທູດຫວຽດນາມປະຈຳ ສປປ ລາວ. ພ້ອມດຽວກັນນີ້, ສະຫາຍ ທອງສະຫວັນ ພົມວິຫານ ກໍໄດ້ສະແດງຄວາມຊົມເຊີຍຕໍ່ການປະກອບສ່ວນຢ່າງຕັ້ງໜ້າຂອງສະຫາຍ ຫງວຽນມິງເຕິມ ແລະ ພະນັກງານສະຖານທູດທຸກສະຫາຍລວມເຖິງການຮ່ວມມື ແລະ ປະສານງານກັນຢ່າງໃກ້ຊິດ ແລະ ມີປະສິດທິພາບສູງລະຫວ່າງກະຊວງການຕ່າງປະເທດລາວກັບສະຖານທູດຫວຽດນາມໃນໄລຍະຜ່ານມາ ຊຶ່ງສາມາດຊຸກຍູ້ສົ່ງເສີມການພົວພັນຮ່ວມມືອັນເປັນມູນເຊື້ອທີ່ດີລະຫວ່າງສອງປະເທດໃຫ້ນັບມື້ນັບມີການພັດທະນາເຂົ້າສູ່ລວງເລິກ ໂດຍສະເພາະແມ່ນການເປັນເສນາທິການໃຫ້ແກ່ການນໍາຂັ້ນສູງຂອງສອງປະເທດ. ພິເສດ, ສະຫາຍ ທອງສະຫວັນພົມວິຫານ ຍັງໄດ້ຕາງໜ້າໃຫ້ພັກ-ລັດ ແລະ ປະຊາຊົນລາວສະແດງຄວາມຂອບໃຈ ແລະ ຮູ້ບຸນຄຸນຢ່າງເລິກເຊິ່ງຕໍ່ການຊ່ວຍເຫຼືອອັນລໍ້າຄ່າ, ທັນການທີ່ພັກ, ລັດ ແລະ ປະຊາຊົນຫວຽດນາມມີໃຫ້ພັກ, ລັດ ແລະ ປະຊາຊົນລາວ ຕະຫຼອດມາ.
 |
ໃນຕອນທ້າຍ, ສະຫາຍ ຫງວຽນມິງເຕິມ ໄດ້ຢືນຢັນຄືນວ່າ: ຈະເຮັດສຸດຄວາມສາມາດຂອງຕົນເພື່ອເປັນຂົວຕໍ່ໃນການຜັນຂະຫຍາຍການຕົກລົງຂອງການນໍາຂັ້ນສູງຂອງສອງຝ່າຍກໍຄືການເສີມຂະຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມອ້າຍນ້ອງໃຫ້ແໜ້ນແຟ້ນ ແລະ ຈະເລີນງອກງາມຍິ່ງໆຂຶ້ນ.
ຂ່າວ: ກະຊວງການຕ່າງປະເທດ
ຄໍາເຫັນ