 |
ພິທີມອບ-ຮັບການສະໜັບສະໜູນຄັ້ງນີ້ ຈັດຂຶ້ນໃນວັນທີ 10 ມິຖຸນາ ຜ່ານມາ ທີ່ສະໜາມກິລາເທັນນິສ ສະໂມສອນ ວຽງຈັນ ເທັນນິສ ເມືອງຈັນທະບູລີ ນະຄອນຫຼວງວຽງຈັນ ໂດຍໃຫ້ກຽດມອບຂອງທ່ານ ນາງ ຢ້າວຢ້າວ (YaoYao) ຮອງປະທານ ບໍລິສັດ ຫວັງ ອິນເວັສເມັນ ຈໍາກັດ ແລະ ຕາງໜ້າກ່າວຮັບໂດຍທ່ານ ດາວວອນ ພະຈັນທະວົງ ປະທານສະຫະພັນເທັນນິສແຫ່ງຊາດລາວ ມີບັນດາຄະນະບໍລິຫານງານສະຫະພັນ, ຄູຝຶກ ແລະ ນັກກິລາສາວເທັນນິສທີມຊາດລາວເຂົ້າຮ່ວມເປັນສັກຂີພິຍານ.
ສຳລັບນັກກິລາເທັນນິສທີມຊາດລາວ ຈະເດີນທາງເຂົ້າຮ່ວມແຂ່ງຂັນລາຍການນີ້ ມີທັງໝົດ 5 ຄົນ, ໃນນັ້ນ ຄູຝຶກ 1 ຄົນ ແລະ ນັກກິລາ 4 ຄົນ ປະກອບມີ ທ່ານ ອາລັນ ວູອອງ ຄູຝຶກທີມຊາດລາວ ຊາວອົສະຕຣາລີ ສ່ວນນັກກິລາມີນາງ ມະໄລລັກ ປະທຸມມາກຸໂຣແນນ ຫຼື ດິໄລຣາ ສາວລູກສອດ ລາວ-ສະວີເດັນ, ນາງ ທິລະດາ ພົມມະຈັກ, ນາງ ຄອນສະໄໝ ຈຳປາມະນີວົງ ແລະ ນາງ ຣຸ້ງ ຄຳວົງສາ ລູກສອດ ລາວ-ເບວຢ້ຽມ.
ການແຂ່ງຂັນເທັນນິສປະເພດທີມຍິງ ຊີງແຊັມໂລກຄັ້ງນີ້ ມີທັງໝົດ 4 ກຸ່ມ ສະເພາະ ກຸ່ມ 1 ແລະ ກຸ່ມ 2 ແມ່ນຢືນລໍຖ້າໃນການແຂ່ງຂັນລະດັບສູງສຸດ ສ່ວນ ກຸ່ມ 3 ມີ 20 ປະທດ ແລະ ມີນັກກິລາລາວ ຮ່ວມຢູ່ນຳ ຊຶ່ງກຸ່ມນີ້ ຫາກນັກກິລາຊາດໃດຊະນະຄະແນນຫຼາຍທີ່ສຸດ ເປັນອັນດັບທີ 1 ແລະ ອັນດັບທີ 2 ຂອງກຸ່ມ ຈະຖືກເລື່ອນຂຶ້ນໄປແຂ່ງຂັນໃນ ກຸ່ມ 1 ແລະ ກຸ່ມ 2, ຂະນະທີ່ ກຸ່ມ 4 ກໍຈະຕ້ອງແຂ່ງຂັນເພື່ອຍາດເອົາໂຄຕ້າ ໄປແຂ່ງຂັນໃນກຸ່ມ 3 ຕາມລຳດັບ.
ການແຂ່ງຂັນ ສະເພາະກຸ່ມ 3 ມີທັງໝົດ 20 ປະເທດ ແຂ່ງຂັນຢູ່ 2 ປະເທດກໍຄື ທີ່ປະເທດສີລັງກາ ແລະ ປະເທດຈໍແດນ ສະເພາະ ກຸ່ມຂອງ ສປປ ລາວ ຢູ່ຮ່ວມກັບ ຫວຽດນາມ, ກວມ, ມາກເກົາ, ເມົາດິບ, ບຣູໄນ, ຊາອຸດິດ ອາຣັບບີ, ພູຕານ, ບາເຣນ ແລະ ຈໍແດນ ເຈົ້າພາບ ລາຍການນີ້ ສປປ ລາວ ເຄີຍໄດ້ສົ່ງເຂົ້າຮ່ວມເລີ່ມປີ 2022 ເປັນຕົ້ນມາ.
(ຂ່າວ: ຕຸໄລເພັດ)
ຄໍາເຫັນ