 |
ທ່ານ ບຸນຫລາຍ ບຸດທິ ກ່າວວ່າ: ໂຄງການ "ກໍ່ສ້າງໂຮງໝໍມິດຕະພາບ ດານັງ-ເຊກອງ ” ເປັນຂອງຂວັນຈາກຄະນະພັກ, ອົງການປົກຄອງ ແລະ ປະຊາຊົນນະຄອນດານັງ ສສ ຫວຽດນາມ ມອບໃຫ້ຄະນະພັກ, ອົງການປົກຄອງ ແລະ ປະຊາຊົນແຂວງເຊກອງ ສປປ ລາວ ໄລຍະປີ 2026-2030 ແລະ ໄດ້ມອບໃຫ້ແຂວງເຊກອງ ຈັດຕັ້ງປະຕິບັດ ໂດຍການວາງສີລາລຶກໂຄງການໃນມື້ນີ້ ເປັນຫຼັກຖານພະຍານແຫ່ງມິດຕະພາບທີ່ສະໜິດແໜ້ນ ແລະ ຊື່ສັດບໍລິສຸດລະຫວ່າງ ລາວ - ຫວຽດນາມ, ຫວຽດນາມ-ລາວ ແລະ ຍັງເປັນສັນຍາລັກຂອງຄວາມຮັກແພງອ້າຍນ້ອງ “ເປັນຈິດໜຶ່ງໃຈດຽວ”, “ແບ່ງທຸກແບ່ງສຸກຮ່ວມກັນ”, ຂອງການເປັນຫ່ວງເປັນໄຍຢ່າງເລິກເຊິ່ງຈາກນະຄອນດານັງ ຕໍ່ກັບປະຊາຊົນແຂວງເຊກອງ. ພວກເຮົາເຊື່ອໝັ້ນວ່າ ເມື່ອໂຮງໝໍມິດຕະພາບດານັງ -ເຊກອງ ສຳເລັດ ແລະ ເປີດໃຊ້ງານແລ້ວ ຈະປະກອບສ່ວນຢ່າງສໍາຄັນໃນການປັບປຸງຄຸນນະພາບການດູແລສຸຂະພາບ, ການກວດ, ປິ່ນປົວພະຍາດໃຫ້ແກ່ປະຊາຊົນເມືອງທ່າແຕງ ແຂວງເຊກອງ ແລະ ເຂດບໍລິເວນອ້ອມຂ້າງ. ນະໂອກາດນີ້, ຮຽກຮ້ອງມາຍັງຂະແໜງສາທາລະນະສຸກຂັ້ນແຂວງ, ເມືອງ ແລະ ພະແນກການທີ່ກ່ຽວຂ້ອງຂອງແຂວງ ແລະ ປະຊາຊົນບັນດາເຜົ່າ ຈົ່ງເອື້ອອໍານວຍຄວາມສະດວກໃຫ້ແກ່ຂະບວນການກໍ່ສ້າງ; ປະສານງານຢ່າງໃກ້ຊິດກັບຜູ້ຮັບເໝົາກໍ່ສ້າງເພື່ອຮັບປະກັນຄຸນນະພາບ, ຄວາມປອດໄພຂອງແຮງງານ ແລະ ການປົກປັກຮັກສາສິ່ງແວດລ້ອມ.
ທ່ານ ສົມຈິດ ວົງວິໄລ ອຳນວຍການບໍລິສັດຈະເລີນໂຊກ ຈໍາກັດຜູ້ດຽວ (ບໍລິສັດຜູ້ຮັບເໝົາກໍ່ສ້າງ) ໄດ້ກ່າວວ່າ: ໂຄງການ “ກໍ່ສ້າງໂຮງໝໍມິດຕະພາບ ດານັງ- ເຊກອງ", ມີມູນຄ່າການລົງທຶນ ທັງໝົດ 6,7 ລ້ານໂດລາສະຫະລັດ, ຂະໜາດໂຄງການປະກອບມີ: ອາຄານໂຮງໝໍ 2 ຊັ້ນ; ອາຄານຫໍພັກພະນັກງານ 2 ຊັ້ນ; ມີຮ້ານອາຫານ, ຮ້ານຊັກລີດ, ໂຮງເຢັນ (ຫ້ອງເກັບມ້ຽນສົບ), ສະຖານທີ່ເກັບກຳ ແລະ ບຳບັດສິ່ງເສດເຫຼືອ, ເຮືອນເຄື່ອງປັ່ນໄຟຟ້າ. ລະບົບໂຄງລ່າງເຕັກນິກປະກອບມີ: ເຮືອນປ້ອມຍາມ, ປະຕູ, ຮົ້ວກຳແພງ, ເສົາທຸງ, ປ້າຍຊື່, ເດີ່ນ ແລະ ບ່ອນຈອດລົດ, ສະຖານີໝໍ້ແປງໄຟຟ້າ, ລະບົບລະບາຍນໍ້ານອກອາຄານ, ສະຖານີບໍາບັດນໍ້າເສຍ, ໄຟເຍືອງທາງນອກອາຄານ, ການປູກຕົ້ນໄມ້, ອຸປະກອນການແພດ ແລະ ອື່ນໆ. ໄລຍະເວລາດໍາເນີນການກໍ່ສ້າງ 36 ເດືອນ ນັບແຕ່ມື້ເລີ່ມລົງມືກໍ່ສ້າງ; ພ້ອມນີ້ ບໍລິສັດ ໃຫ້ຄຳໝັ້ນໝາຍວ່າ: ຈະນໍາໃຊ້ຊັບພະຍາກອນມະນຸດ ແລະ ວັດສະດຸທີ່ມີຄຸນນະພາບທີ່ດີທີ່ສຸດ ເຂົ້າໃນການກໍ່ສ້າງໂຄງການນີ້ ເພື່ອຮັບປະກັນໃຫ້ມີປະສິດທິພາບສູງ ແລະ ຍືນຍົງທີ່ສຸດ.
ຈາກນັ້ນ, ການນໍາທັງສອງຝ່າຍ ລາວ ແລະ ຫວຽດນາມ ໄດ້ຂຶ້ນຊ້ວນດິນ ເພື່ອດໍາເນີນການວາງສີລາລຶກ ໂຄງການກໍ່ສ້າງດັ່ງກ່າວຢ່າງເປັນທາງການ.
(ຂ່າວ:ພຸດທະສອນ)
ຄໍາເຫັນ