ໄຊຍະບູລີ ຫາລືກຽມຄວາມພ້ອມຈັດງານມະຫະກໍາບຸນຊ້າງ ແລະ ປີທ່ອງທ່ຽວລາວ 2024

ໃນວັນທີ 31 ມັງກອນນີ້ທີ່ຫ້ອງວ່າການເມືອງໄຊຍະບູລີພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ອງ (ຖວທ) ແຂວງ ຮ່ວມກັບເມືອງໄຊຍະບູລີໄດ້ຈັດກອງປະຊຸມປຶກສາຫາລືການກະກຽມຄວາມພ້ອມຕ້ອນຮັບນັກທ່ອງທ່ຽວທີ່ຈະມາທ່ຽວຊົມງານມະຫະກໍາບຸນຊ້າງ ແລະ ປີທ່ອງທ່ຽວລາວ 2024ໂດຍການເປັນປະທານຂອງທ່ານ ບຸນທະວີ ບຸນຊູຮັກ ຮອງຫົວໜ້າພະແນກ ຖວທ ແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນທະວີ ບຸນຊູຮັກ ກ່າວວ່າ: ໃນປີ 2024 ນີ້ ລັດຖະບານໄດ້ອະນຸມັດໃຫ້ເປີດປີທ່ອງທ່ຽວລາວ  ຊຶ່ງແຂວງໄຊຍະບູລີໄດ້ກະກຽມຫຼາຍກິດຈະກໍາເພື່ອສົ່ງເສີມປີທ່ອງທ່ຽວລາວ ໂດຍໄດ້ສຸມໃສ່ຈັດຕັ້ງປະຕິບັດບັນດາກິດຈະກໍາທີ່ເປັນກິດຈະກໍາຫຼັກແລະກິດຈະກໍາປິ່ນອ້ອມເພື່ອໂຄສະນາດຶງດູດນັກທ່ອງທ່ຽວທັງພາຍໃນແລະຕ່າງປະເທດໃຫ້ເຂົ້າມາທ່ອງທ່ຽວແຂວງໄຊຍະບູລີຫຼາຍຂຶ້ນ.
ສຳລັບເມືອງໄຊຍະບູລີມີໂຮງແຮມ 4 ແຫ່ງ, ເຮືອນພັກ 57 ແຫ່ງ, ຣີສອດ 1 ແຫ່ງ, ຮ້ານອາຫານ 11 ແຫ່ງ, ຮ້ານບັນເທີງ 2 ແຫ່ງ, ຮ້ານກິນດື່ມ 3 ແຫ່ງ. ກອງປະຊຸມໄດ້ຮັບຟັງການແນະນໍາບັນດານິຕິກຳທີ່ກ່ຽວຂ້ອງກັບການບໍລິການຂອງຫົວໜ່ວຍທຸລະກິດທ່ອງທ່ຽວເປັນຕົ້ນ ຂໍ້ຫ້າມສໍາລັບທີ່ພັກແຮມ, ຮ້ານອາຫານ, ຮ້ານບັນເທີງ ແລະ ຮ້ານກິນດື່ມ, ແນະນຳກ່ຽວກັບການຮັກສາຄວາມສະຫງົບ, ແນະນຳກ່ຽວກັບການກຳນົດລາຄາທີ່ເໝາະສົມ, ແນະນຳກ່ຽວກັບການຮັກສາສິ່ງແວດລ້ອມ ການຄວບຄຸມສຽງ, ແນະນຳກ່ຽວກັບການຮັກສາອະນາໄມ ແລະ ຄວາມສະອາດ.ພ້ອມນີ້, ຜູ້ເຂົ້າຮ່ວມໄດ້ພ້ອມກັນປະກອບຄຳຄິດຄໍາເຫັນເພື່ອຕ້ອນຮັບນັກທ່ອງທ່ຽວທີ່ມາທ່ອງທ່ຽວເມືອງໄຊຍະບູລີ ແຂວງໄຊຍະບູລີໃຫ້ມີຄວາມປະທັບໃຈ ແລະ ເຂົ້າມາທ່ອງທ່ຽວເມືອງໄຊຍະບູລີໃຫ້ຫຼາຍຂຶ້ນ.
ຂ່າວ-ພາບ: ສົມພົງ ສີສະຫັວດ